Efantu 18
Káyinanan ka kiti Abraham nii afaataak añii akampaani
18
Ateeteyo náayisanoolo ti Abraham pukol punuun pa peesampanee pa piti Mamule.
Tempo Abraham naayeno ti putum pa piti ékuut ya eteyoo,
caanak ca ti kikaw.
2 Naasincan naacuk pákayiin pákahaaciil nkasiiŋiye hátikinoo naatey apipaakoolanii náakilipo puhooŋuyoo t’etaam.
3 Naasok oonool ti poko:
“Ahámpaatiin,
luumuu timpi muusam,
inci amiikan a atii.
4 Káluma,
nítuul kápucoopii aluu man nipiñow woot aluu niŋ fúlaa toko ínniyekunoolo t’etaam enuun eyye.
5 Inci púcoopii aluu paliyal nipili ancuk nitaakaa sempe siti kaahankan pítin aluu,
páawoo níkeyyookey ti inci amiikan a ataaluu.”
Nkañahanoo:
“Iyyoo napaanap,
hín samat nii fa ansoke fa.”
6 Fiye,
Abraham naawaaf pati ékuut ya eteyoo,
naasok Sara:
“Hiliikan niik siniiku síhaaciil senfakat ti efol ya eehaŋe ya panap,
aapimemanool kúmpuul.”
7 Púful toko Abraham naatey pati koolee ya eteyoo naacok cíciin ceeluuke naawufan co akee amiikan apimemanool co mpacas.
8 Ta efoofa ya neeyike ta,
Abraham naawufan yo ekaawoola ya niŋ miin niŋ feenee.
Naasiiŋo pukolii t’etaam enuun ya,
ekaawoola ya nkayeno hili.
9 Nkacakanoo:
“Aali Sara uwwey?”
Naañahanii:
“Oopa pati ékuut ya.”
10 Akee teyii naasokoo:
“Pulay ti caanak ence inci fáñohoonii,
tempo aali afaataak cikampaani.”
Sara naayeno ti putum ékuut ya puson Abraham ti káasiitan.
11 Abraham niŋ Sara keemaamane,
Sara naamuus hitaaku añii.
12 Sara naayeno caalenken faŋoo naasok:
“Inci kaahaan enke,
malla faleñam ti áyiin apan áyiinam lompo eemaamane.”
13 Fiye,
Ateeteyo naasok Abraham:
“Weyme uwune Sara naalenken naasok:
'Fo pánipani inci fáyini hitaaku añii pamaamanal?'
14 Fo taakaataak waah weeheeke inci Ateeteyo?
Pulay ti caanak ence fáñohoonii,
Sara afaataak cikampaani.”
15 Sara náalaacin ti hisoku:
“Inci lenkenut” kaatuko afeyaafe.
Ateeteyo naasokoo:
“Pánipani aalenkenaa-lenken!”
Pulay ti caanak ence inci fáñohoonii tempo aali afaataak - ee - cikampaani - Akee teyii naasokoo Sara pásiyaloo Sara naayeno caalenken - ha - ha - yee - puume fataak añii pamaamanal?
Kaluum ka kiti Abraham kiti saatee ya eti Sotom
16 Púful toko,
pákayiin paka nkalito kati kakaay.
Nkacok pítin pa piti saatee ya eti Sotom Abraham naayeniyii kátiŋan.
17 Ateeteyo naasok:
“Láfiit hiyolu Abraham eeha inci nkaakaay ha íhinu.
18 Kaatuko Abraham áfaayenoonii maamaa ati síi enfakat neetaak sempe,
apan pínapii teyoo fasampan písii pa púlooŋ piti etaam ya.
19 Inci mamaloo kati awufan hilim epuukoo niŋ keesokoo maamaa kati kacok pítin pa putoom nkawen pucoonool niŋ kaalehanool.
Ancuk inci ufanaa Abraham eeha inci íyyinananoo ha.”
20 Fiye,
Ateeteyo naasok Abraham:
“Hinookuyee ha hiti pakati Sotom niŋ Komola hifomaafom,
umuuyen wa uteyii núunapi meemak.
21 Puwano picaasincan man eeha nkanookii ha fo hícolii ti inci heetaakiye niŋ fotom inci fámeyi.”
22 Ta Ateeteyo naapaye ta káakup,
pákayiin paka pákasupak paka nkahiiŋ Sotom.
Pale Abraham naatowo naasiiŋiye hátikin Ateeteyo.
23 Abraham naateeŋo pati Ateeteyo naasokoo:
“Fo pánipani aafamuk ti coonool keecoonoole ka niŋ keemuuyene ka?
24 Iyyema po Sotom taakaa pakan áwii ésupak niŋ ŋaasuwan (50) keecoonoole,
fo pánipani áafapucalool saatee ya?
Fo aatiponket yo kamma áwii ésupak niŋ ŋaasuwan ya keecoonoole ka keekine ka po?
25 Haani áatiyini íhinu eehuu!
Aapumuk ti coonool keecoonoole ka niŋ keemuuyene ka!
Incok keecoonoole ka nii keemuuyene ka,
eehuu hiyinaat pitaako!
Fo áhina kíiti ya ati etaam ya púlooŋ átahin heecoonoole?”
26 Ateeteyo naasokoo:
“Niŋ inci tookaa pakan áwii ésupak niŋ ŋaasuwan keecoonoole ti saatee ya eti Sotom inci faponket saatee ya púlooŋ kamma poko.”
27 Abraham nene asokoo:
“Ponketam Ahámpaatiin a atoom,
inci háañiye káakup niŋ awe,
inci eeneetaat a likee fo niŋ fúlaa etaam niŋ píiha.
28 Iyyema keecoonoole ka pakan áwii ésupak niŋ isak (45) me?
Fo áafapucalool saatee ya púlooŋ kamma isak ya?”
Ateeteyo naañahanoo:
“Etípucalool saatee ya niŋ inci tookaa toko pakan áwii ésupak niŋ isak keecoonoole.”
29 Abraham nene asokoo:
“Iyyema me pakan áwii ésupak (40) kayem toko?”
Ateeteyo naañahanoo:
“Kamma áwii ésupak ya étipucalool saatee ya.”
30 Abraham nene asok:
“Ahámpaatiin a atoom,
inci luumuu timpi ñíken pale katampo púkup.
Iyyema me pakan áwii niŋ ŋaasuwan (30) kayem toko?”
Ateeteyo naañahanoo:
“Niŋ inci tookaa po pakan áwii niŋ ŋaasuwan keecoonoole étipucalool saatee ya.”
31 Abraham naasok:
“Ponketam Ahámpaatiin a atoom,
inci háañiye káakup niŋ awe.
Iyyema me pakan áwii kayem toko?”
Ateeteyo naañahanoo:
“Kamma áwii ya étipucalool saatee ya.”
32 Abraham naasok:
“Ahámpaatiin a atoom,
inci luumuu timpi ñíken pale katampo púkup pikelanam umpe.
Iyyema me pakan ŋaasuwan kayem toko?”
Ateeteyo naañahanoo:
“Kamma ŋaasuwan ya étipucalool saatee ya.”
33 Ta Ateeteyo naapaye ta káakup niŋ Abraham naakaay,
Abraham naañoho pateyoo.