Páhin pa piti pupoñapoñ pa
Waah wa weeyem wa ti púkoo eyye
Ti Páhin pa piti pupoñapoñ pa, Luk áyiin a aŋa nkasok ya Teyofil naayeniye hikiicu ápiyisanoo heetaakiye ha písik ti pisilo pa piti Yéesu alacana fo ti hikuluyee ha hiti apoñapoñ a Póol Room: eehuu púlooŋ nihitaako ti máamun sitiil 30. Yéesu ásilumo, naapoñ pupoñapoñ pa pakateyoo kaahancalool ekooŋan ya éesuume ya, neetaat ti Pusuwif pa lamma pale focaa ti keeneetaat ka Pusuwif niŋ ti púlunta pa púlooŋ. Náayinananii nii Pútuun pa efipuwufanii Kunuu ka keenape ka, mpuwufan ko lompo an óo an éeyinane ti Yéesu.
Ti oom caanak, pakati Room kayekanaayekan mah meemeeŋe fo Israyel, mah ma miti Pusuwif pa. Páawoo ñíhampaatiin Pusuwif pa kálafiit pupoñapoñ pa káputuunan ti caacaw ca citi Yéesu, payenkuu nkakallanii fo kéeyinane ka nkahancooliye pan óo pan ti púlunta pa. Háati fo, nkatowo ti káatuunan ekooŋan ya éesuume ya, nkayeno lompo íhinu weecukantee niŋ káakuuñan. Kéeyinane ka nkayeno épenanoyii meemak kamma Kunuu ka keenape ka nkiyankananii.
Kikee kilim
An ati Room: Ayem an óo an aŋa ammeya nii, hilim ha heesiiŋanee ha hiti amansa ya enfakat a ati Room híkinkanoo-kínkan. Amansa óo amansa enfakat ati Room nasokee Sesaal.
Asuwif: Pusuwif pa pakati miin ma miti Abraham. Pútuun pa pimamalii mpiliil písiyool neyii. Ayíin óo áyiin Asuwif anakanee (Falans kaŋ nkasok “circoncis”, Ankale kaŋ nkasok “circumcised”, Emantiŋ ya nkasok “surna”) ápiyisan nii oopa ti písiyool empuu. Yéesu niŋ pinapana pa pakateyoo, Pusuwif.
Kunuu ka keenape ka: Kikina kiyem kunuu ka kiti Pútuun pa.
Fa púkoo ya neekiicee fa:
1:1-26 Ememanoolo ya eti pikaayu káatuunan ekooŋan ya éesuume ya.
1:1-14 Eeha Yéesu naakelane ha ti hisoku.
1:15-26 Aŋa eetoone ya páhin pa piti Judas.
2:1–8:3 Káatuunan ka kiti ekooŋan ya éesuume ya Jerusalem.
8:4–12:25 Káatuunan ka kiti ekooŋan ya éesuume ya Judaay fo Samali.
13:1–28:31 Káatuunan ka kiti ekooŋan ya éesuume ya pan óo pan ti púlunta pa.
13:1–14:28 Kaakaawool ka kiti Póol kíyaañ ka.
15:1-35 Pucukool pa peetaakiye pa Jerusalem.
15:36–18:22 Kaakaawool ka kiti Póol kúsupiyenu ka.
18:23–21:17 Kaakaawool ka kiti Póol kíhaaciyenu ka.
21:18–28:31 Hikuluyee ha hiti Póol Jerusalem, Sesaale niŋ Room.