Efantu 19
Káapucaloolee ka kiti Sotom niŋ Komola
19
Simaleekoo sa súsupak sa insicol Sotom nkániim.
Tempo,
Lot naayeno ti híkon ti putum saatee ya.
Emma naacukii ma naalito apicaapaakoolanii náakilipo puhooŋuyoo t’etaam.
2 Púful toko naasokii:
“Inci luume aluu,
niponket níkey niwanan lati inci amiikan a ataaluu.
Efíniyini puñowu woot aluu inniŋot;
kacom mpucom mic,
innihankan pítin pa piti aluu.”
Pumaleekoo pa mpiñahan Lot:
“Haani,
efuuŋot ti híliŋ ha hiti saatee ya.”
3 Pale Lot naaŋiiniyii meemak fo kacoon.
Fiye nkakaay lateyoo.
Naamemanoolii paliyal,
naasowii kúmpuul keetaakut leweño,
púful toko nkali.
4 Peelokot kahinto,
pákayiin paka púlooŋ pakati saatee ya nkákinkool ekumpaan ya eti Lot,
písik ti akampaani fo ti kaahaan.
5 Nkayonkal Lot nkasokoo:
“Unkey,
pákayiin paka kéenakoonii ka leti awe nkániim ke?
Fúlaniyii upuhinto neyii!”
6 Lot náafulii naasiiŋo ti putum pa naapank hunkut ha pusonoo.
7 Naasokii:
“Niponket,
aluu pákawiyam,
timpi níhin heenaput eehuu!
8 Inci oopa taake púmaacul pákasupak kéemiit áyiin,
inci púcoopiyii nípihinii eeha ínnilafiye ha.
Pale timpi níhin pákayiin paka payenke waah kaatuko ti sipeesam nkayem.”
9 Nkañahanoo:
“Fúl le!”
Nene kasok:
“Nisincan akaawoola ya aŋe,
fiye náalafi piyeno áhina kíiti letuunaa!
Efúuhini pihaŋ paseeñ pákayiin paka payenke.”
Nkahalap Lot niŋ sempe nkaloh hunkut ha kati kahaat ho.
10 Pale pumaleekoo pa mpípankin hunkut ha,
mpíñak Lot pipinakanoo páhantuwa mpipank.
11 Mpúfuuman pákayiin paka púlooŋ keeyeniye ka ti putum pa,
písik ti añii fo ti áhampaatiin,
ancuk étikayini hicuku hunkut ha.
12 Simaleekoo sa súsupak sa insisok Lot:
“Pakayme pakan antaake le?
An óo an aŋa antaake le ti saatee ya samat nii pakaasoni,
epuuki pikampaani niŋ púmaacul,
fúlanii,
13 kaatuko unii káapucalool eteyyo nuukaakaay.
Ateeteyo ásiyaasi hinookuyee ha henfakat ha hiti saatee eyye ekina ewune mpúpoñii unii káapucalool eteyyo.”
14 Fiye,
Lot náaful apikaasok pakaasonoo keeñaŋe ka esa púmaacul pa pakateyoo:
“Nihiliikan nípiful ti saatee eyye kaatuko Ateeteyo káapucalool eteyyo naakaakaay!”
Pale pakaasonoo incukii nii Lot pahaaño naayeniye.
15 Nuulap,
pumaleekoo pa mpiŋiino Lot apikaay,
mpusokoo:
“Lito coop aali niŋ púmaacul pa pákasupak paka pakatii ínniful le,
niŋ ekina tom efiniket niŋ pakati saatee ya.
Ee,
éfikapucaloolee kamma heenaput ha eeha nkáhine ha.”
16 Pale Lot naayeno kaakuuteen;
fiye,
pumaleekoo pa mpucokoo ti epees niŋ aaloo niŋ púmaacul pa pákasupak paka pakateyoo mpúfulanii tíkitaaŋ saatee ya,
kaatuko Ateeteyo ataakaataak paket hikaw ti Lot.
17 Ta mpúfulanii ta tíkitaaŋ,
yoonool tempo neesok Lot:
“Tey aapifakan eloŋi,
timpi welep puson,
timpi lompo siiŋo lakeenaay.
Tey fo pati pítintiŋ pa náalafiit eket.”
18 Lot naañahan yo:
“Haani étiyini Ahámpaatiin!
19 Aataakaataak paket hikaw ti inci amiikan a atii uwwen niŋ panap penfakat ti inci aapifakan eloŋam.
Pale inci étiyini katey fo pati pítintiŋ pa le niŋ áafahin hítaapanu eehuu,
efiket.
20 Aacukaacuk cisaatee ence?
Cílaaŋut fáyini katey fo toko piyolo tenco,
cifomut,
apan inci fafak.”
21 Maleekoo ya neesokoo:
“Iyyoo inci fáhin eeha alluume ha,
étipucalool cisaatee encuu.
22 Pale hiliikan caayolo tenco kaatuko étiyini íhinu waah taamanta aacolut.”
Po hátikin nkalu cisaatee ca caacaw ca Sowal,
ekina eyem “cenkilis”,
kaatuko Lot asok:
“Cifomut”.
23 Ta caanak ca inciyeniye ta éfulii,
Lot naacol Sowal.
24 Fiye,
Ateeteyo náanupanii ti Sotom niŋ Komola etiil eti seemak niŋ kíceek.
25 Náapucalool sisaatee sa súsupak sa niŋ etaam ya púlooŋ éekinkoolii ya,
niŋ pakan paka niŋ waah óo waah weeŋante toko.
26 Pale Lot aaloo naawelep puson,
himuumoo nihiyeso hisiin hiti micempanu.
Lot aaloo naawelep puson - himuumoo nihiyeso hisiin hiti micempanu.
Lito coop aali niŋ púmaacul pa pakatii,
ínniful le niŋ ekina tom efiniket.
Lot aaloo naawelep puson - himuumoo nihiyeso hisiin hiti micempanu.
Pumaleekoo pa mpucokoo ti epees niŋ aaloo niŋ epuukoo mpúfulanii tíkitaaŋ saatee ya.
Lot aaloo naawelep puson - himuumoo nihiyeso hisiin hiti micempanu.
Tey fakan eloŋi timpi siiŋo lakeenaay timpi lompo welep puson.
Lot aaloo naawelep puson - himuumoo nihiyeso hisiin hiti micempanu.
27 Ti oom hinoom,
Abraham naalito mpucom mic naakaasiiŋo la naasiiŋiye la hínum hátikin Ateeteyo.
28 Naasincan kaapii ka kiti Sotom niŋ Komola niŋ etaam ya púlooŋ éekinkoolii ya naacuk háaputa nihisilosilo pucuk nii seemak senfakat.
29 Fiyuu Pútuun pa mpúpucaloole pisaatee pa piti etaam ya éekinkoole ya han ha hiti Jordan,
pifiilut Abraham mpifakan Lot ti káapucalool ka kiti pisaatee pa la Lot naakine la hínum.
Lot niŋ púmaacul pa pakateyoo
30 Lot náaful Sowal naasilo kati akin ti pítintiŋ pa niŋ púmaacul pa pákasupak paka pakateyoo,
kaatuko afeyaafe piyeno Sowal.
Naacaakin neyii ti kaayeen kenfakat ti tíntiŋ.
31 Fiye,
ámaacul a áhampaatiin a naasok kahiineen ka:
“Paapaa ataanii amaamanaa-maaman,
áyiin ataakiit ti mah emme kati maanimiyaa samat nii fa ínhinee fa pan óo pan.
32 Kéy,
maawufanaa paapaa ataanii elaan immaahintiyaa neyoo kati maataakaa miin méefulii teyoo.”
33 Hánant eehuu,
nkawufan paapaa ateyii elaan,
áhampaatiin a naahinto niŋ paapaa ateyoo,
Lot ápannumut heetaakiye ha ta ámaacul a ateyoo naahintiye ta neyoo fo alito.
34 Eti kacom eteyyo áhampaatiin a naasok kahiineen ka:
“Inci hintaahinto niŋ paapaa ataanii hánant ha heemuuse ha.
Nene maawufanoo elaan hánant eehe incaahinto neyoo ancuk maataakaa miin méefulii teyoo.”
35 Hánant eehuu nkawufan paapaa ateyii elaan,
kahiineen ka nkihinto neyoo.
Lot nene ápannumut heetaakiye ha ta ámaacul a ateyoo naahintiye ta neyoo fo alito.
36 Fiye,
púmaacul pa pákasupak paka pakati Lot nkasa munow miti paapaa ateyii.
37 Po hátikin,
áhampaatiin a naapuk cikampaani naalu co caacaw ca Mowap (ekina eyem “éefulii ti paapaa”):
akina ayem paapaa ya ati pakati Mowap fo fíyooy.
38 Kahiineen ka lompo nkupuk cikampaani nkulu co caacaw ca Pen-Ammi (ekina eyem “añii ati miin ma mutoom”):
akina ayem paapaa ya ati pakati Ammon fo fíyooy.