Páhin 2

Efantu 2

Ewánoonii ya eti Kunuu ka keenape ka ti kéeyinane ka

Ta pahaaño pa piti Pentekos mpútuuniye ta, kéeyinane ka ti Yéesu púlooŋ nkayeno nantoonool. 2 Tokotoko pahampanane mpúfulii patiila samat nii pasapal hiyam heehiñe. Pahampanane empuu mpimeeŋan ekumpaan ya púlooŋ eyya nkayeniye ya teyyo. 3 Ti oom káasiiŋuma, waah núufulii teyii weecuke nii kíleeluuf kiti seemak, nkihancaloolo nkinaŋo ti an óo an teyii. 4 Poko púlooŋ nkameeŋ niŋ nkáyaañ káakup niŋ pikee pikaŋ samat nii fa Kunuu ka keenape ka nkuwufanii fa.

Kéeyinane ka púlooŋ kameeŋaameeŋ niŋ Kunuu ka Keenape ka.

Pahampanane mpimeeŋan ekumpaan ya púlooŋ.

Kéeyinane ka púlooŋ kameeŋaameeŋ niŋ Kunuu ka Keenape ka.

Kíleeluuf kiti seemak nkinaŋo ti an óo an teyii.

Kéeyinane ka púlooŋ kameeŋaameeŋ niŋ Kunuu ka Keenape ka.

Nkahaŋ káakup niŋ pikee pikaŋ peeneetaat piteyii.

Kéeyinane ka púlooŋ kameeŋaameeŋ niŋ Kunuu ka Keenape ka.

5 Fiye, intaako toko kéefulii ti mah ma púlooŋ miti nkayeno . Nkayeno pákayiin keefeye Pútuun. 6 Ta nkásiye ta pahampanane empuu, kayoŋ kenfakat nkuconcool. Innímii kamma an óo an teyii náasiye pinapana pa pakati Yéesu nkayeniye káakup ti híleeluufoo eeha náacuuwe ha. 7 Nkaŋaŋo ínnimii nkacakan: “Fo keeyem ka fiye púlooŋ ti káakup pakati Galilee tom? 8 Weyme uwune an óo an tuunaa púlooŋ náayemiyii ti hísiyu ti híleeluufoo eeha náacuuwe ha? 9 Unaa kéefuliyaa ka Paat, Meti niŋ Elam; pakan kéefulii Mesopotami, niŋ Kapatos; pakan kéefulii Pont niŋ Asii, 10 kéefulii Filiki niŋ Panfili, kéefulii niŋ misaatee ma miti Libiya meekole ma saatee ya eti Silen. Pakakee tuunaa nkáfulii , 11 Kilet niŋ Arabiya, pakakee paka Pusuwif, pakakee paka lompo keeyesane eloŋ ya eteyii nkananf ti pítin pa piti Pusuwif pa. Pale unaa púlooŋ núusiyii ti káakup ti kíleeluuf unaa enka núucuuwaa ka ti kakaman waah wa wenfakat wa weemeeŋe wa ewwa Pútuun pa mpíhine wa!” 12 Nkaliim meemak ínnimii, nkatowo ti ecakanoolo: “Eehe weyme níhiyisane?” 13 Pale pakakee paka nkápalahool kéeyinane ka ti Yéesu nkalenkenii nkasok: “Payenkuu kákumanaakuman!”

Káyisan ka kiti Piyeer ayme ayem Yéesu

14 Púful toko, naasiiŋo niŋ pa ŋaasuwan niŋ oonool a. Ti hiceeku, náayaañ káakup niŋ kayoŋ ka apusok: “Aluu pakanam pa niŋ aluu púlooŋ keekine ka nísiitanam pinap, inci pikaman aluu heeyem ha ti pitaako. 15 Pakan paka payenke kákumanut samat nii fa ínninunkoole fa, cicomaacomo. 16 Haani! Pale eehe ya Sowel náatuunane:

17 'Pútuun pa pusok: "Ti kunoom ka kikelan ka,

inci fawwufan kunuuwam an óo an.

Epuuk aluu pikampaani niŋ púmaacul efinkayaamakool ti caacawam,

uhiineen wa niŋ ñíhampaatiin ña pakataaluu éfinkayawut, nkacuk lompo waah pucuk fiye nii éyawut nkayaake.

18 Ee, háati pimiikan pa pakatoom, pákayiin paka niŋ pakaal paka,

inci fawwufanii kunuuwam ti kunoom enkuu,

efinkayaamakool ti caacawam.

19 Fáhin waah weecukantee nuucukee patiila,

ínhin hícump píyisan penfakat t’etaam.

Fataako hísim, seemak niŋ útiŋu uti háaputa.

20 Caanak ca éficinim,

hiim ha níhicunk nii hísim

le niŋ hinoom ha heemaka ha henfakat ha hiti Pútuun pa éfihicolii.

21 Tempo an óo an eeluume

ti caacaw Ateeteyo Pútuun pa afaafakanee."'

22 “Aluu pakati , nísiitan pinap eeha inci nkaakaay ha aluu hisoku: Yéesu ati Naasalet akina an aŋa innimeya nii Pútuun pa umpa neyoo kaatuko puwufanoowufan íhinu hátikin aluu waah wenfakat, hícump píyisan niŋ weecukantee samat nii fa innimeya wo fa aluu himuum aluu. 23 Yéesu aŋe acokeecok naawufanee aluu samat nii fa Pútuun pa mpílafiye fa, pikina peemeya pa eehuu púlooŋ hítaakumo. Aluu nimukoo, ta inniwufanoo ta píhina heenaput ha kapipempeŋoo ti ya. 24 Pale Pútuun pa mpúfulanoo ti kúnuul ka kiti eket ya, mpíñahaniyoo ti eloŋ ya, kaatuko eket ya etaakut sempe teyoo. 25  naasok kiteyoo:

'Inci incukcuk Ateeteyo Pútuun pa hátikinam tan óo tan.

Kaatuko oopa niŋ inci,

ancuk etikikilan.

26 Ekina ewune yaanam neemon, inci oopa ti caacook niŋ pásuuma.

Háati eniinam lompo éfeewaayeen kamma inci ínhine cíki.

27 Kaatuko awe Pútuun aatikatam piyeno pati keekete ka,

aatikat enii amiikan a atii eenape ya epufut ti hiyaak.

28 Aáyisanaam-yísan ñítin ña ñeekaaye ña pati eloŋ ya,

aafameeŋanam niŋ pásuuma hátikini.'

29 “Aluu pakanam, inci púkup naaluu niŋ híyiinate kiti maamaa atuunaa amansa ya Dawid. Aketaaket naahokee, fo fíyooy hiyaak ha hiteyoo hoopuha le tuunaa. 30 Pale Dawid ayenaayeno ayaamakoola, náameyi eeha Pútuun pa mpisintooliye ha teyoo nii éfipufulanii ti miin ma miteyoo amansa samat nii akina. 31 Dawid naacuk eeha Pútuun pa mpikaakaay ha íhinu hátikin, náakup kiti pilito pa piti , ta naasoke ta nii akatutee pati keekete ka, eniinoo lompo efutut ti hiyaak ha. 32 Yéesu aŋe Pútuun pa mpilitane ti eket ya, unii púlooŋ utantake ho. 33 Naasilanee ti epees yáali eti Pútuun pa Paapaa ateyoo, mpuwufanoo samat nii fa mpusokoo fa. Aŋe inniyem ya fiye ti hicuku ínnisi ekina eyem kawun etempo enka mpíniisii ka toonii. 34 Dawid himuumoo asiliit alacana pale naasok:

'Ateeteyo Pútuun pa púkupaakup niŋ Ateeteyo atoom ti hisoku:

"Kéy yeniyam epees yáali,

35 fo ta inci fatah ta pikamooli ti wooti ayyeno amansa ya ateyii."'

36 “Fiye aluu pakati púlooŋ niñaŋaa kameye eehe pánipani, Yéesu aŋe, aŋa innipempeŋe ya ti kuluwaa ya, Pútuun pa píhinoo apiyeno Ateeteyo niŋ lompo Eenucee ya.”

37 Ta pakan paka nkásiye ta eehe, ínciitiyii meemak nkacakan Piyeer niŋ pakakee pupoñapoñ pa, “Aluu pakan unii, puume nuuñaŋe íhinu?” 38 Piyeer naañahanii: “Níwunko umuuyen wa utaaluu, an óo an ti aluu náahinee ti caacaw ca citi Yéesu Krista, ancuk umuuyen wa utaaluu nuuponketee, Pútuun pa mpuwun aluu Kunuu ka keenape ka. 39 Kaatuko Pútuun pa píyinananaa-yínanan nii efipuwufan ko aluu niŋ epuuk aluu niŋ lompo keekine ka pílaaŋ, focaa payenka púlooŋ Ateeteyo Pútuun pa putuunaa mpikaakaay ka éyonkalii.”

40 Piyeer naapenanii kunuu niŋ kikee kilim keemeeŋe, naaŋiiniyii ti hisoku: “Nifakan faŋ aluu ti eenaput eyye!” 41 Keecoone ka hilim ha hiti Piyeer nkáhinee pátise, máamun pakan síwuli síhaaciil (3,000) nkananf ti oom hinoom kéeyinane ka.

Fiye aluu pakati Israyel púlooŋ niñaŋaa kameye eehe pánipani - Yéesu aŋe aŋa innipempeŋe ya ti kuluwaa ya Pútuun pa mpíhinoo apiyeno Ateeteyo niŋ lompo Eenucee ya.

Piyeer naasokii - Níwunko umuuyen wa utaaluu an óo an ti aluu náahinee pátise ti caacaw ca citi Yéesu Krista.

Fiye aluu pakati Israyel púlooŋ niñaŋaa kameye eehe pánipani - Yéesu aŋe aŋa innipempeŋe ya ti kuluwaa ya Pútuun pa mpíhinoo apiyeno Ateeteyo niŋ lompo Eenucee ya.

Pútuun pa píyinananaa-yínanan nii efipuwufan aluu Kunuu ka keenape ka niŋ lompo keekine ka pílaaŋ.

Fiye aluu pakati Israyel púlooŋ niñaŋaa kameye eehe pánipani - Yéesu aŋe aŋa innipempeŋe ya ti kuluwaa ya Pútuun pa mpíhinoo apiyeno Ateeteyo niŋ lompo Eenucee ya.

Piyeer naasokii - Níwunko umuuyen wa utaaluu, an óo an ti aluu náahinee pátise ti caacaw ca citi Yéesu Krista.

Fiye aluu pakati Israyel púlooŋ niñaŋaa kameye eehe pánipani - Yéesu aŋe aŋa innipempeŋe ya ti kuluwaa ya Pútuun pa mpíhinoo apiyeno Ateeteyo niŋ lompo Eenucee ya.

Pútuun pa píyinananaa-yínanan nii efipuwufan aluu Kunuu ka keenape ka niŋ lompo keekine ka pílaaŋ.

Fiye aluu pakati Israyel púlooŋ niñaŋaa kameye eehe pánipani - Yéesu aŋe aŋa innipempeŋe ya ti kuluwaa ya Pútuun pa mpíhinoo apiyeno Ateeteyo niŋ lompo Eenucee ya.

Eloŋ ya éeyeeni ya eti kéeyinane ka

42 Kéeyinane ka nkákipen ti káasiitan eeha pa nkakalaŋanii ha; nkákipen lompo ti pucokool piliit, ti káapaacinool kúmpuul niŋ ti kaluum. 43 An óo an naameeŋ niŋ ewatate, kamma Pútuun pa mpíhine hícump píyisan niŋ weecukantee wéenapii ti pupoñapoñ pa. 44 Kéeyinane ka púlooŋ nkacokool, nkápaacinool waah óo waah ewwa nkataake. 45 Pikee pa, nkanooman pitaam pa piteyii niŋ hitaaku ha hiteyii, nkápaacinool mañ ma, nkawufan an óo an fa naasoolahe. 46 Hinak óo hinak nkaconcool ti , nkápaacinool kúmpuul ti pukumpaan pa piteyii, nkali nantoonool niŋ pásuuma, an péemakiyanooliit. 47 Nkanimpan Pútuun pa, pakan paka púlooŋ nkálafiyii. Hinak óo hinak napenan ti kayoŋ ka kiteyii pakan keefakanee.