यॊहनस 1

यॊहनसी लिखचका दौ कत्‍था

धर्मेसी कत्‍था येसुस आल मंजस

¹ ऒरे नू कत्‍था रहचा,

अरा आ कत्‍था धर्मेस गने रहचा,

अरा आ कत्‍था धर्मेस रहचस।

² आस ऒरे तिम धर्मेस गने रहचस।

³ उर्मी आलॊ आसी तिम गढ़रा,

अरा गढ़्रका ती ओन्‍टा हूँ आसी बिगर मल्‍ला गढ़्रका।

⁴ अरा गढ़्रका ओर्मा तंग्‍है उज्‍जनन आसी ती ख़क्‍खिया,

अरा आसी उज्‍जना ओर्मर गे बिल्‍ली चिच्‍चा।

⁵ अरा आ बिल्‍ली ऊख़ा नू बिल्‍ची,

अरा ऊख़ा अदिन तेभ'आ पुल्‍ली।

⁶ धर्मेस ती तइय्का ओर्तोस रहचस, आस यॊहन नूड़रत'उस। ⁷ आस आ बिल्‍ली ही पत्त नू गोवाह चि'आ गे ओन्‍टा गोवाह लेक्‍खा बरचस, औंगे ओर्मर आस ती पत्त'आ ओंगोर नेकअन। ⁸ आस गा तान आ बिल्‍ली मल रहचस, लिकिन आस आ बिल्‍ली ही पत्त नू गोवाह चि'आ गे लेका बरचस। ⁹ एकास मानी बिल्‍ली र'अदस, आस ओर्मर गे बिल्‍ली चि'अदस, आस अक्‍कु ख़ॆख़ेल नू बर'आ लगियस।

¹⁰ आस ख़ॆख़ेल नू रहचस। अरा ख़ॆख़ेल आस तिम गढ़रा, अन्नु हूँ ख़ॆख़ेल आसिन मल चिन्‍हचा। ¹¹ आस तंग्‍है आलर गुसन बरचस, अन्नु हूँ तंग्‍है आलर आसिन मल इंझ्रर। ¹² लिकिन जेतेक आलर आसिन इंझ्रर अरा आसी नू पत्ताचर, अबड़ा ओर्मर गे आस धर्मेसी ख़द्द मना गे अदिया चिच्‍चस। ¹³ आर अयंग-बंग ती, महले मॆद ही मने ती, महले मॆत-मुक्‍का ही मने ती धर्मेसी ख़द्दर मल मंजर, लिकिन धर्मेस तंग्‍है मने ती आरिन तंग्‍है ख़द्दर कमचस।

¹⁴ अक्‍कु आ कत्‍था आल मंजस ती मया दरा मानिम ती निंद्रका ती नम्‍है मझी नू उज्‍जियस। अरा नाम आसी महबन ईरकत, आद धर्मे बंगासी ओर्त लेका ख़द्दासी महबा ही जोक्‍खा महबा दिम रहचा।

¹⁵ यॊहनस आसी पत्त नू गोवाह चिच्‍चस अरा चिच्चियारस ती बाचस, “नॆख'आ पत्त नू ऎन बाचकन, आस ईसिम हिकदस, आस एंग्‍है ख़ॊख़ा बरदस, लिकिन एंग्‍है ती कोहँस र'अदस, एन्‍देरगेका आस एंग्‍है ती मुन्‍द दिम रहचस।” ¹⁶ अरा आसी मया ही निंद्रका ती नाम ओर्मत आसीस ही म‍इय्याँ आसीस ख़क्‍खकादत। ¹⁷ एन्‍देरगेका धर्मेसी पॆसका मूसस ती चीतारा, लिकिन मया अरा मानिम येसु मसीस ती बरचा। ¹⁸ धर्मेसिन इकला हूँ नॆ हूँ मल ईरकानर। धर्मे बंगासी जिया हेद्दे र'ऊ आसी ओर्त लेका ख़द्दस धर्मेस, धर्मेसिन नमा गे दहदर नंजकादस।

यॊहन नूड़रत'उसी गोवाह

(मत्ता 3:1–12; मर 1:1–8; लूक 3.15–17)

¹⁹ येरुसलॆम ता यहूदीर नैगारिन अरा लेवी गोतोर ता आलारिन “नीन एका ओर्तय?” एन्ने मेना गे यॊहनस गुसन त‍इय्यर। ²⁰ आ बारी यॊहनस एन्ने गोवाह चिच्‍चस, अरा मल नुड्रस ती आस मानिम गने तेंगरस, “ऎन मसीस मलदन।” ²¹ ख़ने आर आसिन मेंजर, “होले नीन एका ओर्तय? नीन धर्मेसी कत्‍था तिंगू एलियस हिकदय का?” यॊहनस बाचस, “ऎन एलियस मलदन।” अरा आर अउरिम मेंजर, “नीन बर'ऊ र'अदस आ धर्मेसी कत्‍था तिंगू हिकदय का?” आस बाचस, “मला।” ²² ख़ने आर बाचर, “होले नीन एका ओर्तय? नॆ एमन तइय्‍कानर आरिन एन्‍देर तेंगोम? निंग्‍है पत्त नू एन्‍देर ब'अदय?” ²³ यॊहनस आरिन धर्मेसी कत्‍था तिंगू यसायासी बाचका कत्‍थन आनाकिर्ताचस,

“ऎन उर्बस गे डहरेन चत्र'आ

एन्ने टोड़ंग नू चिच्चियारना सड़ा हिकदन।”

²⁴ फेन तइय्‍का रहचका जोक्‍क फरिसीर यॊहनसिन मेंजर, ²⁵ “नीन मसीस मलदय, महले एलियस मलदय, महले बर'ऊ र'अदस आ धर्मेसी कत्‍था तिंगू मलदय होले, नीन एन्‍देरगे आलारिन नॊड़रत'अदय?” ²⁶ ख़ने यॊहनस आनाकिर्ताचस, “ऎन गा अम्मु ती नॊड़रत'अदन, लिकिन निम्‍है मझी नू इसन ओर्तोस र'अदस, आसिन नीम बलदर। ²⁷ आस एंग्‍है ख़ॊख़ा बर'ऊ र'अदस, लिकिन ऎन आसी खरपन इँचना ही हूँ जॊगे मलदन।” ²⁸ इबड़ा ओर्मा कत्‍था यरदन ख़ाड़ ही पुरुब तरा बेतानिया पद्दा नू मंजा, असन दिम यॊहनस आलारिन नॊड़रत'आ लगियस।

²⁹ दोसर उल्‍ला यॊहनस येसुसिन तंग्‍है तरा बरना ईरयस ती बाचस, “ऎरा, ईस धर्मेसी भें‍डो ख़द्दो, ईस दिम सौंसार ही पापन ओथ्र'ओस। ³⁰ ईस आसिम हिकदस, ईसी पत्त नुम ऎन निमन बाचका रहचकन का, ‘आस एंग्‍है ख़ॊख़ा बरदस, लिकिन एंग्‍है ती कोहँस र'अदस, एन्‍देरगेका आस एंग्‍है ती मुन्‍द तिम रहचस।’ ³¹ ऎन आसिन बल्‍ला लिक्‍कन, लिकिन आस इस्राऎल आलर गे दहदर मना गे दिम ऎन अम्मु ती नॊड़रत'आ गे बरचकन।”

³² फेन यॊहनस गोवाह चिच्‍चस, “ऎन नेम्‍हा बॊलतन मेर्ख़ा ती पेरवाँ लेक्‍खा एत्तना अरा आस मइय्याँ ओक्‍कना ईरकादन। ³³ ऎन हूँ आसिन बल्‍ला लिक्‍कन। लिकिन एंग‍न नॆ अम्मु ती नॊड़रत'आ गे तइय्यस, आसिम एंगन बाचस ‘नीन नॆख'आ मइय्याँ नेम्‍हा बॊलतन एत्तना अरा ओक्‍कनन ऎरोय, आसिम नेम्हा बॊलतस ती नॊड़रत'ओस।’ ³⁴ इदन ऎन ईरकन, अरा गोवाह चि'अदन का ईस दिम धर्मेसी ख़द्दस।”

येसुसी पहिल चेलर

³⁵ दोसर उल्‍ला अउरिम यॊहनस तंग्‍है चेलर ती इरबर गने असानिम रहचस। ³⁶ अरा यॊहनस येसुसिन काना ईरियस ती बाचस, “ऎरा, ईस धर्मेसी भें‍डो ख़द्दो।”

³⁷ अबड़ा ऎंड़ चेलर आसी कत्‍थन मेंजर ती येसुस गने चॊंख़्रर। ³⁸ येसुस किर्रिईरियस ती आरिन तंग्‍है गने चॊंख़्रनन ईरियस ती आरिन बाचस, “नीम एन्‍द्रन बेद्ददर?” आर आसिन बाचर, “अना रब्‍बी! नीन एसन र'अदय? (‘रब्‍बी’ ही मने ‘गुरु’।)” ³⁹ येसुस आरिन बाचस, “बरा, ख़ने नीम ऎरोर।” ई बेड़ा मलागूटी पुतबारी चार बजे रहचा। आस एसन र'अदस अदिन आर केरर ती ईरियर, अरा अउला आर आसी गने रहचर।

⁴⁰ यॊहनसी कत्‍थन मेंजर ती येसुस गने चॊंख़्रका आर ती ओर्तोस सिमॊन पतरसी भ‍इय्योस अन्‍द्रेयस रहचस। ⁴¹ अन्‍द्रेयस मुन्‍द तंग्‍है भ‍इय्योस सिमॊनस गने भेंट मंजस ती बाचस, “ऎम मसीसिन ख़क्‍खकादम।” (मसीसिन ‘ख़्रिसतोस’ एन्ने हूँ ब'अनर।) ⁴² अरा आस सिमॊनसिन येसुस गुसन होच्‍चस। येसुस आसिन ईरियस ती बाचस, “नीन यॊहनसी तंग्‍दय सिमॊन हिकदय। नीन ‘कॆफास’ बार'ओय।” (कॆफासिन ‘पतरस’ एन्ने हूँ ब'अनर।)

फिलिप्‍पोस अरा नतन‍ऎलसी मॆख़रना

⁴³ दोसर उल्‍ला येसुस गलिलेया जिला काला गे बिद्दियस। अरा आस फिलिप्‍पोसिन ख़क्‍खियस ती आसिन बाचस, “एंग्‍है गने चॊंख़्र'आ।” ⁴⁴ फिलिप्‍पोस गा अन्‍द्रेयस अरा पतरसी नगरे बॆतसैदा ता रहचस। ⁴⁵ फिलिप्‍पोस नतन‍ऎलसिन ख़क्‍खियस ती बाचस, “नॆख'आ पत्त नू मूसस नॆग नू लिखचकादस अरा धर्मेसी कत्‍था तिंगुर हूँ लिखचकानर, आसिन ऎम ईरकम। आस यॊसॆफसी तंग्‍दस नासरेत पद्दा ता येसुस दिम हिकदस।” ⁴⁶ लिकिन नतनऎलस फिलिप्‍पोसिन बाचस, “नासरेत हिके का! नासरेत ती एकअम बॆस बर'आ ऊंगी का?” फिलिप्‍पोस बाचस, “बरा ती ऎरा।” ⁴⁷ येसुस नतनऎलसिन तंग्‍है तरा बरनन ईरियस ती आसी पत्त नू बाचस, “ऎरा, ईस ओन्‍टा मानिम इस्राऎल आलस, ईसी नू कुटमुटरना मलकी।” ⁴⁸ नतनऎलस येसुसिन बाचस, “नीन एंगन एकासे अख़दय?” येसुस आनाकिर्ताचस, “फिलिप्‍पोस निंगन मॆख़ना ती मुन्‍द अंजीर मन्‍न मूली नू रहचकय ख़ने, निंगन ईरकाचकन।” ⁴⁹ नतनऎलस आसिन आनाकिर्ताचस, “अना गुरु! नीन धर्मेसी ख़द्दय! नीन इस्राऎल ही बॆलय!” ⁵⁰ येसुस आसिन आनाकिर्ताचस, “ऎन निंगन बाचकन, ‘ऎन निंगन‍ अंजीर मन्न मूली नू ईरकन’ ख़ने नीन एंगन पत्त'अदय का? नीन इदिन ती हूँ कोहाँ कोहाँ नलखन ऎरोय।” ⁵¹ येसुस एन्ने हूँ बाचस, “ऎन निमन मानिमन ब'अदन, नीम मेर्ख़न तिसगरका अरा धर्मेसी पैकारिन मेर्ख़ा अरा ख़ॆख़ेल ही मझी नू अड़ार लेक्खा मनवा ख़द्दन एंगा मइय्याँ अरगनन अरा एत्तनन ऎरोर।”