14
इकोनियोन नू पौलुस अरा बरनबास
1 अक्कु इकोनियोन नगरे नू हूँ पौलुस दरा बरनबास यहूदी गोड़हा एड़पा नू कोरचर अरा एन्ने कत्था बाचर का यहूदीर अरा युनानी आलर इरिब जातियर बग्गे आलर पत्त'ऊ आल मंजर केरर। 2 लिकिन एका यहूदीर मल पत्ताचर आर नन-यहूदीरिन तकाबाचर ती पत्त'ऊ आलर ही बिड़दो नू नन्ताचर। 3 पौलुस अरा बरनबास बग्गे उल्ला गूटी असन रहचर अरा डिढ गने उर्बस येसुसी पत्त नू तेंगा लगियर। उर्बस हूँ आर ती चिन्हा अरा अजगुत नलख गुट्ठी ऎद'आ गे आर गे सवंग चिच्चस ती आर ही कत्थन मानिम ऎदस। 4 लिकिन नगरे ता आलर ख़ट्टरर केरर। जोक्क आलर यहूदीर तरा मंजर केरर अरा जोक्क आलर तइरकर तरा मंजर केरर।
5 तहाँ जोक्क नन-यहूदीर अरा जोक्क यहूदीर अरा आर ही मुद्धर पौलुस अरा बरनबासिन हींड़'आ गे अरा पखना ती लोड़ग'आ पिटा गे बेद्दा लगियर। 6 पौलुस अरा बरनबास इदिन अक्खर ख़ने, आर लुकाओनिया अरा लुसत्रा अरा देरबॆ नगरे अरा अबड़ा ही अड्डे-बेड्डे ता अड्डा गुट्ठी नू बोंगर केरर। 7 अरा आर असन हूँ दौ कत्थन तिंगियर।
लुसत्रा अरा देरबॆ नगरे नू पौलुस अरा बरनबास
8 लुसत्रा नगरे नू ओन्टा एन्ने आलस उक्का रहचस। आसी ख़ेड्डे नू पैया मल रहचा। आस कुन्द्रका तिम लेंगड़ा रहचस अरा आस इकला हूँ ऎका पोलकाचस। 9 आस पौलुसी ब'अनन मेना लगियस ख़ने, पौलुस आसिन ओन ढिठ ईरियस ती धर्मेस एंगन कोड़े नना ओंग्दस एन्ने आसी पत्त'अनन अक्खस। 10 ख़ने जॊरसरिया बाचस, “चो'आ अरा निंग्है ख़ेड्डे ती उजगो इज'आ।” आस उदकारस ती कुद्दा नुंगा हेलरस।
11 गोंहड़ा पौलुसी ई नंजकन ईरिया ख़ने, आर लुकाओनिया भखा नू जॊरसरिया बाचर, “देंवता गुट्ठी आलर ही रूपे नू नम्है गुसन इत्तकी र'ई।” 12 तहाँ अबड़र बरनबासिन तम्है मुध देंवता जेयुस एन्ने बाचर अरा पौलुसिन तम्है पैका देंवता हेरमॆस एन्ने बाचर, एन्देरगेका आस सिखाब'ऊ रहचस। 13 नगरे ता बहरी जेयुस ही मन्दिर रहचा। अइय्या ता नैगस अड्डो गुट्ठी अरा पूंप माला गुट्ठी ओन्द्रस ती नगरे ही बली गुसन अंड़सियस। अरा आस अबड़ा आलर गने पौलुस अरा बरनबास गे दाँड़े नना गे बिद्दियस। 14 लिकिन तइरकर पौलुस अरा बरनबास इदिन मेंजर ख़ने, तंग्है किचरी गुट्ठिन चर्रियर ती गोंहड़ा नू बोंगर ती चिच्चियारर, 15 “भईरो, नीम ईद एन्देर नना लगदर? ऎम हूँ गा निम्है लेक्खा सुक्खे दुक्खे भोग'ऊ आलम हिकदम। ऎम ई दौ कत्था तेंगा बरचकादम का इबड़ा अनभनियाँ आलॊ गुट्ठी ती तरकूटी मना अरा उज्जना धर्मेस तरा किर्रा, एकास मेर्ख़ा अरा ख़ॆख़ेल अरा समुदर अरा अबड़ा नू र'अना उर्मिन कमचस।† 16 आस केरका बेड़ा नू उर्मी जातियारिन तम्है तम्है डहरे नू ऎका चिच्चस। 17 अन्नु हूँ आस तंग्है दौ नलख ती तंग्है पत्त नू गोवाह चि'अदस। आस मेर्ख़ा ती चॆप पुंइत'अदस अरा बॆस बरखा ती खितिन बने मन्त'अदस। अरा आस निम्है जियन ओन्ना-मॊख़ना अरा रिझ्रना नू निन्दत'अदस।” 18 इबड़ा कत्था गुट्ठिन तेंगना ती आर गोंहड़ा आबोन नगदे मसकिल ती तमा गे दाँड़े नन्नन छेकचर।
19 इदही ख़ॊख़ा जोक्क यहूदीर अन्तियोख़ेया अरा इकोनियोन नगरे ती बरचर। अरा आर गोंहड़ा आबोन तम्है गने भिड़ाबाचर। अरा आर पौलुसिन पखना ती लोड़गर ती लौचर अरा आस केच्चस बाचर ती आसिन नगरे ती बहरी घिड्राचर होच्चर। 20 लिकिन पत्त'ऊ आलर पौलुसी चरियो तरा मंजर ख़ने, आस चॊचस ती नगरे नू किर्रिम बिच्चियस। अरा नन्ना उल्ला आस बरनबास गने देरबॆ केरस।
सीरिया राजी ता अन्तियोख़ेया नगरे गे किर्रना
21 पौलुस अरा बरनबास देरबॆ नगरे नू दौ कत्था तिंगियर अरा बग्गे आलर पत्त'ऊ मंजर केरर। इदही ख़ॊख़ा आर लुसत्रा अरा इकोनियोन अरा अन्तियोख़ेया किर्रियर। 22 अरा आर असन ता पत्त'ऊ आलारिन बड़ियर नंजर अरा पत्त'अना नू ठिमठिमने इज्जका र'आ गे रिझ्रताचर। अरा बाचर, “नमा नगदे खिलपत मॊख़रकी धर्मेसी राजी नू कोरना र'ई।” 23 अरा आर उर्मी कलीसिया नू नॆकन आर पत्ताचर आरिन बिन्ती अरा उपास नंजर ती सेयान कमचर अरा आरिन उर्बासी ख़ेक्खा नू चिच्चर।
24 तहाँ आर पिसिदिया नगरे मन्नुम ती पम्फुलिया बरचर। 25 अरा आर पेरगॆ नगरे नू दौ कत्था तिंगियर, अदही ख़ॊख़ा अत्तालेया नगरे केरर। 26 असले ती आर कोहाँ डोंगा अरगियर ती सीरिया राजी ता अन्तियोख़ेया किर्रिम बिच्चियर। इसन दिम आर पत्त'ऊ आलर ती धर्मेसी सोग्गे गे सोंपरकाचर ती अक्कु आर नंज मुंजका ई नलख गे तइरकाचर। 27 असन आर अंड़सियर ती कलीसियन ख़ॊंड़चर ती तिंगियर का धर्मेस आर ही ती एन्देर एन्देर नलख नंजकाचस, अरा नन-यहूदीर हूँ पत्त'आ गे एकासे बलिन तिसगस चिच्चस। 28 अरा आर नगदे उल्ला गूटी असन पत्त'उर गने रहचर।