Páhin pa piti Pupoñapoñ pa
Efantu 1
Yéesu niŋ pupoñapoñ pa pamuusal pilito pa piteyoo
1
Teyofil eñaap ya,
ti pakiical pa putoom píyaañ pa inci kamanaakaman eeha púlooŋ Yéesu náacooke ha áhin naakalaŋan
2 fo ti hinoom eeha naasilanee ha patiila.
Aséepinumee,
naawufan pitiyo payenka naamamale ka kapiyeno pupoñapoñ ti sempe sa siti Kunuu ka keenape ka.
3 Pamuusal kúnuul ka fo ti eket ya eteyoo ínnayisanoolo teyii ápiyisanii picaaŋ cataŋ nii oopa kaloŋa.
Kunoom áwii ésupak (40) ápinafulii teyii náakupii kiti cáwii ca citi Pútuun pa.
4 Hikee hinoom,
ta naayeniye ta hili neyii naasokii:
“Timpi níful Jerusalem,
pale nítuul eeha Paapaa ya náayinanane ha nii afaawufan ho aluu,
kawun enka inci íntuunane ka aluu.
5 Kaatuko Saŋ ápatiseyaa-pátise pakan paka niŋ man pale le niŋ kunoom éfinihinee pátise niŋ Kunuu ka keenape ka.”
Pisilo pa piti Yéesu hátikin pupoñapoñ pa pakateyoo
6 Fiye,
keeyeniye ka niŋ Yéesu nkayeniyoo kacakan:
“Ateeteyo,
fo tokofiye ankaakaay éñahanii cáwii ca citi Israyel?”
7 Yéesu naañahanii:
“Nisoolahut kameye teyme niŋ eeheyme hinoom enkuu fiye púlooŋ nkikaakaay ékey.
Paapaa atuunaa asiiŋane ho akina lamayoo ataake kayine kiti kaasiiŋan eteeho.
8 Pale aluu,
ta Kunuu ka keenape ka nkikaakaay ta éwanoonii ti aluu,
efinisa sempe.
Fiyuu,
aluu keetantake ka eloŋ ya etoom,
innikaakaay káakup kutoom ti saatee ya eti Jerusalem,
ti mah ma miti Judaay púlooŋ niŋ Samali,
niŋ pan óo pan ti púlunta pa.”
9 Ta naapaye ta káakup eehe,
naasilanee patiila ti ñíkin pupoñapoñ pa pakateyoo.
Púful toko,
káatiŋu nkiyoloo,
nekacukutoo.
10 Pale akina ti pikaayu pa,
nkatowo ti kaasincan táh patiila.
Tokotoko,
pákayiin pákasupak keewasiye wañ weehiina nkasiiŋo pukolii.
11 Nkasokii:
“Aluu pakati Galilee,
weyme innitowiye le ti kaasincan patiila?
Yéesu aŋe,
eecoopee ya taaluu naasilanee patiila,
samat nii fa innicukoo fa naakaaye,
fo lompo naakaakaay éñohoonii.”
Nísiitan fa naasiliye fa patiila fo áfaañohoonii.
Ta naapaye ta káakup naasilanee patiila ti ñíkin pupoñapoñ pa pakateyoo.
Nísiitan fa naasiliye fa patiila fo áfaañohoonii.
Káatiŋu nkiyoloo nekacukutoo pale ti pikaayu pa nkasincanoo patiila.
Nísiitan fa naasiliye fa patiila fo áfaañohoonii.
Aluu pakati Galilee oome innitowiye le ti kaasincan?
Nísiitan fa naasiliye fa patiila fo áfaañohoonii.
Kayoŋ ka kiti pupoñapoñ pa
12 Fiye,
pupoñapoñ pa nkáfulii pati cítintiŋ ca enca nkasok ca cítintiŋ ca citi Olif,
nkañoho Jerusalem.
Láaŋoolut niŋ saatee ya eti Jerusalem.a
13 Ta nkacole ta nkasilo ti ékaap ya la nkasale la piyeno.
Keeyeniye ka toko kayem Piyeer,
Saŋ,
Saak niŋ Andre,
Filip niŋ Tomas,
Paatolomaay niŋ Máciya,
Saak ati Alifaay,
Simon aŋa nkasok ya Selotb niŋ Yutas ati Saak.
14 Poko púlooŋ nkacokool piliit tiw nkásiyool ti kaluum tan óo tan,
poko niŋ pakaal paka niŋ Mari Yéesu íññaa ateyoo niŋ Yéesu pakatuwoo.
Kamamalee ka kiti Maciyas apinanf pupoñapoñ pa
15 Hikee hinoom,
kéeyinane ka nkaconcool máamun keme niŋ áwii (120).
Piyeer naasiiŋo naasokii:
16 “Aluu pakanam ti káyinan,
eeha Kunuu ka keenape ka nkútuunane ha ta infiyye ti pakiical pa piti Pútuun pa fo hitaako:
nkúkup ti putum amansa ya Dawid kiti Judas,
éenowii ya hátikin kéekeyii ka hicoku Yéesu.
17 Judas oonool hínum tuunaa,
naayeno lompo páhin nuunaa.”
18 (Mañ emma nkacooyoo ma ápihin heenaput eehuu naacoope apunoom kaakit,
toko naanowe hikawoo hipiya,
eniinoo néefap,
niñowoo ínnilutoonii.
19 Eehuu,
pakati Jerusalem púlooŋ kásiyaasi ho ekina ewune nkasok kaakit enkuu “Hakeletama” ti kaŋ ya eteyii,
ekina eyem “Kaakit kiti hísim”.)
20 Piyeer nene asok:
“Kiiceekiic ti pakiical pa piti kícimu ka nii:
'Alímaati ekumpaan ya eteyoo ekatanee,
álimaati an timpi akin teyyo.
'c
“Nkiicee lompo nii:
'Alímaati akee atoon páhin pa piteyoo.'d
21-22 “Ooto,
fo akee ánanfii toonii kati akaman lompo pilito pa piti Ateeteyo Yéesu.
Oom áyiin añaŋaa éfulii ti payenka nkanapool ka niŋ unii tan óo tan ta nuuyeniye ta kaamuusool ti mah ma niŋ Ateeteyo Yéesu,
písik ta Saŋ náahinoo ta pátise fo ta náaseepinee ta toonii.”
23 Ta Piyeer naapaye ta káakup,
nkácoopii pákayiin pákasupak:
Josef aŋa nkasok ya Palasapas,
nkayonkaloo lompo Yustus,
niŋ Maciyas.
24 Púful toko,
kayoŋ ka nkuluum fiye:
“Ateeteyo,
awe meya saan pakan paka,
yísan unii ayme ti poko t’ésupakii ammamale
25 apiyeno apoñapoñ naacoop páhin empa Judas naakate pa le apite akaay pa naañaŋe pa piyeno.”
26 Nkañak kaakaaw nkucok Maciyas apinanf pupoñapoñ pa ŋaasuwan niŋ oonool a.