15
पिलातुसी मुन्द येसुस
1 बिज्जा गनेम लॆम मुध नैगर अरा सेयान आलर अरा नॆग सिखाब'उर अरा कोहाँ सभा ता उर्मी आलर सलहा मंजर। फिन येसुसिन खुटताचर अरा आसिन हो'अरकी यहूदिया ही रोमी राजीख़ापुस पिलातुसी ख़ेक्खा नू सोंपचर।
2 ख़ने पिलातुस येसुसिन मेंजस, “नीन यहूदीर ही बॆलय का?” येसुस किर्त'अर बाचस, “नीन ब'अदय अन्ने दिम हवे।”
3 मुध नैगर आसी मइय्याँ नगदे दोस ठेका ब'आलियर। 4 पिलातुस अउरिम आसिन मेंजस, “नीन किर्त'अर मल ब'अदय का?, ऎरा, ईर निंग्है मइय्याँ ई बग्गे दोस ठेका ब'अनर।”
5 लिकिन येसुस किर्त'अर मल बाचस, ख़ने पिलातुस अकबक मंजस।
6 राजीख़ापुस चानुम कट्टना परब ही उल्ला नू ओन्टा गुड़ुरकासिन नॆकन आलर अम्बत'आ बेद्दनर आसिन अम्बा चि'आलियस। 7 अबड़ा उल्ला नू बरब्बस नामे ही ओन्टा गुड़ुरकस रहचस। आस रोमीर ही बिड़दो नू हुलहुली नंजका ओन्टा खोंड़हा ता ओर्त रहचस। आर हुलहुली नू आलारिन लौचका पिटका रहचर। 8 गोंहड़ा पिलातुस गुसन कालरकी मुन्द ता लेक्खा ओन्टा गुड़ुरकासिन अम्बा गे बाचा।
9 पिलातुस आरिन किर्त'अर बाचस, “नीम एन्देर बेद्ददर, ऎन निमा गे यहूदीर ही बॆलासिन अम्बोन चि'ओन का?” 10 आस अक्खस का मुध नैगर येसुसिन इस्गहा ती आस गे सोंपचका रहचर। 11 लिकिन मुध नैगर आलारिन आसिन मेना गे तुतकाचर का आस बरब्बसिन दिम आर गे अम्बोस।
12 पिलातुस आरिन फिन मेंजस, “होले नीम ईसिन यहूदीर ही बॆलस ब'अदर, ईसिन ऎन एन्देर ननोन?”
13 आर चिच्चियार'आ हेलरर, “ईसिन क्रुसa नू ठोक'आ।”
14 पिलातुस आरिन मेंजस, “एन्देरगे, ईस एन्देर दोस नंजकादस?” लिकिन आर अउरिम जॊर ती चिच्चियारते र'आलियर, “ईसिन क्रुस नू ठोक'आ।”
15 ख़ने पिलातुस गोंहड़ा आबोन खुसमारत'अना ही मने ती बरब्बसिन आर गे अम्बियस। अरा येसुसिन कोर्रा ती ल'अरकी क्रुस नू ठोक'आ गे रोमी सैना गे सोंपचस।
सैनर ही येसुसिन भेंसड़'अना
16 सैनर येसुसिन गढ़िया ही भितरी चाली नू होच्चर केरर (अदन प्रिटोरिओन ब'अनर)। अरा असन उर्मी फउदन मीख़ियर। 17 असन आर आसिन भेटांगो ऎख़र'आ किचरी अत्ताचर। अरा आर अच्चोन बिन्डो लेक्खा मोड़चर ती आसी कुक्कु नू अत्ताचर। 18-19 फिन आर आसिन “अना यहूदीर ही बॆलायो!” ब'अरकी मूकलिदरर ती मोंजरा ननरकी भेंसड़'आ हेलरर। आर येसुसी कुक्कु नू डंडा ती लौचर। अरा आसी मइय्याँ तुप्पियर। 20 आसिन भेंसड़ाचर अदही ख़ॊख़ा भेटांगो ऎख़र'आ किचरिन इच्चियर ती आसी किचरिन अत्ताचर। अदही ख़ॊख़ा आर येसुसिन क्रुस नू ठोक'आ गे प्रिटोरिओन ती बहरी होच्चर।
येसुसिन क्रुस नू ठोकना
21 सिमॊन नामे ओन्टा कुरॆनॆ नगरे ता आलस पद्दा तरती बर'अरकी आ डहरे नू कालालियस। आस अलेक्सन्द्रस अरा रूफोसी तम्बस रहचस। सैनर आसिन येसुसी क्रुस आबोन चेड़'आ गे बिट्ठी नू धरचर।† 22 आर येसुसिन गोलगोता नामे अड्डा नू होच्चर। गोलगोता ही माने “खपरोही ही अड्डा”। 23 अरा येसुस गे अंगुर रासी नू गन्धरसb भिड़ाब'अरकी चिच्चर। लिकिन येसुस अदिन मल ओंडस। 24 फिन आर आसिन क्रुस नू ठोकचरc। अरा आसी किचरिन नॆका एन्देर ख़क्ख्र'ओ अदिन अख़'आ गे चिठी टिड्डर ती ख़ट्टररd।†
25 आर येसुसिन क्रुस नू ठोकचर ख़ने पैरी नौ बज्जकी रहचा। 26 अरा आसी दोस चिठीe लिख'अरकी आसी मइय्याँ क्रुस नू लगाबाचर का “यहूदीर ही बॆलस”। 27 आर आस गने ऎंड़ डाकू आलारिन, ओर्तोसिन आसी तीना अरा ओर्तोसिन डेब्बा चोक्ख क्रुस नू ठोकचर।† [ 28 नेम्हा पुथी नू लिख्रका पूरा मंजा, ईद एन्ने ब'ई का, “आस दोसी बेसे बातार'ओस।”]f 29 डहरे नू कालू बर'ऊ आलर भेंसड़'आ लगियर। अरा तम्है कुक्कन नुक'अरकी एन्ने ब'आलियर, “नीन, धर्मेसी मन्दिर आबोन धस'ऊ अरा तीन उल्ला नू कम'ऊ।† 30 नीन क्रुस मइय्याँ ती एत्ता अरा निंगन बछाब'आ।”
31 एन्ने मुध नैगर अरा नॆग सिखाब'उर ताम ताम आसिन भेंसड़ाचर ती बाचर, “ईस नन्नारिन बछाबाचस लिकिन तंगन बछाब'आ पोलदस। 32 इस्राऎल ही बॆलस ई मसीस अक्कु क्रुस मइय्याँ ती एत्तोस बर'ओस होले, ऎम अदन ऎररकी पत्त'ओम।” अरा डाकू आलर नॆ आस गने क्रुस नू ठोकरकाचर आर हूँ येसुसिन भेंसड़ाचर।
येसुसी जिया बिच्छरना
33 लोहाड़ी बारा बजे गोट्टा चक ऊख़ा मंजा केरा, अरा आद तीन बजे गूटी रहचा। 34 ओनबीड़ी तीन बजे येसुस जॊरसरिया चिच्चियारनुम बाचस, “ऎलॊइ, ऎलॊइ लेमा सबख़तानी।” इदही माने, “एंग्है धर्मे, एंग्है धर्मे नीन एंगन एन्देरगे अम्बकय?”†
35 असन हेद्दे र'ऊ जोक्को आलर इदन बुझुर'आ पोल्लर ती बाचर, “ऎरा, ईस एलियसिन मॆख़दस।”
36 आर ती ओर्तोस बुंगनुम बरचस, अरा तूलिन डंडा नू पुज्जयस अरा तिस्सा अंगुर रासी नू चेंदस ती येसुस गे चीपा गे चिच्चस। अरा बाचस, “रहा, ऎरोत, एलियस ईसिन क्रुस ती एत्त'आ गे बर'ओस का मला!”†
37 ख़ने येसुस जॊरसरिया चिच्चियारस ती तंग्है जियन बिच्छरस।
38 धर्मेसी मन्दिर ही परदाg मइय्याँ ती किइय्या गूटी चर्रा ती दुई फड़ा मंजा केरा।† 39 ओन्टा रोमी सैनर ही मुद्धस आसी हेद्दे इज्जका रहचस। आस येसुसिन [चिच्चियारनन] अरा जिया बिच्छरनन ईरियस। ख़ने आस बाचस, “ईस मानिम नू धर्मेसी ख़द्दस रहचस।”
40 जोक्को मुक्कर गेच्छा नू इज्जर ती इदन ऎरा लगियर। अइय्या मगदला पद्दा ता मरियम अरा सन्नी याकॊब अरा यॊसॆसी तंग्यो मरियम अरा सलोमी रहचर। 41 आस गलिलेया नू र'ओ बारी ईर आसी ख़ॊख़ा केरर अरा आसी तेतर-सुसर नंजर। अरा अउरिम बग्गे मुक्कर रहचर, ईर आसी गने येरुसलॆम बरचका रहचर।†
येसुसिन माड़ना
42 आ उल्ला ख़न्न ऎख़ना उल्ला ही मुन्द उल्ला सपड़'अना ही उल्ला रहचा। बीड़ीपुत बारी, 43 अरिमतिया पद्दा ता यॊसॆफस डिढ नंजस ती पिलातुस गुसन केरस अरा येसुसी मॆदन नॆचस। यॊसॆफस गा यहूदीर ही सभा ता ओन्टा मुध आलस रहचस अरा धर्मेस इकला तंग्है आलारिन राजी ननोस अदिन आस पाब ऎरालियस। 44 पिलातुस अकबक मंजस, का आस एन्ने चाँड़हे केच्चस केरस। अरा आस नॆ येसुसिन ठोकनन ऎरा ख़ॊजालिया आ सैनर ही मुद्धासिन मीख़ियस ती मेंजस, “आस केच्चस का?” 45 सैनर ही मुद्धस ती हलन ख़क्खियस, ख़ने आस येसुसी मॆदन यॊसॆफस गे चिताचस। 46 ख़ने यॊसॆफस ओन्टा दिगहा कफन किचरिन ख़ीन्दियस अरा येसुसी मॆदन एत्त'अरकी अइय्या मुसगियस अरा ओन्टा मसड़ा नू कीदस, एकदा चचड़ी नू पत्तरकी कम्रकीचा। अरा मसड़ा ही बली नू ओन्टा पखनन उर्दियस चिच्चस। 47 अरा मरियम मगदलेनी अरा यॊसॆसी तंग्यो मरियम येसुसी मॆदन एसन कीदर अदिन ऎरालियर।