त‍इरकर ही नलख 15

येरुसलॆम ता सभा

¹ जोक्‍क आलर यूदेया राजी ती सीरिया राजी ता अन्‍तियोख़ेया बरचर ती नन-यहूदी पत्त'उरिन एन्ने सिखाब'आ लगियर, “मूसासी सिखाबाचका नॆग ही लेक्‍खा निम्‍है खतना मल मनो होले नीम नाड़र'आ पोल्‍लोर।” ² इदही पत्त नू पौलुस दरा बरनबास अरा अबड़ा आलर गने कोड़हे आनानख्रना मंजा। औंगे कलीसिया पौलुस अरा बरनबास अरा अन्‍तियोख़ेया ता जोक्‍क पत्त'उरिन येरुसलॆम त‍इय्या गे तिगचर का असन आर ई पत्त नू त‍इरकर अरा सेयान आलर गने कछनख्र'ओर। ³ अन्‍तियोख़ेया कलीसिया आरिन त‍इय्या। आर फोइनिकॆ दरा समारिया मन्नुम केरर ती असता उर्मी पत्त'उर गने तिंगियर का एकासे नन-यहूदीर धर्मेसिन इंझ्रर। अरा ई कत्‍था ओर्मा पत्त'उरिन नगदे रिझ्रताचा।

⁴ आर येरुसलॆम अंड़सियर ख़ने, कलीसिया अरा त‍इरकर अरा सेयान आलर आरिन परघाचर। अरा आर धर्मेस आर ही ती एन्‍देर एन्‍देर नलख नंजस अबड़ा उर्मिन तिंगियर। ⁵ लिकिन फरिसीर ही खोंड़हा ता जोक्‍क पत्त'ऊ आलर इज्‍जर ती बाचर, “नन-यहूदी पत्त'ऊ आलर खतना नन्ना दिम र'ई अरा मूसासी पॆसकन पॆस्रना र'ई।”

⁶ औंगे त‍इरकर अरा सेयान आलर ई पत्त नू कछनख्र'आ गे ख़ॊंड़रर। ⁷ इदही पत्त नू बग्‍गे आनानख्रना मंजका ख़ॊख़ा पतरस इज्‍जस ती बाचस, “अना भ‍ईरो, नीम अख़दर का धर्मेस पहिल खेप निम्‍है मझी ती एंगन नन-यहूदीर नू दौ कत्‍था तेंगा गे चज्‍जियस, आर एंग्‍है ती दौ कत्‍था मेंजर अरा पत्ताचर। ⁸ धर्मेस ओर्मर ही सोच आबोन अख़दस, आस आरिन इंझरस। अरा आस नमा गे एकासे नंजस अन्नेम आर गे नेम्‍हा बॊलतासिन चिच्‍चस ती तंग्‍है इंझ्रनन ऎदस। ⁹ अरा आस आर ही जियन पत्त'अना ती नेम्‍हा नंजस अरा नम्‍है नू अरा आर नू एन्‍देर हूँ फरक म‍ल नंजस। ¹⁰ औंगे अक्‍कु नीम एन्‍देरगे नन-यहूदी पत्त'ऊ आलर ही ख़ेसेर नू ओत्‍था पगसीन लद'अरकी धर्मेसिन बिढ़दर? एकदन नाम महले नम्‍है पूरखर चेड़'आ पोल्‍लर। ¹¹ लिकिन नाम पत्त'अदत का नाम अरा आर हूँ उर्बा येसुसी सोग्‍गे ती नाड़र'ओत।”

¹² तहाँ ओर्मा खोंड़हा कलेकसे मंजा अरा पौलुसी अरा बरनबासी कत्‍थन मेंजा का धर्मेस आर ही ती एन्‍देर एन्‍देर चिन्‍हा दरा अजगुत नलख गुट्ठी नन-यहूदीर मझी नू नंजस। ¹³ आर ही बाचका मुंजका ख़ॊख़ा याकॊबस बाचस, “अना भ‍ईरो, एंग्‍हैन मेना। ¹⁴ सिमॊनस नमन तिंगियस का धर्मेस नन-यहूदीर ती जोक्क आलारिन तंगा गे चज्जियस ती पहिल खेप एकासे सोग्‍गे ईरियस। ¹⁵ धर्मेसी कत्‍था तिंगुर ही कत्‍था हूँ इदही गने ओन्‍टम उक्‍की। एन्ने लिख्रकी र'ई का,

¹⁶ ‘इबड़ा ही ख़ॊख़ा ऎन किर्रोन ती

दाऊदसी धंस्रका एड़पन फेन कम'ओन।

अरा ऎन अदही घराड़िन फेन कम'ओन

अरा अदिन फेन इजत'ओन।

¹⁷ औंगे बछ्रका आलर अरा ऎन एंगा गे चजकादन

अबड़ा ओर्मा नन-यहूदीर उर्बासिन बेद्दोर।

उर्बस ब'अदस,

¹⁸ इबड़न नॆ हुल्‍लो ती अख़ताचस।’

¹⁹ औंगे ऎन सोचदन का धर्मेस तरा बरचका नन-यहूदीरिन नाम सस्ती अम्‍बोत चि'आ। ²⁰ लिकिन नाम आर गे लिख'ओत का आर मूर्ती गुट्ठी गे अरगका ओन्ना-मॊख़ना अरा उर्मी रकम ही पेहरन ही सोतरा नलख ती अरा घोंघन पॆदख़का मेक्‍खो गुट्ठी ही अहड़ा अरा ख़ॆंस ती तरकूटी र'ओर। ²¹ एन्‍देरगेका चिरान तिम नगरे नगरे नू मूसासी पॆसकन तिंगुर र'अनर अरा आद उर्मी ख़न्न ऎख़्रना उल्‍ला नू गोड़हा एड़पा गुट्ठी नू पढ़तार'ई।”

नन-यहूदी पत्त'ऊ आलर गे चिठी लिखना

²² तहाँ त‍इरकर अरा सेयान आलर कलीसिया ता उर्मिर गने तिगचर का नम्‍है ती जोक्‍क आलारिन चाजोत ती पौलुस अरा बरनबास गने अन्‍तियोख़ेया त‍इय्योत। आर इबड़र हिकनर का बरसब्‍बास बारना यूदस अरा सीलास, ईर पत्त'ऊ आलर नू मुध रहचर। ²³ अरा आर ही ख़ेक्खा नू ई चिठिन त‍इय्यर: “अन्‍तियोख़ेया अरा सीरिया अरा किलिकिया ता नन-यहूदी पत्त'ऊ भइय्योर गे ऎम त‍इरकर अरा सेयान आलर अरा येरुसलॆम ता पत्त'ऊ भइय्योर ही मोंजरा।

²⁴ ऎम मेंजकादम का एम्‍है ती जोक्‍क भ‍इ‍य्योर निम्‍है हेद्दे बरचर ती तम्‍है कत्था ती निमन अकबकाम बाचर अरा निमन हदियाचर। लिकिन आर गे ऎम एन्ने एन्‍देर पॆसका हूँ मल चिच्का रहचकम। ²⁵ औंगे ऎम ओर्मर ही मने ती तिगचकम का जोक्‍क आलारिन चाजोत ती आरिन पौलुस अरा बरनबास गने त‍इय्योत। ²⁶ ईर इरबारिम एन्ने आलर हिकनर का तम्‍है उज्‍जनन हूँ मल ऎररकी उर्बस येसु मसीस गे सुसर ननू आलर हिकनर। ²⁷ ऎम यूदस अरा सीलासिन हूँ निम्‍है गुसन त‍इय्दम। आर इबड़ा कत्‍थन निमन तम्‍है ब‍ई ती तेंगोर। ²⁸ नेम्‍हा बॊलतस अरा एमा गे ईद बॆस लग्‍गिया का इबड़ा मुध कत्‍थन अम्‍बरकी अउर कोड़हे कत्‍था गुट्ठिन निम्‍है म‍इय्याँ मल लद'ओम। ²⁹ नीम मूर्ती गुट्ठी गे अरगका ओन्ना-मॊख़ना अरा ख़ॆंस अरा घोंघन पॆदख़का मेक्‍खो गुट्ठी ही अहड़ा अरा उर्मी रकम ही पेहरन ही सोतरा नलख ती तरकूटी र'अके। इबड़ा ती नीम तरकूटी र'ओर होले निमा गे दौ मनो। निम्‍है दौ मनन नेक‍अन।”

³⁰ आर बिदा मंजर ती अन्‍तियोख़ेया केरर अरा असन अंड़सियर ती कलीसिया आबोन जुमाबाचर ती चिठिन चिच्‍चर। ³¹ चिठी नू लिख्रका जिया सालना कत्‍थन मेंजर ती आलर कोड़हे रिझ्रर। ³² यूदस अरा सीलास हूँ गा धर्मेसी कत्‍था तिंगुर रहचर। आर भइय्योरिन कोड़हे कत्‍था बाचर ती जिया सालना चिच्‍चर अरा आरिन बड़ियर नंजर। ³³ जोक्‍क उल्‍ला आर असन रहचर ती भइय्योर आरिन कोड़े गने येरुसलॆम कलीसिया किर्रा गे त‍इय्यर। ³⁴ [सीलास गा असन र'आ गे तिगचस।] ³⁵ लिकिन पौलुस दरा बरनबास अन्‍तियोख़ेया नुम रहचर अरा नगदे बग्‍गे आलर गने उर्बासी कत्‍थन सिखाब'आ अरा तेंगा कुद्दा लगियर।

पौलुस अरा बरनबासी छिन्‍डरना

³⁶ जोक्‍क उल्‍ला ख़ॊख़ा पौलुस बरनबासिन बाचस, “बरा, नाम एका एका नगरे नू उर्बासी कत्‍था तिंका रहचकत असन फेन क'ओत ती भइय्योर गने भेंट मनोत अरा आर एकासे र'अनर अदिन ऎरोत।” ³⁷ बरनबास गा मरकुस बारना यॊहनसिन संगे हो'आ गे तिगचस। ³⁸ लिकिन पौलुसी सोच एन्ने रहचा का एकास पम्‍फुलिया नू आरिन अम्‍बियस चिच्‍चस अरा आर ही नलख नू संगे मल चिच्‍चस, आसिन हो'अना दौ मलकी। ³⁹ ई पत्त नू इरबर नू कोड़हे नग्‍गानख्रना मंजा का आर इरिबर छिन्‍डरर केरर। बरनबास मरकुसिन संगे होच्‍चस ती डोंगा ती कुप्रोस केरस। ⁴⁰ लिकिन पौलुस सीलासिन चज्‍जियस, अरा भइय्योर ती उर्बासी सोग्‍गे नू सोंपरस ती असलेक किर्रिम बिच्‍चियस। ⁴¹ अरा आस सीरिया दरा किलिकिया मन्नुम कलीसिया गुट्ठिन बड़ियर नंजस ती केरस।