Efantu 20
Abraham niŋ Apimelek
20
Abraham náaful toko naahiiŋ ti káahaaŋ ka tes kiti Nekep.
Naacaakin ti pututa Kates niŋ Sul,
púful toko naacaayeno Kelal.
2 Ta naayeniye ta po,
Abraham nasok tan óo tan pakan paka nii aaloo Sara ahoopoo.
Ekina ewune Apimelek amansa ya ati Kelal naapoñ kápucoopiyoo Sara.
3 Fiye,
Pútuun pa mpíyawutan Apimelek niŋ hánant,
mpusokoo:
“Aafaket kamma aal a aŋa áncoopii ya,
kaatuko eenimiye.”
4 Pale Apimelek aloot ahinto neyoo,
naañahan po:
“Pútuun,
inci niŋ pakanam úhinut waah,
háati fo aafamuk unii?
5 Ayíin a faŋoo asokaam nii,
ahoopoo.
Aal a lompo naasok nii,
ahoopoo.
Pámiiloolalam peewalla sipeesam insikuul ta inci iyyeniye ta íhinu eehuu.”
6 Pútuun pa mpiñahanoo ti éyawut ya:
“Méyimeyi nii ti pámiiloolal peewalla ánhine eehuu,
ekina ewune inci inkiti hílikuyoo ancuk aatimuuyen ti inci.
7 Fiye,
ñahan aal a ti áyiinoo kaatuko ayaamakoola,
afaaluum kitii,
aafaloŋ.
Pale naañahanutoo,
méyi nii aafaket awe niŋ miin ma mitii púlooŋ.”
8 Cipilap,
Apimelek naalito mpucom mic,
naayonkal píhina pa pakateyoo púlooŋ naakamanii heetaakiyoo ha,
poko púlooŋ nkafe meemak.
9 Fiye,
Apimelek náayonkalii Abraham naasokoo:
“Weyme ánhine unii fiye?
Enkeyme kaamuuyen inci immuuyene ti awe aakati wun inci niŋ cáwii ca citoom nuunako ti kaamuuyen kenfakat?
An añaŋut íhinu eeha ánhinaam ha!”
10 Apimelek nene acakan Abraham:
“Weyme uwune ánhin eehe?”
11 Abraham naañahanoo:
“Míiloolaa-míilool nii pakan paka pakati le kafeyut Pútuun pa,
efikamukam kamma aalam.
12 Apan pánipani ahoopam,
faaf nuukufe ukufut íññaa,
fiye náayenoonii aalam.a
13 Ta Pútuun pa mpusokaam ta inci katan ekumpaan ya eti paapaa atoom iyyeno kaatootoosool,
insok aalam:
'Ehe fiye aññaŋe káyisan nii áalafiyaamlafi:
pan óo pan immaakaayaa insok nii inci ahoopi.'”
14 Púful toko,
Apimelek naacoop písaacii,
pifil,
síis niŋ pimiikan pákayiin niŋ pakaal naawun po Abraham naañahanoo aaloo Sara.
15 Apimelek naasokoo:
“Mah ma mutoom umma hátikini,
kin lan óo lan la súumuu.”
16 Púful toko naasok Sara:
“Inci ufanaa ahoopi sikoofali wúli;b
hínaahin eehuu píyisan pakani nii aakuulaakuul,
áahinut waah weenaput.”