Efantu 21
Hipukuyee ha hiti Isaak
21
Ateeteyo naatah kunuuwoo ti Sara samat nii fa naasokoo fa,
náahinoo eeha náayinananoo ha.
2 Sara naasa munow,
Abraham ti himaamanoo,
náapukiyoo ciñii cikampaani ti caanak enca Pútuun pa mpíyinananoo ca.
3 Ciñii enca Sara naapukoo ca,
Abraham naalu co caacaw ca Isaak.a
4 Ta añiinoo Isaak naataake ta kunoom isak niŋ káhaaciil,
Abraham naanakanoo samat nii fa Pútuun pa mpusokoo fa.
5 Abraham ti sitiiloo keme (100) Isaak naapukee.
6 Sara naasok:
“Pútuun pa puwasaam caalenken,
an óo an éesiye eeha mpíhinaam ha afaalenken niŋ inci.”
7 Púful toko naasok:
“Ayme ayina hisoku Abraham nii hikee hinoom Sara áfaacuuwan epuuk?
Pale inci pukoopuk cikampaani ti himaamanoo.”
Pútuun puwasaam caalenken - ee - inci ti himaamanam - ee - inci ti himaamanam.
Sara naasa munow ti himaamanoo náapukii cikampaani.
Pútuun puwasaam caalenken - ee - inci ti himaamanam - ee - inci ti himaamanam.
Sara naapuk co Abraham naalu co Isaak.
Pútuun puwasaam caalenken - ee - inci ti himaamanam - ee - inci ti himaamanam.
An óo an éesiye eeha mpíhinaam ha,
afaalenken n’inci.
Pútuun puwasaam caalenken - ee - inci ti himaamanam - ee - inci ti himaamanam.
Hiyaanuyee ha hiti Hakal niŋ Ismayel
8 Isaak náayankii,
Sara náafulanoo ti káacuu.
Hinoom eehuu Abraham náahin pahaaño penfakat.
9 Sara naacuk Ismayel,
añii ya aŋa Hakal ati Esipt a naapuke ya Abraham,
ti káapalahool niŋ caalenken Isaak.
10 Fiye Sara naasok Abraham:
“Yaan amiikan a aŋuu niŋ añiinoo!
Añiinoo átayini pípaacinool hisaanumate ha hitii niŋ añiinam Isaak.”
11 Kilim enkuu nkuwas Abraham kúnuul kenfakat kamma Ismayel lompo naayem añiinoo.
12 Pale Pútuun pa mpusokoo:
“Timpi liim kiti añii ya niŋ amiikan a atii.
Hín eeha púlooŋ Sara naasokuu ha.
Kaatuko ti Isaak aafataak miin emma inci íyyinananuu ma.
13 Inci fáhin lompo añii ya ati amiikan a atii maamaa ati síi kaatuko akina lompo añiini.”
14 Eti kacom eteyyo mpucom mic Abraham naacoop kúmpuul niŋ kapaŋ kúwasuma man naameeŋan ko,
naanaŋ ko ti káapanti Hakal náawutakanoo añiinoo náafulanii lateyoo.
Hakal naayeno kaamuumuusool ti káahaaŋ ka tes kiti Beerseba.
15 Ta man ma immipaye ta ti kapaŋ ka naayenan añii ya t’etaam cinuun.
16 Púful toko naayeno pílaaŋ máamun pawantal hiŋaaceen náapaho,
naasokoolo:
“Inci yinaat kaasincan añiinam ti eket.”
Naayeno pukooŋ.
17 Pútuun pa mpísi pakooŋal añii ya,
hilim ha hiti maleekoo ya eti Pútuun pa níhifulii patiila,
nihiyonkal Hakal nihisokoo:
“Hakal,
weyme utaakiye?
Timpi fe,
kaatuko Pútuun pa písiyaasi añii ya ti pukooŋ la naahintiye la.
18 Lito incaalitan añii ya incokoo t’epees kaatuko inci fáhin apiyeno maamaa ati síi enfakat.”
19 Púful toko,
Pútuun pa mpípankin ñíkin Hakal naaŋantan ésaapun.
Náacaameeŋanii kapaŋ ka kiteyoo naawufan añii ya apilaan.
20 Fiye,
Pútuun pa mpiyeno niŋ añii ya ta naayeniye ta éyankii ti káahaaŋ tes,
naayeno aleemaya ati hiŋaaceen.
21 Naakin ti káahaaŋ ka tes kiti Palan,
íññaa ateyoo naawufanoo aal ati mah ma miti Esipt.
Písiyool pa piti Abraham niŋ Apimelek
22 Ti caanak encuu,
amansa ya Apimelek niŋ Fikol,
áhampaatiin a ati pusoocaali pa pakateyoo,
nkákey nkasok Abraham:
“Pútuun pa umpa niŋ awe ti waah óo waah ewwa ánhine.
23 Fiye sintoolo hátikin Pútuun pa nii áatiful ti inci,
ti epuukam niŋ ti epuukam papukalii.
Inci yenaayeno eenape ti awe,
awe lompo wen niŋ panap ti inci niŋ ti pakati mah ma emma ankine ma temmo nii akaawoola.”
24 Abraham naañahanoo:
“Inci sintooliyaa.”
25 Pale,
Abraham naawatan Apimelek kamma ésaapunoo eyya pimiikan Apimelek nkalame.
26 Apimelek naañahanoo:
“Inci míit ayme áhine eehuu,
aataapala sokam,
pásiyalam eteeho umpe fíyooy.”
27 Fiye,
Abraham naacoop písaacii,
pifil niŋ síis naawun po Apimelek.
Poko t’ésupakii nkaliil písiyool.
28 Abraham naayenan ti kaapii miyaan mísaacii isak niŋ músupak.
29 Apimelek naasok Abraham:
“Miyaan mísaacii ma isak niŋ músupak ma emma ayyenane ma ti kaapii,
miti weyme?”
30 Naañahanoo:
“Káluma,
coop mo mípiyisan nii aacoonaacoon nii inci wake ésaapun ya.”
31 Ekina ewune nkalu toko caacaw ca Beersebab (ekina eyem “ésaapun eti esintoolo”).
Kaatuko poko t’ésupakii toko nkasintooliye.
32 Papayalii hiliilu písiyool pa piteyii Beerseba,
Apimelek niŋ Fikol,
áhampaatiin a ati pusoocaali pa pakateyoo,
nkañoho ti mah ma miti pakati Filistin.
33 Abraham naasuk timpiŋ ti mah ma miti Beerseba naaluum toko ti caacaw Ateeteyo,
Pútuun pa piti cancowiyaaw.
34 Naakampan ti mah ma miti pakati Filistin.