Efantu 22
Hiyoopuyee ha hiti káyinan ka kiti Abraham
22
Po hátikin Pútuun pa mpiyoop káyinan ka kiti Abraham.
Mpiyonkaloo:
“Abraham!”
Abraham naañahan po:
“Eheeyam.”
2 Pútuun pa mpusokoo:
“Coop añiini Isaak,
añiini oonool a kóŋ aŋa állafiye ya fo muus,
nkaay ti mah ma miti Moliya ti tíntiŋ eyya inci nkaakaayi ya káyisan,
toko uwwaaseenamoo aapusowoo fo aleem.”
3 Eti kacom eteyyo,
Abraham naalito mpucom mic naahawalool miyaac ma miti kaawaaseen ka náayuuk mo ti fáli ya eteyoo,
naacoopool pákasupak ti píhina pa pakateyoo niŋ añiinoo Isaak lompo,
nkahiiŋ pa Pútuun pa mpusokoo pa.
4 Eti tílapooli eteyyo,
Abraham náahaafin naaŋantan tíntiŋ ya la naañaŋe la pikaayu.
5 Naasok píhina pa pakateyoo:
“Niyeno le niŋ fáli ya,
inci niŋ añiinam nuusilo patiila tíntiŋ eyya pa kaawaaseen Pútuun pa,
núupayiyoo núuñohoonii.”
6 Abraham naatiyan añiinoo Isaak miyaac ma miti kaawaaseen ka,
akina himuumoo naayekan seemak sa niŋ épila ya,
nkakaay poko t’ésupakii.
7 Ti oom pikaayu,
Isaak naasok Abraham:
“Paapaa?”
Abraham naañahanoo:
“Eeya sokam añiinam.”
Isaak naasokoo:
“Maataakaataak seemak niŋ miyaac pale sáacii ya eti kaawaaseen ka uyyey?”
8 Abraham naañahanoo:
“Añiinam,
Pútuun pa faŋ etempo efipuwufan sáacii ya eti kaawaaseen ka.”
Poko t’ésupakii nkayeno pikaayu.
9 Ta nkacole ta la Pútuun pa mpusokoo la,
Abraham naalut toko kaaciin naawas toko miyaac ma.
Naacenk añiinoo Isaak naanaŋoo ti kaaciin ka patiila miyaac ma.
10 Fiye,
naañaakan epeesoo naacoop épila ya kati ataaŋ añiinoo.
11 Ti oom káasiiŋuma,
hilim ha hiti maleekoo ya eti Ateeteyo níhifulii patiila nihiyonkaloo:
“Abraham,
Abraham!”
Abraham naañahan yo:
“Eheeyam.”
12 Neesokoo:
“Timpi lík añii ya,
timpi kuumoo!
Fiye inci meya nii aafeyaafe Pútuun pa kaatuko aapookutam kawufan añiini,
añiini oonool a kóŋ.”
13 Fiye,
Abraham náahaafin naaŋantan híceken sáacii,
usiin eteeho nuukalapatanoolo ti cisooy.
Náacoopii ho naawaaseen ho apusow ho fo hileem ti putum pa piti añiinoo.
14 Abraham naalu toko caacaw ca:
“Ateeteyo afaawufan”.
Ekina ewune fo fíyooy nkasok tan óo tan:
“Ti tíntiŋ ya eti Ateeteyo,
Ateeteyo afaawufan.”a
Coop añiini oonool a aŋa állafiye ya - waaseenamoo ti mah ma miti Moliya ti tíntiŋ ya eyya inci nkaakaayi ya káyisan aapusowoo fo aleem.
Paapaa maataakaataak seemak niŋ miyaac,
pale sáacii ya eti kaawaaseen ka uyyey?
Pútuun pa faŋ etempo efipuwufan sáacii ya eti kaawaaseen ka.
Coop añiini oonool a aŋa állafiye ya - waaseenamoo ti mah ma miti Moliya ti tíntiŋ ya eyya inci nkaakaayi ya káyisan aapusowoo fo aleem.
Paapaa maataakaataak seemak niŋ miyaac,
pale sáacii ya eti kaawaaseen ka uyyey?
Pútuun pa faŋ etempo efipuwufan sáacii ya eti kaawaaseen ka.
Coop añiini oonool a aŋa állafiye ya - waaseenamoo ti mah ma miti Moliya ti tíntiŋ ya eyya inci nkaakaayi ya káyisan aapusowoo fo aleem.
Paapaa maataakaataak seemak niŋ miyaac,
pale sáacii ya eti kaawaaseen ka uyyey?
Pútuun pa faŋ etempo efipuwufan sáacii ya eti kaawaaseen ka.
Coop añiini oonool a aŋa állafiye ya - waaseenamoo ti mah ma miti Moliya ti tíntiŋ ya eyya inci nkaakaayi ya káyisan aapusowoo fo aleem.
Paapaa maataakaataak seemak niŋ miyaac,
pale sáacii ya eti kaawaaseen ka uyyey?
Pútuun pa faŋ etempo efipuwufan sáacii ya eti kaawaaseen ka.
Coop añiini oonool a aŋa állafiye ya - waaseenamoo ti mah ma miti Moliya ti tíntiŋ ya eyya inci nkaakaayi ya káyisan aapusowoo fo aleem.
15 Hilim ha hiti maleekoo ya eti Ateeteyo nene hífulii patiila nihiyonkal Abraham púsupiyenu.
16 Nihisokoo:
“Ehe eeha Ateeteyo naasoke ha:
'Páawoo áatuulaamtuul aapookutam kawufan añiini,
añiini oonool a kóŋ,
inci sintooliyaa ti faŋam nii,
17 pánipani fasampani,
keesokuu maamaa efikameeŋ samat nii picaaŋaŋ pa,
niŋ esiya ya eti kaatii ka.
Keesokuu maamaa efikalam pisaatee pa piti pikamoolii.
18 Pínapii teyii,
písii pa púlooŋ piti etaam ya efipisampanee kamma ántuulaam.'”
19 Púful toko,
Abraham niŋ añiinoo nkañoho pati píhina pa pakateyoo.
Nkanapool kapuñoho Beerseba pa Abraham naakine pa.
Epuuk Nahol
20 Eehuu hipimuus,
Abraham náasi nii Miluka aal a ati Nahol Abraham atuwoo ataakaataak lompo epuuk pikampaani:
21 Us,
añii ya áyaañ a,
Pus atuwoo,
Kemuwel paapaa ati Alam,
22 Keset,
Haso,
Pilatas,
Yitalaf niŋ Petuwel.
23 Petuwel ayem paapaa ati Rebeka.
Payenkuu kayem epuuk ya isak niŋ pákahaaciil paka payenka Miluka naapuke ka Nahol,
Abraham atuwoo.
24 Nahol naataak aal ásupiyenu,
caacawoo Leyuma.
Naapuk lompo epuuk,
nkasokee Tepah,
Kaham,
Tahas niŋ Maaka.