Efantu 10
Eyísanoolo ya eti maleekoo ya ti Kooneli
10
Intaako ti saatee ya eti Sesaale áyiin aŋa nkasok Kooneli,
áhampaatiin asoocaali ati kayoŋ ka kiti pusoocaali pa pakati Room,
kayoŋ ka enka nkasok ka “Kayoŋ ka kiti Itali”.
2 Ayíin eewufane meemak eloŋ ya eteyoo Pútuun pa naafe po,
akina niŋ miin ma miteyoo,
nayankanan Pusuwif pa keeleke ka,
naluum po tan óo tan.
3 Hikee hinoom,
kaapii kiti sitalaŋ síhaaciil nkániim,
maleekoo ya eti Pútuun pa néefulii teyoo pucuk fiye nii éyawut,
naacuk yo picaaŋ cataŋ néenakoonii ti ekumpaan ya eteyoo,
neesokoo:
“Kooneli!”
4 Naasincan yo niŋ ewatate naañahan yo:
“Weyme utaakiye,
Ahámpaatiin?”
Maleekoo ya neesokoo:
“Pútuun pa pisayanaasayan kaluum ka kitii,
pifiilut lompo kayankanan ka enka ánhin ka ti keeleke ka.
5 Fiye,
poñ pakan ti saatee ya eti Yope kapica káyonkalii Simon aŋa nkasok ya Piyeer.
6 Oopa awanane lati Simon apaalaha ya,
ekumpaan ya eteyoo néeyemi pukol kaatii ka.”
7 Ta maleekoo ya neekaaye ta,
Kooneli náayonkalii pákasupak ti pimiikan pa pakateyoo niŋ akee ti pusoocaali pa píhina pa pakateyoo.
Asoocaali aŋuu,
áyiin eewufane meemak eloŋ ya eteyoo Pútuun pa.
8 Naakamanii heetaakiye ha púlooŋ;
púful toko naapoñii Yope,
nkañak.
Eeha Piyeer naacuke ha
9 Eti kacom eteyyo,
máamun caanak ca ti kikaw,
pimiikan pa pákasupak paka niŋ asoocaali ya nkalohan saatee ya eti Yope.
Tempo,
Piyeer naasilo patiila ekumpaan ya kaluum.a
10 Peep mpucokoo náalafi hili.
Ta nkayeniye ta kaamemanool paliyal pa,
waah núufulii teyoo pucuk fiye nii éyawut naayaake.
11 Naacuk patiila mpánkiniye,
waah núufulii po weecuke nii kahuuy kenfakat keecenkee ti sitonkoŋ sa sipaakiil sa,
nkúwananiyee pukoloo.
12 Toko páhantuwa etenko intaako élukuleen óo élukuleen eti woot upaakiil,
eyya néhuunoolo niŋ pusuwa.
13 Hilim nihisokoo:
“Piyeer,
lito!
Muk illi!”
14 Pale Piyeer naañahan ti hisoku:
“Hitaakiit,
Ateeteyo!
Kaatuko inci taapala li efoofa eyya hilim ha heesiiŋanee ha nihikite hili ti hisoku nii ekuulut.”b
15 Hilim ha nene hisokoo púsupiyenu:
“Waah ewwa Pútuun pa mpukuulane,
timpi sok nii ukuulut.”
16 Eehuu nihitaako fo ñáhaaciil,
tokotoko kahuuy ka nkíseepinee patiila.
Pútuun pa píyisanaam-yísan nii - inci ñaŋut fiye hicoku an nii akuulut.
Píyisan mpúfulii ti Piyeer,
naacuk patiila mpánkiniye.
Pútuun pa píyisanaam-yísan nii - inci ñaŋut fiye hicoku an nii akuulut.
Waah núufulii po weecuke nii kahuuy kenfakat nkúwananiyee pukoloo.
Pútuun pa píyisanaam-yísan nii - inci ñaŋut fiye hicoku an nii akuulut.
Púlukuleen niŋ pusuwa púlooŋ umpa páhantuwa etenko.
Pútuun pa píyisanaam-yísan nii - inci ñaŋut fiye hicoku an nii akuulut.
Piyeer,
lito muk illi!
Naapook ti hisoku nii pukuulut.
Pútuun pa píyisanaam-yísan nii - inci ñaŋut fiye hicoku an nii akuulut.
Waah ewwa Pútuun mpukuulane,
timpi sok nii ukina ukuulut!
Pútuun pa píyisanaam-yísan nii - inci ñaŋut fiye hicoku an nii akuulut.
17 Piyeer naayeno káamiilool hiti eeha naacuke ha.
Ti oom káasiiŋuma,
pákayiin paka payenka Kooneli naapoñe ka nkacol ti putum pa,
loho kacakanoolaa ekumpaan ya eti Simon.
18 Nkayonkal nkacakan:
“Fo le Simon aŋa nkasok ya Piyeer naawanane?”
19 Piyeer naaloŋ ti káamiilool hiti eeha naacuke ha,
Kunuu ka keenape ka nkusokoo:
“Sincan,
pákayiin pákahaaciil unka nkacakani.
20 Fiye,
lito uwwano nkaay neyii timpi taak kunuu kúsupak kaatuko inci póñiyii.”
21 Piyeer náawanoonii,
naasokii:
“Eheeyam,
inci inniyem ti hiŋes,
weyme ínnikeyii?”
22 Nkasokoo:
“Kooneli ápoñii unii,
áhampaatiin asoocaali,
áyiin eecoonoole naafe Pútuun,
Pusuwif pa púlooŋ nkákup teyoo heenape.
Maleekoo ya eti Pútuun pa éfulii teyoo neesokoo ayonkali pati ekumpaan ya eteyoo kati ásiitan eeha ankaakaay hisoku.”
23 Fiye,
Piyeer naasokii kánakoonii naawananii.
Piyeer pati Kooneli
Eti kacom eteyyo,
Piyeer naanapool neyii,
pakakee ti kéeyinane ka pakati Yope nkanapanii.
24 Eti tanta eteyyo,
naacol ti saatee ya eti Sesaale,
Kooneli naayeno hítuulu écolii ya eteyii.
Naaconcoolan miin ma miteyoo niŋ pákawiyoo keekoloo ka meemak.
25 Piyeer niŋ panakiyaloo ti ekumpaan ya,
Kooneli naapaakoolanoo,
náakilipo ti wootoo naanimpanoo.
26 Pale Piyeer naalitanoo,
naasokoo:
“Lito inci lompo an kenseŋ.”
27 Akina ti káakup niŋ Kooneli,
naanako páhantuwa,
naacuk kayoŋ ka nkuconcooliye,
28 naasokii:
“Aluu faŋ aluu nímeyimeyi nii hilim ha heesiiŋanee ha hitoonii hicoonut unii Pusuwif upunakanoolo niŋ keeneetaat ka Pusuwif;
uyinaatii ékey hiyoop.
Pale Pútuun pa píyisanaam-yísan nii,
inci ñaŋut fiye hicoku an nii akuulut.
29 Ekina ewune emma ínniyonkaliyaam ma inci nkéy peetaakut kunuu kúsupak.
Weyme ínniyonkaliyaam?”
30 Kooneli naasokoo:
“Kunoom kíhaaciil keemuuse ti sitalaŋ síhaaciil ense inci iyyeniye kaluum ti ekumpaan ya etoom.
Tokotoko,
an eewasiye wañ weehiina paŋ naasiiŋo hátikinam,
31 naasokam:
'Kooneli,
Pútuun pa písiyaasi kaluum ka kitii,
pifiilut lompo kayankanan ka enka ánhin ka ti keeleke ka.
32 Fiye,
poñ pakan ti saatee ya eti Yope kápiyonkalii Simon aŋa nkasok ya Piyeer.
Oopa awanane lati Simon apaalaha ya,
ekumpaan ya eteyoo néeyemi pukol kaatii ka.'
33 Ekina ewune inci inhaŋ hipoñu ti awe,
ánhin heenape áapikey.
Fiye,
ehe unii púlooŋ hátikin Pútuun pa,
kati úsi eeha púlooŋ mpuwufanuu ha aakati sok unii.”
34 Piyeer naacoop hilim ha naasok:
“Inci meya fiye nii pánipani Pútuun pa pifisakanoolut pakan paka,
35 pale ti písii pa púlooŋ,
Pútuun pa pisayanaasayan an óo an eefeye po náahin heecoonoole.
36 “Nímeyimeyi nii Pútuun pa púpoñiyoopoñ ti pakati Israyel ekooŋan ya éesuume ya eti kásuumaay ka kéenapii ka ti Yéesu Krista,
eeyem ya Ateeteyo ati pakan paka púlooŋ.
37 Nímeyimeyi heetaakiye ha,
púcook ti mah ma miti Galilee niŋ heetaakiye ha lompo ti mah ma miti Judaay púlooŋ.
Eehuu púlooŋ nihitaako pamuusal pátise ya eyya Saŋ naayeniye ya káatuunan.
38 Nímeyimeyi lompo fa Pútuun pa mpimamale fa Yéesu ati Naasalet mpíhin Kunuu ka keenape ka kúpuwanoonii teyoo,
mpuwufanoo lompo sempe.
Yéesu naayeno kaamuusool ti pisaatee pa náahin heenape,
náakuuñan payenka Seetaani néewuuliye ka kaatuko Pútuun pa piyenaayeno neyoo.
39 “Unii uyem keetantake ka eeha náahine ha púlooŋ Jerusalem niŋ ti pikee pisaatee pa piti Pusuwif pa.
Nkamukoo ta nkapempeŋoo ta ti kuluwaa ya,c
40 pale ti hinoom ha híhaaciyenu ha Pútuun pa mpilitanoo ti eket ya.
Mpíhin ápiyisanoolo.
41 Ayísanooliit ti pakan paka púlooŋ pale ti keetantake ka payenka Pútuun pa mpimamale ka ta infiyye,
poko kayem unii.
Unii uliye nuulaan neyoo ta náalitoonii ta ti eket ya.
42 Naasok unii ukaman pakan paka eeha nuucuke ha,
núutuunanii nii,
akina Pútuun pa mpisiiŋane apiyeno áhina kíiti ya ati keeyem ka kaloŋa niŋ keekete ka.
43 Piyaamakoola pa púlooŋ kákupaakup kiteyoo ti hilim ha hiti Pútuun pa,
nkasok nii an óo an éeyinane ti Yéesu,
ti caacawoo Pútuun pa efipuponket umuuyen wa uteyoo.”
Ewánoonii ya eti Kunuu ka keenape ka ti keeneetaat ka Pusuwif
44 Piyeer ti káakup kilim enke,
Kunuu ka keenape ka nkúwanoonii ti keeyeniye ka púlooŋ káasiitan hilim ha,
45-46 nkáyaañ káakup niŋ pikee pikaŋ nkayeno hímulu Pútuun pa.
Pusuwif pa kéeyinane kad kéenapoolii ka niŋ Piyeer,
ta nkásiye ta eehuu ínnimii kamma Pútuun pa mpuwufane keeneetaat ka Pusuwif lompo Kunuu ka keenape ka.
Fiye,
Piyeer naasok:
47 “Páawoo Kunuu ka keenape ka kúwanooniyoo-wano teyii samat nii fa nkúwanoonii fa ti unaa Pusuwif pa,
ayme ayina hikituyii íhinuyee pátise niŋ man?”
48 Naawufan hilim kati káhinee pátise ti caacaw ca citi Yéesu Krista.
Púful toko,
nkaluum Piyeer apiyeno neyii fo kikee kunoom.
Ti písii pa púlooŋ Pútuun pa pisayanaasayan an óo an eefeye po náahin heecoonoole.
Yéesu Pútuun pa mpisiiŋane apiyeno áhina kíiti ya eti keeloŋe ka niŋ keekete ka.
Ti písii pa púlooŋ Pútuun pa pisayanaasayan an óo an eefeye po náahin heecoonoole.
An óo an aŋa éeyinane teyoo,
afaasa ti caacawoo kaaponket ka.
Ti písii pa púlooŋ Pútuun pa pisayanaasayan an óo an eefeye po náahin heecoonoole.
Kunuu Keenape ka nkíwanoonii ti an óo an,
háni keeneetaat ka Pusuwif.
Ti písii pa púlooŋ Pútuun pa pisayanaasayan an óo an eefeye po náahin heecoonoole.