Efantu 17
Hiluwuyee ha hiti Abram caacaw ca Abraham
17
Ta Abram naataake ta sitiil áwii epaakiil niŋ kaat niŋ sipaakiil (99),
Ateeteyo náayisanoolo teyoo,
naasokoo:
“Inci yem Pútuun pa piti sempe sa púlooŋ.
Hín héesuumaam niŋ heecoonoole tan óo tan.
2 Inci faliil písiyool ti pututayam niŋ awe,
ínhin keesokuu maamaa kapimeeŋ fo muus.”
3 Abram náakilipo puhooŋuyoo t’etaam,
Pútuun pa mpusokoo:
4 “Ehe písiyool pa putoom niŋ awe:
aafayeno faaf ati písii peemeeŋe.
5 Caacawi etineciyeno Abrama pale aafasokee Abraham (ekina eyem 'faaf ati pakan keemeeŋe') kaatuko inci fáhini faaf ati písii peemeeŋe.
6 Keesokuu maamaa efikameeŋ meemak,
efikayeno písii peemeeŋe,
pumansa efikapukee teyii.
7 Inci fasiiŋan písiyool pa putoom niŋ awe niŋ epuuki niŋ epuuki epuukii ti ekaay óo ekaay.
Písiyool empuu efipisiiŋo fo eket maama,
inci iyyeno Pútuun pa pitii niŋ piti keesokuu maamaa keekaakaay ka ékey po hátikin.
8 Inci fawufani mah ma miti Kanaan la ayyem la fiye samat nii akaawoola,
fawufani mah emmuu púlooŋ,
awe niŋ keesokuu maamaa,
éfimiyenoonii miteyii fo eket maama inci iyyeno Pútuun pa piteyii.”
Píyisan pa piti písiyool pa
9 Pútuun pa nene pusok Abraham:
“Awe niŋ epuuki niŋ epuuki epuukii ti ekaay óo ekaay fo nítuul písiyool pa putoom.
10 Ehe písiyool pa putoom niŋ awe niŋ epuuki niŋ keesokuu maamaa:
áyiin óo áyiin afaanakanee.
11 Háakum eehuu ti siniin aluu efihiyeno píyisan pa piti písiyool pa putoom niŋ aluu.
12 Cikampaani óo cikampaani eficinakanee niŋ citaakaa kunoom isak niŋ káhaaciil ti ekaay óo ekaay.
Innakan lompo keekufut ka ti miin ma mitii:
pimiikan pa keepukee ka lati awe niŋ payenka ánnoomii ka pállaaŋe.
13 Poko púlooŋ kañaŋee kanakan,
pimiikan pa keepukee ka ti ekumpaan ya etii niŋ payenka annoome ka niŋ mañi.
Fiyuu písiyool pa putoom efipiyeno háakum ti siniin aluu,
písiyool peepayantoo.
14 Ayíin óo áyiin eenakanutee afaayaanee ti pakanoo kaatuko átuulut písiyool pa putoom.”
Písiyool pa piti Pútuun niŋ Abraham niŋ epuukoo niŋ keesokoo maamaa.
Ti ekaay óo ekaay cikampaani óo cikampaani eficinakanee niŋ citaakaa kunoom isak niŋ káhaaciil.
Písiyool pa piti Pútuun niŋ Abraham niŋ epuukoo niŋ keesokoo maamaa.
Ti ekaay óo ekaay cikampaani óo cikampaani eficinakanee niŋ citaakaa kunoom isak niŋ káhaaciil.
Písiyool pa piti Pútuun niŋ Abraham niŋ epuukoo niŋ keesokoo maamaa.
Ayíin óo áyiin eenakanutee afaayaanee ti pakanoo kaatuko átuulut - ee - písiyool pa piti Pútuun.
Hiluwuyee ha hiti Saray caacaw ca Sara
15 Pútuun pa nene pusok Abraham:
“Timpi neeyonkal aali Saray,
písik fíyooy caacawoo Sara.b
16 Inci fasampanoo naapuki añii akampaani.
Inci fasampanoo naayeno íññaa ati kayoŋ písii,
pumansa pakati písii peemeeŋe efikapukee ti keesokoo maamaa.”
17 Abraham náakilipo puhooŋuyoo t’etaam naayeno caalenken ti esokoolo:
“Fo áyiin ati sitiil keme áfaayini hitaaku añii?
Fo Sara áfaayini hitaaku añii,
akina pataakal sitiil áwii epaakiil niŋ ŋaasuwan (90)?”
18 Fiye,
Abraham naasok Pútuun pa:
“Fo aatikat Ismayel aputoon kaasampan enka áayinananaam ka nii aafawufanam?”
19 Pútuun pa mpiñahanoo:
“Haani,
Sara aali afaapuki cikampaani,
aakati lu co caacaw ca Isaak.c
Neyoo inci faliil písiyool pa putoom niŋ epuukoo niŋ keesokoo maamaa,
písiyool peepayantoo.
20 Síyaasi kaluum ka kitii kiti Ismayel,
inci fasampanoo uwwufanoo miin meemeeŋe fo muus,
keesokoo maamaa efikameeŋ meemak.
Afaayeno faaf ati pakati kikaw ŋaasuwan niŋ pákasupak naayeno maamaa ati síi enfakat.
21 Pale písiyool pa putoom,
inci fasiiŋan po niŋ Isaak,
añii ya aŋa Sara naakaakaay ya hipuku pulay ti caanak ence.”
22 Ta Pútuun pa mpipaye ta káakup niŋ Abraham mpikaay.
Pinako pa piti Abraham niŋ miin ma miteyoo
23 Ti oom hinoom Abraham naacoope añiinoo Ismayel niŋ pimiikan pa keepukee ka ti ekumpaan ya eteyoo niŋ pimiikan pa payenka naanoome ka.
Pákayiin paka púlooŋ pakati ekumpaan ya eteyoo nkanakanee samat nii fa Pútuun pa mpusoke fa.
24 Abraham ta naataake ta sitiil áwii epaakiil niŋ kaat niŋ sipaakiil (99) naanakiye.
25 Tempo añiinoo Ismayel naataake sitiil ŋaasuwan niŋ síhaaciil.
26 Abraham niŋ añiinoo nkanako ti hinoom eehuu,
27 niŋ pákayiin paka púlooŋ pakati ekumpaan ya eteyoo:
pimiikan pa keepukee ka lateyoo niŋ payenka naanoome ka.