Efantu 25
Eket ya eti Abraham
25
Abraham naasa akee aal caacawoo Ketula.
2 Naapukoo epuuk ya payenke:
Similan,
Yokosan,
Metan,
Mitiyan,
Yisupak niŋ Suwah.
3 Yokosan ayem paapaa ati Sapa niŋ Tetan.
Tetan naapuk pakati Asul,
Letus niŋ Lewum.
4 Ehe miin ma miti Mitiyan:
Efa,
Efel,
Hanok,
Apita niŋ Eletaa.
Payenkuu púlooŋ kayem miin ma miti Ketula.
5 Abraham naawufan hisaanumate ha hiteyoo púlooŋ añiinoo Isaak.
6 Naawufan ukee waah wa epuuk pakaaloo pakakee paka.
Pale akina kaloŋayoo náakatinoolii niŋ añiinoo Isaak;
epuuk ya payenkuu,
naasokii kahiiŋ pa caanak ca íncifulii pa.
7-8 Abraham naataak eloŋ eehaane néesuum,
naasuuŋut pikelan naaket loho ataakaa sitiil keme niŋ áwii éhaaciil niŋ kaat (175) naananf pakataama.
9 Epuukoo Isaak niŋ Ismayel nkahokoo ti kaayeen ka kenfakat ka kiti Makapela keeyem ka ti kaakit ka kiti Efulon,
añii ya ati Sohal eesoke Het maamaa,
pukol Mamule.
10 Abraham anoome kaakit ka ti keesoke Het maamaa,
toko nkahokoo niŋ aaloo Sara.
11 Pamuusal eket ya eti Abraham,
Pútuun pa mpisampan añiinoo Isaak.
Naakin pukol ésaapun ya eti Lahay-Loyi.
Miin ma miti Ismayel
12 Ehe kiti miin ma miti Ismayel,
añii ya ati Abraham;
íññaa ateyoo ayem Hakal ati Esipt a,
amiikan a ati Sara.
13 Ehe ucawii,
nuukiicee samat nii fa nkapukee fa:
Nepayot ayem añii ya áyaañ a,
Ketal,
Atepeel,
Mipisam,
14 Misema,
Tuma,
Masa,
15 Hadad,
Tema,
Yetul,
Nafis niŋ Ketema.
16 Payenkuu kayem epuuk ya ŋaasuwan niŋ pákasupak paka pakati Ismayel.
An óo an teyii naayeno áhampaatiin ati miin nkaluwool pisaatee pa piteyii neyii niŋ la nkasiiŋane la púkuut pa piteyii.
17 Ismayel naasuuŋut pikelan naaket loho ataakaa sitiil keme niŋ áwii niŋ kaat niŋ súsupak (137) naananf pakataama.
18 Miin ma miti Ismayel immiyeno ti mah ma meeyem ma ti pututa Hawila niŋ Sul.
Sul ekolaakol Esipt naahiiŋaa Asul.
Nkakin kápilaaŋ pakanii kaatuko kásuumoolut.
Jakob niŋ Esawu
19 Ehe kiti miin ma miti Isaak añii ya ati Abraham.
Abraham naapuk Isaak.
20 Ta Isaak naataake ta sitiil áwii ésupak (40) naasa Rebeka añii ya ati Petuwel,
Laban ahoopoo.
Petuwel niŋ Laban pakati Alam nkakin Mesopotami.
21 Pale Rebeka caakonta.
Fiye,
Isaak naaluum Ateeteyo kiti aaloo.
Ateeteyo náasiitan kaluum ka kiteyoo,
Rebeka naasa munow,
22 naayeno hítuulu máasupak.
Payenkuu nkayeno písapalool ti munowoo.
Rebeka naasok:
“Weyme utaakiyaam?”
Fiye naakaay kacakan Ateeteyo.
23 Ateeteyo naasokoo:
“Sísii súsupak siyem ti munowi,
uyoŋ úsupak efuupukee núukatinool;
ekee síi ya efeehaŋ sempe ekee ya,
añii ya áhampaatiin a afaayeno amiikan ti kahiineen ka.”
24 Ta íyyiŋooliyoo ta,
pánipani náapukii máasupak.
25 Ayáañ a naapukee naahanat samat nii kapaŋ élukuleen,
eniinoo néecunk.
Nkaluwoo caacaw ca Esawu (ekina eyem “kahanat”).
26 Atuwoo ti hipukuyee,
naacok Esawu ti econt,
nkaluwoo caacaw ca Jakob (ekina eyem “naacok econt”).a
Ta nkapukee ta,
Isaak ti sitiil áwii éhaaciil (60).
Rebeka caakonta.
Fiye,
Isaak naaluum.
Ateeteyo náasi kaluum ka kiteyoo,
Rebeka naasa munow,
naayeno hítuulu máasupak.
Payenkuu nkayeno písapalool ti munowoo - Fiye naakaay kacakan Ateeteyo.
Rebeka caakonta.
Fiye,
Isaak naaluum.
Ateeteyo náasi kaluum ka kiteyoo,
Rebeka naasa munow,
naayeno hítuulu máasupak.
Ateeteyo naasokoo - Sísii súsupak siyem ti munowi.
Rebeka caakonta.
Fiye,
Isaak naaluum.
Ateeteyo náasi kaluum ka kiteyoo,
Rebeka naasa munow,
naayeno hítuulu máasupak.
Uyoŋ úsupak efuupukee núukatinool.
Rebeka caakonta.
Fiye,
Isaak naaluum.
Ateeteyo náasi kaluum ka kiteyoo,
Rebeka naasa munow,
naayeno hítuulu máasupak.
Ekee síi ya efeehaŋ ekee ya sempe - añii ya áhampaatiin a afaayeno amiikan ti kahiineen ka.
Ta íyyiŋooliyoo ta - pánipani náapukii máasupak.
27 Pikampaani pa pákasupak paka nkáyankii.
Esawu náayenoonii aleemaya enfakat nálafi piyeno ti ukit wa.
Pale Jakob áyiin eefatane nálafi piyeno t’enuuf.
28 Isaak naahaŋ pálafi Esawu kaatuko akiipaakiip efoofa eti elampa,
pale Rebeka naahaŋ pálafi Jakob.
29 Hikee hinoom Jakob naayeno hiik kisaak.
Esawu náafulii t’elampa niŋ ñíyoka ñenfakat fo náalaame.
30 Naasok Jakob:
“Ponket,
katampo pili ti kisaak ka kéecunke enke,
peep efipumukam.”
Ekina ewune nkalu Esawu caacaw ca Etom (ekina eyem pácunk).
31 Jakob naañahanoo:
“Noomanam fala híhampaatiinate ha hitii.”
32 Esawu naasokoo:
“Inci oopa ti eket kamma peep.
Híhampaatiinate ha hitoom,
eyyeyme nafaa nihitaakaam?”
33 Jakob naasokoo:
“Sintoolo fala.”
Esawu naasintoolo nii anoomanaa Jakob híhampaatiinate ha hiteyoo.
34 Fiye,
Jakob naawufan Esawu hímpuul niŋ kisaak.
Esawu naali naalaan.
Apipa naakaay,
putumoo pineetaat ti híhampaatiinate ha hiteyoo.
Isaak epuukoo nkáyankii,
Esawu náalafi leema,
payetaliyoo ti elampa hikee hinoom naasok Jakob.
Unam pili ti kisaak ka kéecunke enke,
peep efipumukam.
Jakob naañahanoo:
Noomaanam híhampaatiinate ha hitii.
Esawu naasokoo:
Híhampaatiinate ha hitoom,
eyyeyme nafaa nihitaakaam?
Jakob naañahanoo:
Sintoolo fala.
Esawu naasintoolo;
toko naanoomane híhampaatiinate ha hiteyoo,
Jakob naawufanoo apili.
Isaak epuukoo nkáyankii,
Esawu náalafi leema,
payetaliyoo ti elampa hikee hinoom naasok Jakob.
Unam pili ti kisaak ka kéecunke enke,
peep efipumukam.
Jakob naañahanoo:
Noomaanam híhampaatiinate ha hitii.
Esawu naasokoo:
Híhampaatiinate ha hitoom,
eyyeyme nafaa nihitaakaam?
Jakob naañahanoo:
Sintoolo fala.
Esawu naasintoolo;
toko naanoomane híhampaatiinate ha hiteyoo,
Jakob naawufanoo apili.
Isaak epuukoo nkáyankii,
Esawu náalafi leema,
payetaliyoo ti elampa hikee hinoom naasok Jakob.
Unam pili ti kisaak ka kéecunke enke,
peep efipumukam.
Jakob naañahanoo:
Noomaanam híhampaatiinate ha hitii.
Esawu naasokoo:
Híhampaatiinate ha hitoom,
eyyeyme nafaa nihitaakaam?
Jakob naañahanoo:
Sintoolo fala.
Esawu naasintoolo;
toko naanoomane híhampaatiinate ha hiteyoo,
Jakob naawufanoo apili.