Efantu 28
Hipoñuyee ha hiti Jakob pati Laban
28
Isaak naayonkal Jakob naasampanoo naawufanoo hilim eehe:
“Timpi sa aal ti púmaacul pa pakati Kanaan.
2 Kaay Mesopotami pati Petuwel,
íññaa atii faafoo,
sa po,
ti púmaacul pa pakati áasiyi Laban.
3 Alímaati Pútuun pa piti sempe sa púlooŋ pisampani,
mpuwufani epuuk keemeeŋe aakati yénoonii maamaa ati hícump písii.
4 Alímaati puwuni kaasampan enka mpisampane ka Abraham,
awe niŋ miin ma mitii,
ancuk aacoopaa mah emma ankine ma temmo nii akaawoola,
mah emma Pútuun pa mpuwufane ma Abraham.”
5 Fiyuu Isaak naasoke Jakob akaay Mesopotami pati Laban,
añii ya ati Petuwel eekine ya ti mah ma miti Alam.
Laban ahoopoo Rebeka ayem íññaa ati Jakob niŋ Esawu.
6 Esawu náasi nii Isaak asampanaa-sampan Jakob naapoñoo Mesopotami esa aal,
naalompo ási nii Isaak,
ti kaasampan ka Jakob,
naakitoo esa aal ti púmaacul pa pakati Kanaan.
7 Naacuk nii Jakob átuulaatuul faafoo niŋ íññaa ateyoo naakaay Mesopotami.
8 Esawu náapannum nii faafoo asayanut púmaacul pa pakati Kanaan.
9 Fiye,
naakaay pati Ismayel,
Abraham añiinoo,
naasa añiinoo ámaacul aŋa nkasok Mahalat,
Nepayot ahoopoo,
apinanf ti pakaaloo.
Eyáwut ya eti Jakob
10 Ti oom caanak,
Jakob náaful Beerseba apuwant Halan.
11 Ta naacole ta lakeenaay naasiiŋo kati aŋot kaatuko cicokaacok.
Naacoop énankiin ti pínankiin pa peeyem pa toko naahinto naanaŋ teyyo hikawoo naaŋot.
12 Ti hiŋotu eehuu,
náayawut naacuk ésiluma eesiiŋiye ti etaam ya,
patiila eteyyo neecol patiila útiŋu wa.
Pumaleekoo piti Pútuun pa mpiyeno pisilo niŋ éwanoonii teyyo.
13 Patiila ésiluma eyyuu Ateeteyo naasiiŋo naasok:
“Inci yem Ateeteyo,
Pútuun pa piti maamaa atii Abraham niŋ faafi Isaak.
Inci fawufani niŋ miin ma mitii etaam eyya anhintiye ya teyyo.
14 Keesokuu maamaa efikameeŋ samat nii esiya ya,
mah ma miteyii efimipenanee pan óo pan:
pa caanak ca íncifulii pa puwant pa incinow pa,
epees yáali puwant epees yaamay.
Písii pa púlooŋ piti etaam ya efipisampanee pínapii ti awe niŋ keesokuu maamaa.
15 Inci oopa niŋ awe,
fafaasi pan óo pan ankaaye,
fáñahaniyi ti etaam eyye.
Etikatani taamanta hínut eeha inci íyyinananuu ha.”
Inci yem Ateeteyo Pútuun pa piti maamaa atii Abraham niŋ faafi Isaak - Inci fawufani niŋ miin ma mitii etaam ya eyya anhintiye ya teyyo.
Ti hiŋotu náayawut naacuk ésiluma eesiiŋiye ti etaam ya patiila eteeho neecol patiila útiŋu wa.
Inci yem Ateeteyo Pútuun pa piti maamaa atii Abraham niŋ faafi Isaak - Inci fawufani niŋ miin ma mitii etaam ya eyya anhintiye ya teyyo.
Pumaleekoo Pútuun pa mpiyeno pisilo niŋ éwanoonii teeho;
patiila ésiluma eyyuu Ateeteyo naasiiŋo naasok.
Inci yem Ateeteyo Pútuun pa piti maamaa atii Abraham niŋ faafi Isaak - Inci fawufani niŋ miin ma mitii etaam ya eyya anhintiye ya teyyo.
Ti hiŋotu náayawut naacuk ésiluma eesiiŋiye ti etaam ya patiila eteeho neecol patiila útiŋu wa.
Inci yem Ateeteyo Pútuun pa piti maamaa atii Abraham niŋ faafi Isaak - Inci fawufani niŋ miin ma mitii etaam ya eyya anhintiye ya teyyo.
Pumaleekoo Pútuun pa mpiyeno pisilo niŋ éwanoonii teeho;
patiila ésiluma eyyuu Ateeteyo naasiiŋo naasok.
Inci yem Ateeteyo Pútuun pa piti maamaa atii Abraham niŋ faafi Isaak - Inci fawufani niŋ miin ma mitii etaam ya eyya anhintiye ya teyyo.
16 Ta Jakob náayiyoonii ta ti hiŋotu ha hiteyoo naasokoolo:
“Pánipani,
Ateeteyo oopa le,
inci pánnumut.”
17 Naafe naasok:
“Le,
féyanani-féyanani!
Ekumpaan ya eti Pútuun pa niŋ putum pa piti patiila.”
18 Eti kacom eteyyo mpucom mic,
Jakob naacoop énankiin ya eyya naanaŋe ya teyyo hikawoo,
naasiiŋan yo epiyeno lánkamaasi,
naaniis patiila eteyyo miyoomeen.
19 Naalu toko caacaw ca Petel (ekina eyem “ekumpaan ya eti Pútuun pa”) caacaw eteyyo hínum Lus.
20 Jakob naasintoolo ti Pútuun pa naasok:
“Niŋ Pútuun pa efipiyeno niŋ inci,
mpifaasam ti kaakaawool ka kutoom mpuwufanam paliyal niŋ pásooliyal,
21 niŋ inci ñohiyaa pati ekumpaan ya eti faafam ti kásuumaay,
ooto Ateeteyo afaayeno Pútuun pa putoom.
22 Enánkiin ya eyya inci insiiŋane ya lánkamaasi,
efeeyeno ekumpaan ya eti Pútuun pa.
Aŋa awwufanaam ya púlooŋ,
inci fawufani himpaac hoonool ti kimpaac ŋaasuwan.”