त‍इरकर ही नलख 13

बरनबास अरा स‍उलसी चज्‍जरना

¹ अन्‍तियोख़ेया कलीसिया नू कैनो बग्‍गे धर्मेसी कत्‍था तिंगू अरा सिखाब'ऊ आलर रहचर। इबड़र बरनबास अरा नीगेर बारना सिमॊन अरा कुरॆनॆ नगरे ता लूकियोस अरा बॆलस हॆरॊदॆस अंटिपसी संगे परदका मनायॆन अरा स‍उल हिकनर। ² आर उन्‍दुल उपास नन्नुम उर्बासी महबा नना लगियर ख़ने, नेम्‍हा बॊलतस बाचस, “ऎन स‍उलसिन अरा बरनबासिन एन्‍देर नलख गे मीख़कादन अदगे आरिन भिनंग नना।” ³ तहाँ गोहरारना अरा उपास नन्ना ही ख़ॊख़ा आर स‍उल अरा बरनबास म‍इय्याँ ख़ेक्खा उइय्यर ती आरिन त‍इय्यर।

कुप्रोस नू बरनबास अरा स‍उलस

⁴ अन्नेम बरनबास अरा स‍उलस नेम्‍हा बॊलतस ती त‍इय्का ती सेलुकिया केरर अरा असलेक ती आर कोहाँ डोंगा नू कुप्रोस टापू केरर। ⁵ अरा आर सलामिस नगरे अंड़सियर ती यहूदीर ही गोड़हा एड़पा गुट्ठी नू धर्मेसी कत्‍था तिंगियर। यॊहन मरकुस आर ही गने रहचस ती आर ही सहाड़ा नना लगियस।

⁶ आर गोट्टा टापुन कट्टियर मुंजियर ती अदही आ पक्खे नू र'अना पाफोस नगरे बरचर। असन आर बरयेसु नामे ओन्‍टा यहूदी टोन्‍हा अरा ठकवा धर्मेसी कत्‍था तिंगुस गने भेंट मंजर। ⁷ आस राजीख़ापुस सेरगियुस पौलुस गने रहचस। आ राजीख़ापुस बुधमान रहचस। आस बरनबास अरा स‍उलसिन मीख़ियस ती आर ती धर्मेसी कत्‍थन मेना बेद्दा लगियस। ⁸ लिकिन टोन्‍हा बरयेसुस नॆकन युनानी भखा नू एलुमास नामे रहचा, आस आरिन हींड़चस अरा राजीख़ापुस येसुस नू पत्त'अना ती छेक'आ बेद्दा लगियस। ⁹ तहाँ पौलुस बारना स‍उलस नेम्‍हा बॊलतस ती निन्‍दियस ती आसिन ओन ढिठ ईरियस। ¹⁰ अरा बाचस, “नीन नाद ही ख़द्दय, अरा नीन चतरा अरा कटरहा ती निन्‍दका र'अदय, अरा उर्मी रकम ही दौ नलख ही बैरी हिकदय, अरा नीन उर्मी बारी उर्बासी उजगो डहरे गुट्ठिन बगड़'आ गे चिहुट नन्‍दय। ¹¹ ऎरा! अक्‍कुनिम उर्बस निंगन दंडे चि'ओस, नीन अन्धहा मनोय अरा जोक्‍क उल्‍ला बीड़ी ही बिल्‍लिन ऎरा पोल्‍लोय।” आ बारिम आसी ख़न्न धुन्‍द्रा मंजा केरा अरा ऊख़ा मंजा केरा। अरा आस अत्रा इत्रा कप्‍पा कुद्दियस का नेक‍ईम आसिन ख़ेक्खन धर'अरकी हो'ओर। ¹² ई मंजकन ईरियस ती आ राजीख़ापुस पत्ताचस अरा उर्बासी सिखाब'अना ही पत्त नू अकबकरस।

पिसिदिया राजी ही अन्‍तियोख़ेया नू पौलुस अरा बरनबास

¹³ अक्‍कु पौलुस अरा आसी संगेर कोहाँ डोंगा ती पाफोस ती पम्‍फुलिया ता पेरगॆ नगरे बरचर। असन यॊहन मरकुस आरिन अम्‍बियस ती येरुसलॆम किर्रियस। ¹⁴ पौलुस दरा बरनबास पेरगॆ ती उरखर ती पिसिदिया राजी ही अन्‍तियोख़ेया बरचर। अरा आर ख़न्न ऎख़्रना उल्‍ला नू गोड़हा एड़पा नू केरर ती उक्‍कियर। ¹⁵ पॆसका ही पुथी अरा धर्मेसी कत्‍था तिंगुर ही पुथी ती पढ़चका ख़ॊख़ा, गोड़हा एड़पा ता मुद्धर आरिन एन्ने बाचर त‍इय्यर, “भ‍ईरो! नीम आलारिन रिझ्रता गे इन्द्रिइम ब'आ बेद्ददर होले ब'आ।”

¹⁶ होले पौलुस इज्‍जस ती ख़ेक्खा ती कलेकसे र'आ गे बाचस अरा तेंगा हेलरस, “अना इस्राऎल भ‍ईरो अरा धर्मेसी इल्‍चू नन-यहूदी आलारो, मेना। ¹⁷ इस्राऎल आलर ही धर्मेस नम्‍है पूर्खारिन चज्‍जियस। अरा आर मिसर देस नू र'अना बारी आरिन कोहाँ कमचस ती तंग्‍है कोड़हे सवंग गने आरिन आ देस ती ओथ्रस ओन्‍द्रस। ¹⁸ अरा आस चालीस बछर गूटी टोड़ंग नू आरिन ईरियस ख़ूजियस। ¹⁹ इदही ख़ॊख़ा आस ख़ानान देस नू सात गोटंग जातियारिन पिटियस ती आर ही आ देसन चिच्‍चस। ²⁰ इबड़ा जम्मा मलागूटी साढ़े चार सौ बछर मंजा।

इदही ख़ॊख़ा धर्मेस आर गे नेंव‍ई ननू आलारिन धर्मेसी कत्‍था तिंगू सामुऎलसी बेड़ा गूटी चिच्‍चस। ²¹ इदही ख़ॊख़ा आर तमा गे ओन्टा बॆल नॆचर। अरा धर्मेस आर गे बेनियमिन गोतोर ता कीसी तंग्‍दस स‍उलसिन बॆल कमचस चिच्‍चस। आस चालीस बछर गूटी राजी नंजस। ²² ख़ॊख़ा धर्मेस आसिन ताड़चस ती दाऊदसिन आर ही बॆल कमचस। अरा आसी पत्त नू धर्मेस बाचस, ‘ऎन एंग्‍है जिया पत्तारना लेक्‍खा येसैसी तंग्‍दस दाऊदसिन ईरकन। आस एंग्‍है मने लेक्‍खा जम्मन ननोस।’ ²³ धर्मेस तंग्‍है गच्‍छरका लेक्‍खा आ दाऊदसी बनस तिम इस्राऎल गे ओन्‍टा बछाब'उस येसुसिन इजताचस। ²⁴ येसुसी बरना ही मुन्‍द यॊहनस ओर्मा इस्राऎल आलर गे जियन किर्त'अना ती नॊड़रना ही पत्त नू तिंगियस। ²⁵ यॊहनस तंग्‍है नलखन नंजस मुंजियस ती बाचस, ‘नीम एंगन नॆ तंग्‍है सोचदर? ऎन मसी मलदन। आस एंग्‍है ख़ॊख़ा बर'ऊ र'अदस। आसी ख़ेड्डे ता जूता गुट्ठिन ईचना ही जॊगे हूँ ऎन मलदन।’

²⁶ अना भ‍ईरो, अब्राहमसी जंईपुंई आलारो, अरा धर्मेसिन इल्‍चू नन-यहूदी आलारो, मेना। ई बछरना ही पत्त ता कत्‍था नम्‍है गुसन त‍इरकी र'ई। ²⁷ येरुसलॆम नू र'ऊ आलर अरा आर ही मुद्धर येसुसिन बछाब'ऊ ब'अरकी मल चिन्‍हचर। अरा धर्मेसी कत्‍था तिंगुर ही कत्‍थन मल बुझ्रनुम उर्मी ख़न्न ऎख़्रना उल्‍ला अबड़न पढ़चर। औंगे येसुसिन बदी नंजर ती अबड़ा कत्‍थन पूरा नंजर। ²⁸ आर गे आस नू पिटना दंडे जॊगे एन्‍देर हूँ बदी मल ख़क्‍ख्रा। अन्नु हूँ पिलातुस ती गोहरारर का आसिन पिटा। ²⁹ आर आसी पत्त नू नेम्हा पुथी नू लिखचका जम्मन नंज मुंजका ख़ॊख़ा, आसिन क्रुस ती एत्ताचर अरा मसड़ा नू उइय्यर चिच्‍चर। ³⁰ लिकिन धर्मेस आसिन केचका ती उज्‍जताचस चॊदस। ³¹ अदही ख़ॊख़ा आस नगदे उल्‍ला गूटी नॆ आसी पिटरना ही मुन्द आसी गने गलिलेया ती येरुसलॆम बरचका रहचर आर गे ऎथ्र'आ लगियस। अक्‍कु आरिम आलर ही मुन्‍दहारे आसी गोवाह र'अनर।

³² अक्‍कु ऎम धर्मेस नम्‍है पूरखर गने नंजका गच्‍छरका ही पत्त ता दौ कत्‍थन निमन तेंगदम। ³³ आस येसुसिन केचका ती उज्‍जताचस चॊदस ती आसी ख़द्दर नमा गे आ गच्‍छरकन मानिम नंजस। एकासे का दाऊदसी दोसर डंडी नू लिख्रकी र'ई,

‘नीन एंग्‍है ख़द्दय,

इन्ना ऎन निंग्‍है बंग मंजकादन।’

³⁴ धर्मेस येसुसिन केचका ती उज्‍जताचस चॊदस अरा अक्‍कु आस इकला हूँ मल खे'ओस। औंगे धर्मेस एन्ने बाचकादस, ‘ऎन निंगा नेम्‍हा अरा मल ताड़रना आसीस आबोन चि'ओन, एकदा ऎन दाऊदसिन गच्‍छरकन।’ ³⁵ औंगे आस नन्ना डंडी नू अउरिम ब'अदस, ‘नीन निंग्‍है नेम्‍हा आलासिन कित्ता मल चि'ओय।’ ³⁶ दाऊदस गा तंग्‍है उज्‍जना ही बेड़ा नू धर्मेसी मने लेक्‍खा नंजस ती केच्‍चस। अरा आसिन तंग्‍है पूरखर हेद्दे मंडियर। अरा आसी मॆद मसड़ा नू कित्तिया। ³⁷ लिकिन धर्मेस नॆकन केचका ती उज्‍जताचस चॊदस आसी मॆद मल कित्तिया। ³⁸ औंगे भ‍ईरो, नीम बॆस लगे बुझ्र'आ हो'आ का एका कत्‍था निमा तेंगर'आ लगी आद ईद हवे का येसुस ती निम्‍है पाप ही छमा ख़क्‍ख्र'ओ। मूसासी पॆसका निमन निम्‍है पाप गुट्ठी ती अम्‍बता पोल्‍लो। ³⁹ लिकिन येसुसिन पत्त'ऊ ओर्मर तम्‍है पाप ती बछर'ओर। ⁴⁰ औंगे चिहुंक र'आ का, एकाद धर्मेसी कत्‍था तिंगुर ती तिंका र'ई आद निम्‍है म‍इय्याँ अम्‍बन बर'आ।

⁴¹ ‘अना निंदा ननू आलारो! ऎरा,

अकबक मना अरा खे'आ कला।

ऎन गा ओन्‍टा नलखन निम्‍है उल्‍ला गुट्ठी ननोन।

ओर्तोस अदही पत्त नू निमन तेंगोस।

अन्नु हूँ नीम अदिन मल पत्त'ओर।’”

⁴² बरनबास अरा पौलुस गोड़हा एड़पा ती उरखा लगियर ख़ने, बरना ख़न्न ऎख़्रना उल्‍ला हूँ इबड़ा ही पत्त नू अउरिम तेंगा गे आलर गोहरारर। ⁴³ सभा मुंज्रा अदही ख़ॊख़ा नगदे बग्‍गे यहूदीर अरा यहूदी धरम नू बरचका नन-यहूदीर पौलुस अरा बरनबास गने चॊंख़्रर। पौलुस अरा बरनबास आर ही गने कछनख्रर अरा धर्मेसी सोग्‍गे नू बड़ियर र'आ गे आनियर।

⁴⁴ नन्ना ख़न्न ऎख़्रना उल्‍ला नू मलागूटी नगरे ही उर्मी आलर उर्बासी कत्‍थन मेना गे ख़ॊंड़रर। ⁴⁵ एन्ने कोहाँ गोंहड़न ईरियर ती यहूदीर कुटमुटर'आ हेलरर अरा पौलुसी निं‍दा नंजर ती आसी कत्‍था ही बिड़दो नू आनानखर'आ हेलरर। ⁴⁶ पौलुस दरा बरनबास बिगर एल्‍चम बाचर, “ईद चाड़ रहचा का मुन्‍द निमा गे धर्मेसी कत्‍था तेंगना रहचा, लिकिन नीम इदिन मल इंझ्रदर, अरा नीम निमन मुंजा मलका उज्‍जना ख़क्‍खना जॊगे मल बुझुरदर। औंगे ऎम अक्‍कु इदिन नन-यहूदीरिन तेंगदम। ⁴⁷ औंगे उर्बस एमन एन्ने बाचस ती पॆसकादस,

‘ऎन निमन नन-यहूदीर गे बिल्‍ली कमचकादन,

एकत्रु निम्‍है ती बछरना ही दौ कत्‍था ख़ॆख़ेल ही ठुट्ठु गूटी बिंड़र'ओ क'ओ।’”

⁴⁸ नन-यहूदीर इदिन मेंजर ख़ने, रिझ्र'आ हेलरर अरा धर्मेसी कत्‍था ही ओहमा नना लगियर। एका बग्‍गे आलर मुंजा मलका गुटी उज्‍जना गे चज्रकाचर, अबड़र दौ कत्‍थन पत्ताचर। ⁴⁹ तहाँ गोट्टा चकभार नू उर्बासी कत्‍था बींड़रा केरा। ⁵⁰ लिकिन यहूदीर जोक्‍क म‍ईन जॊगे धर्मेसी इल्‍चू नन-यहूदी मुक्‍कारिन अरा नगरे ता मुद्धारिन पौलुस अरा बरनबासी बिड़दो इज्‍जताचर ती आरिन सस्ती नंजर। अरा आरिन तम्‍है चक ती बहरी ओथ्रर चिच्‍चर। ⁵¹ तहाँ आर ही बिड़दो गोवाह चि'आ गे पौलुस दरा बरनबास तम्‍‍है ख़ेड्डे ता रिड़ोन ख़ित्तियर, अरा इकोनियोन नगरे केरर। ⁵² अरा पत्त'ऊ आलर रिझ ती अरा नेम्‍हा बॊलतस नू निन्‍द्रका रहचर।