Efantu 17
Póol niŋ Silas ti saatee ya eti Tesalonik
17
Póol niŋ Silas nkanap ti pisaatee pa piti Anfipoli niŋ Apoloni,
nkacol Tesalonik.
Intaako toko éluumuma eti Pusuwif.
2 Póol naakaay po samat nii fa naasale fa íhinu pan óo pan pa naakaaye.
Fo sílookuŋ síhaaciil ti hinoom ha hiti kayeno ka hiti Pusuwif pa,
nákupat neyii hiti pakiical pa piti Pútuun pa.
3 Naakamanii,
náayisanii nii,
Eenucee ya añaŋaa hicuku kúnuul kenfakat,
náalitoonii ti eket ya.
Naasokii:
“Yéesu aŋa inci iyyem ya aluu ti káatuunan ayem Eenucee ya.”
4 Pakakee Pusuwif nkáyinan nkananf ti Póol niŋ Silas.
Hícump keeneetaat Pusuwif kéetuule Pútuun niŋ hícump pakaal keemaka lompo nkananfii.
5 Pale pakakee Pusuwif nkataak paheeka teyii nkaconcoolan pakan keetaakut haaci payenka nkayeno ti ñítin ña nkanoŋan kayoŋ ka nkawen saatee ya.
Nkawaaf lati ekumpaan ya eti áyiin aŋa nkasok Sason hiŋes Póol niŋ Silas kati kacoopii pati híliŋ ha
6 pale kacukutii.
Nkacok Sason niŋ pakakee kéeyinane nkacoopii ti pakati kikaw ka pakati saatee ya nkayeno hiceeku:
“Póol niŋ Silas,
kéeyiyiŋane ka púlunta pa púlooŋ,
kácoliyoo le.
7 Sason awananii lateyoo.
Unka ti íhinu eeha Sesaal,
amansa ya enfakat a ati Room naakite ha:
hisoku nkayaake nii taakaataako akee amansa aŋa nkasok Yéesu.”
8 Kayoŋ ka niŋ pakati kikaw ka kápisi kilim enkuu nkaliim.
9 Fiye,
Sason niŋ kéeyinane ka nkahintan mañ nkakatanee.
Póol niŋ Silas ti saatee ya eti Peloy
10 Niŋ pacokal etenco,
kéeyinane ka nkapoñ Póol niŋ Silas ti saatee ya eti Peloy.
Kapucol,
nkanako lati éluumuma ya eti Pusuwif pa.
11 Pusuwif pa pakati toko nkahaŋ píyiyo pakati Tesalonik,
nkásiitan pitempo tak ekooŋan ya éesuume ya.
Hinak óo hinak nkasincan pakiical pa piti Pútuun pa kapucuk man eeha Póol nasokii ha hiti pánipani.
12 Hícump teyii nkáyinan.
Ti keeneetaat ka Pusuwif,
hícump pakaal keemaka niŋ lompo pakakee pákayiin nkáyinan.
13 Pale ta Pusuwif pa pakati Tesalonik nkásiye ta nii Póol oopa ti káatuunan hilim ha hiti Pútuun pa Peloy,
nkakaay po,
nkanoŋan kayoŋ ka fo kiliiñool.
14 Ti oom káasiiŋuma,
kéeyinane ka nkahaŋ ti hipoñu Póol ti kaatii.
Pale Silas niŋ Timote nkatowo Peloy.
15 Keecoope ka Póol nkakaay neyoo fo ti saatee ya eti Aten.
Púful toko,
nkañoho niŋ ekooŋan eti Póol ti Silas niŋ Timote eesokii nii katookoo Aten mpacas.
Póol ti saatee ya eti Aten
16 Ta Póol naayeniye ta hítuulu Silas niŋ Timote Aten,
naacuk nii saatee ya emeeŋaameeŋ pínaati,
ínciitiyoo meemak.
17 Naakaay ti éluumuma ya naayeno kákupat niŋ Pusuwif pa niŋ keeneetaat ka Pusuwif kéetuule ka Pútuun pa.
Hinak óo hinak nakaay lompo ti híliŋ ha hiti saatee ya kákupat niŋ keeyeniye ka toko.
18 Intaako toko pikalaŋana keeyeniye pílaacinool neyoo,
pakakee pinapana pakati Epikulus,
pakakee paka pinapana pakati Seno.
Teyii,
pakakee nkasok:
“Weyme eemeeŋe ya aŋe káakup náalafiye hisoku?”
Pakakee paka nkasok:
“Cukaacuk nii ñútuun ñiti pikee písii naayem ti káatuunan.”
(Kasokaasok eehe kamma Póol náatuunane ekooŋan ya éesuume ya eti Yéesu niŋ pilito pa ti eket ya.)
19 Fiye,
nkacoop Póol nkakaay neyoo ti híliŋ ha eeha nkasok ha Aleyopak,
la píhina kíiti ya pakati saatee ya nkapaakool la.
Keecoopoo ka nkacakanoo:
“Uyíniyini kameye héeyeeni eeha ayyem ha ti káatuunan?
20 Aapa ti káakup waah wéenime unii,
núulafi kameye weyme ayyem ti hisoku.”
21 (Ti oom caanak,
pakati Aten niŋ ekaawoola ya keekine ka toko kayekut hikee niŋ neetaat káakup niŋ káasiitan kéeyeeni ka keeyem ka ti pikaayu.)
22 Púful toko,
Póol naasiiŋo hátikin píhina kíiti ya pakati Aleyopak naasok:
“Aluu pakati Aten,
inci cukaacuk nii nísikaasik piliit tiw ti pínaati pa pitaaluu.
23 Kaatuko ta inci iyyeniye ta kaafiitanool saatee ya,
piyeno kaasincan uciin wa utaaluu,
cukaacuk koonool tewwo,
ehe heekiicee ha toko:
'Kaaciin enke kiti pútuun péemiitee.
' Aŋa ínnimiit ya inninimpan,
akina inci nkéyii káatuunan aluu.
24 Pútuun pa peeliile pa púlunta pa niŋ waah wa púlooŋ weeyem wa lupo,
pikina piyem Ateeteyo ati patiila niŋ t’etaam.
Pikinut ti pukumpaan empa pakan nkalute kati nkaluum po toko.
25 Pusoolahut kapimankool po pucuk fiye nii taakaataak waah ewwa mpitaakut.
Kaatuko pikina himuum etempo puwufane pakan paka púlooŋ eloŋ,
esuuŋut niŋ waah óo waah.
26 Ti púcook puu mpiliile an oonool.
Ti oom an mpinape mpiliil písii pa púlooŋ kati kakin lan óo lan ti púlunta pa.
Le niŋ efipiliilii,
pisiiŋanaa-siiŋan ta síi óo síi efeetaako niŋ ta efeekelana mpiniik pilehu la neeñaŋe la hikinu.
27 Pútuun pa píhinaahin eehuu ancuk pakan paka kati kaŋes po;
pikee pa ti hiŋes eehuu,
efikalaŋan po ti káamaaputool,
apan pílaaŋut an óo an tuunaa.
28 Kaatuko pikina puwune nuutaakaa eloŋ ya nuumuusoolaa,
nuutaakiyaa.
Fiye pakakee ti pikiica pa pakataaluu nkasoke:
'Unaa lompo epuuk etempo.'
29 “Páawoo unaa epuuk Pútuun,
uñaŋutaa káamiilool nii Pútuun pa pucukaacuk nii himuum heememanoolee niŋ sanoo,
mañ niŋ ekina tom énankiin:
waah ewwa an náamiiloole ti hikawoo naamemanool wo niŋ pasuuse sipeesoo.
30 Pútuun pa pifiyaafiyo mpitahut kunuu ti káameyaati enkuu.
Pale fiye,
puwufanaawufan hilim pakan paka púlooŋ pan óo pan kati káwunko umuuyen wa uteyii.
31 Kaatuko pisiiŋanaa-siiŋan hinoom eeha éfipihin kíiti púlunta pa pucoonool ciit pínapii ti an a aŋa mpimamale ya.
Mpíyisan eehuu picaaŋ cataŋ ti pakan paka púlooŋ,
ta mpílitaniyoo ta ti eket ya.”
32 Ta nkásiye ta pilito pa ti eket ya,
pakakee paka nkápalahooloo nkalenkenoo,
pale pakakee paka nkasok:
“Aakati ñóhoonii hikee hinoom upunene úsiitani teeho.”
33 Fiyuu Póol náafule ti oom káasiiŋuma.
34 Pale pakakee nkanapanoo nkáyinan.
Ti poko,
intaako áyiin caacawoo Denis,
akee ti píhina kíiti ya pakati Aleyopak,
niŋ akee aal caacawoo Tamalis niŋ pakakee lompo.
Puwufanaawufan hilim pakan paka púlooŋ pan óo pan kati káwunko umuuyen wa uteyii - ee - ee - ee.
Unaa epuuk Pútuun uñaŋutaa káamiilool nii,
Pútuun pa pucukaacuk nii himuum heememanoolee niŋ sanoo.
Puwufanaawufan hilim pakan paka púlooŋ pan óo pan kati káwunko umuuyen wa uteyii - ee - ee - ee.
Unaa epuuk Pútuun uñaŋutaa káamiilool nii,
Pútuun pa pucukaacuk nii himuum heememanoolee niŋ sanoo.
Puwufanaawufan hilim pakan paka púlooŋ pan óo pan kati káwunko umuuyen wa uteyii - ee - ee - ee.