Efantu 11
Kañahan ka kiti Piyeer kéeyinane ka pakati Jerusalem
11
Pupoñapoñ pa niŋ kéeyinane ka keekine ka ti mah ma miti Judaay nkási nii pakakee ti keeneetaat ka Pusuwif kasayanaasayan lompo hilim ha hiti Pútuun pa.
2 Ta Piyeer naacole ta Jerusalem,
Pusuwif pa kéeyinane ka nkawatanoo
3 ti hisoku:
“Aakaayaakaay pati keeneetaat ka Pusuwif,
illi lompo neyii apan kanakiit ti písiyool empa Pútuun mpiliile pa niŋ maamaa atuunaa Abraham!”
4 Fiye,
Piyeer naakamanii heetaakiye ha púlooŋ kápiliŋ ti púcook.
Naasokii:
5 “Ta inci iyyeniye ta ti saatee ya eti Yope piyeno kaluum,
waah núufulii ti inci pucuk fiye nii éyawut iyyaake.
Incuk waah wéefulii patiila úpuhiiŋii peti inci,
weecuke nii kahuuy kenfakat,
sitonkoŋ sa sipaakiil sa insiŋuntee.
Kahuuy enkuu nkíkey pukolam.
6 Insincan lupo pinap,
incuk púlukuleen piti woot upaakiil niŋ púlukuleen piti elampa niŋ empa mpúhuunoolo,
niŋ pusuwa.
7 Fiye,
ínsi hilim heeyeniyaam hisoku:
'Piyeer,
lito!
Muk illi!'
8 Pale iññahan ti hisoku:
'Hitaakiit,
Ateeteyo!
Kaatuko efoofa eyya hilim ha heesiiŋanee ha nihikite hili ti hisoku nii ekuulut etaapala enako ti putumam.'
9 Hilim ha níhifulii patiila nene hisokam púsupiyenu:
'Waah ewwa Pútuun pa mpukuulane,
timpi sok nii ukuulut.'
10 Eehuu nihitaako fo ñáhaaciil,
púful toko,
eehuu púlooŋ nihicoopee patiila.
11 Ti oom káasiiŋuma,
pákayiin pákahaaciil kéefulii ti saatee ya eti Sesaale kéepoñiyee ti inci,
nkácolii ti ekumpaan ya la nuuyeniye la.
12 Kunuu ka keenape ka nkusokam napool neyii timpi taak kunuu kúsupak.
Kéeyinane ka isak niŋ oonool a payenke nkanapanam,
nuunako lati ekumpaan ya eti áyiin a eeyonkalaam ya.
13 Naasok unii puume naacuke maleekoo néenakoonii lati ekumpaan ya eteyoo neesokoo:
'Poñ pakan ti saatee ya eti Yope kapica káyonkalii Simon aŋa nkasok ya Piyeer.
14 Afaasoki kilim keekaakaayi kafakan,
awe niŋ miin ma mitii púlooŋ.'
15 Emma inci íncooke ma káakup Kunuu ka keenape ka nkúwanoonii teyii samat nii fa nkúwanoonii fa ti unaa ti púcook pa.
16 Fiye,
inci ínnawuno eeha Ateeteyo mpaasok ha:
'Saŋ ápatiseyaa-pátise pakan paka niŋ man pale aluu éfinihinee pátise niŋ Kunuu ka keenape ka.'
17 Híinihiini nii,
kawun enka Pútuun pa mpuwufane ka unaa ta núuyinanaa ta ti Ateeteyo Yéesu Krista,
kikina lompo mpuwufane keeneetaat ka Pusuwif.
Fiye,
inci yem ayme kati yíni hikitu Pútuun pa eeha mpílafiye ha?”
18 Ta nkásiye ta eehuu,
nkatempan.
Nkámul Pútuun pa ti hisoku:
“Fiye,
keeneetaat ka Pusuwif lompo,
Pútuun pa puwufaniiwufan la éfikasik kati káwunko umuuyen wa uteyii,
nkataak eloŋ ya eepayantoo ya.”
Kéeyinane ka pakati Antiyok
19 Pamuusal eket ya eti Stíifan,
kéeyinane ka nkakallanee fo nkahancooliye.
Pakakee teyii nkatey fo ti mah ma miti Fenisi,
pakakee paka fo ti econ ya eti Siip,
pakakee paka lompo fo ti saatee ya eti Antiyok,
nkayeno káatuunan ekooŋan ya éesuume ya,
pale ti Pusuwif pa lamma.
20 Háati ekina,
intaako teyii kéeyinane pakati Siip niŋ Silen keekaaye Antiyok nkayeno káatuunan ekooŋan ya éesuume ya eti Ateeteyo Yéesu keeneetaat ka Pusuwif.a
21 Sempe sa siti Ateeteyo insiyeno neyii,
hícump pakan nkáyinan nkánanfii ti Ateeteyo.
22 Kéeyinane ka pakati Jerusalem nkási eehuu.
Fiye,
nkapoñ Barnabas Antiyok.
23 Ta naacole ta naacuk kaasampan ka kiti Pútuun pa,
ínsuumoo.
Naapenanii kunuu ti hisokuyii kásik piliit tiw ti Ateeteyo niŋ saanii púlooŋ,
24 kaatuko Barnabas an eenape,
naameeŋ niŋ Kunuu ka keenape ka naataak káyinan kenfakat.
Hícump pakan nkananf ti Ateeteyo.
25 Púful toko,
Barnabas naakaay ti saatee ya eti Taas hiŋes Sóol.
26 Ta naacukoo ta naacoopoo Antiyok.
Nkayeno po etiil púmpuluŋ niŋ kéeyinane ka,
nkakalaŋan hícump pakan.
Po Antiyok pinapana pa nkáyaañee kayonkalee Pikelecen.
27 Ti kunoom enkuu,
piyaamakoola nkáfulii Jerusalem nkakaay Antiyok.
28 Oonool teyii caacawoo Akapus naalito,
Kunuu ka keenape ka nkútunkoo apusok nii efitaak épankul enfakat ti mah ma púlooŋ.
(Pánipani eehuu nihitaako ta Kulot naayeniye ta amansa ya enfakat a ati Room.)
29 Fiye,
pinapana pa nkasok nii efikawufan waah,
an óo an la naayina,
ewwa efikapoñ kati kayankanan kéeyinane ka keekine ka ti mah ma miti Judaay.
30 Hikina nkáhine:
nkawufan wo Barnabas niŋ Sóol,
nkasokii cakawufan ñíhampaatiin ña pakati kéeyinane ka keeyem ka ti saatee ya eti Judaay.