मरकुस 16

येसुसी उज्‍जा चो'अना

(मत्ता 28:1–8; लूक 24:1–12; यॊ 20:1–10)

¹ ख़न्न ऎख़ना उल्‍ला मुं‍जरा, ख़ने मरियम मगदलेनी अरा याकॊबसी तंग्‍यो मरियम अरा सलोमी गमगमरना इसुंग अरा गमगमरना जिनिस ख़ीन्‍दियर। इदगे का आर कालरकी येसुसी मॆद नू नलभा ओंगोर। ² आर हप्‍ता ही पहिल उल्‍ला एतवार पैरी, बीड़ी अरगो बारी मसड़ा तरा केरर। ^3-4 अरा डहरे नू ताम तामिम कछनख्र'आलियर, “नमा गे मसड़ा ही बली ता पखनन नॆ ताड़'ओ?” आ पखना नगदे कोहाँ रहचा। लिकिन आर अंड़सियर ती उर्दका पखनन ताड़रका ईरियर।

⁵ आर मसड़ा ही भितरी केरर, ख़ने ओन्‍टा जॊंख़ासिन पं‍डरू किचरी अत्तका तीना चोक्‍ख उक्‍का ईरियर ती इल्चियर। ⁶ आ पैकस आरिन बाचस, “अमा एल्चा, नीम क्रुस नू ठोकचका नासरेत ता येसुसिन बेद्ददर। आस इसन मलकस। आस केचका ती उज्‍जा चॊचस। आसी कीदका अड्डन ऎरा। ⁷ अक्‍कुन नीम कला, चेलारिन अरा पतरसिन तेंगा का आस निमन ती मुन्‍द गलिलेया कालालदस, असन नीम आसिन ऎरोर, एकासे आस केचका मुन्‍द निमन बाचकाचस।”

⁸ आर मसड़ा ती उरखर ती बोंगर केरर, एन्‍देरगेका आर अकबकरर अरा इलचका ती बुदिरियर केरर। औंगे आर इलचका ती नॆकन हूँ एन्‍देर हूँ मल बाचर।

येसुस आसी संगेर गे ऎथ्रदस

(मत्ता 28:9, 10; यॊ 20:11–18; लूक 24:13–35)

[ ⁹ हप्‍ता ही पहिल उल्‍ला एतवार ख़ॆर चींख़ना बेड़ा येसुस केचका ती उज्‍जा चॊचस, अरा आस मुन्‍द मरियम मगदलेनी गे ऎथ्रस, अदही म‍इय्‍याँ ती सात गोटंग नादन आस ओथ्रकाचस। ¹⁰ आद कालरकी आसी चेलारिन इदन तिंगिया, नॆ चींख़ा ओलख़ालियर। ¹¹ एकाबारी आर मेंजर का येसुस उज्‍जा चॊचस अरा आसिन आद ईरिया, लिकिन आर इदन मल पत्ताचर।

¹² अदही ख़ॊख़ा येसुस तंग्है दुई झन संगेर पद्दा तरा कालालियर ख़ने, आर गे ऎथ्रस, लिकिन आर आसिन चिन्‍ह'आ पोल्‍लर। ¹³ आर किर्ररकी बछरकर गे इदन तिंगियर। लिकिन आर आरिन मल पत्ताचर।

येसुस चेलारिन आनदस

(मत्ता 28:16–20; लूक 24:36–49; यॊ 20:19–23; त‍इ 1:6–8)

¹⁴ ख़ॊख़ा अबड़ा ग्यारा चेलर मं‍डी ओना गे उक्‍कियर, ख़ने येसुस आर गे ऎथ्रस। अरा आर ही जिया मल भेदना अरा मल पत्त'अना ही चड्डे आस आरिन केप्‍पस। एन्‍देरगेका आर आसी उज्‍जा चॊचका ही ख़ॊख़ा आसिन ईरकारिन मल पत्ताचर।

¹⁵ अरा आस आरिन आनियस, “सौंसे ख़ॆख़ेल नू कला अरा उर्मी आलर गे दौ कत्‍थन मेन्‍त'आ। ¹⁶ नॆ पत्त'अरकी एंग्‍है नामे नू नॊड़र'ओस आसिन धर्मेस बछाब'ओस। अरा नॆ मल पत्त'ओस आसिन धर्मेस दंडे चि'ओस। ¹⁷ अरा पत्त'उर गे इबड़ा चिन्‍हा मनो: आर एंग्‍है आकुस ती नादन ओथ्र'ओर, पुना पुना भखा कछनख्र'ओर। ¹⁸ आर नेर्रेन धर'ओर अरा महुरन ख़प्‍पोर होले हूँ आर एन्‍देर हूँ मल मनोर। अरा आर बिमरहर म‍इय्‍याँ ख़ेक्खा उइय्‍योर होले आर कोड़े मनोर कालोर।”

धर्मेस येसुसिन मेर्ख़ा हो'अदस

(लूक 24:50–53; त‍इ 1:9–11)

¹⁹ ख़ने उर्बा येसुस आर ही गने कत्‍था कछनख्रका ही ख़ॊख़ा धर्मेस येसुसिन मेर्ख़ा होच्‍चस, अरा आस धर्मेसी तीना चोक्‍ख उक्‍कियस। ²⁰ अरा चेलर उरखरकी उर्मी अड्डा नू दौ कत्‍थन मेन्‍ताचर। अरा उर्बस आरिन अकबक नलख नन्‍त'अना नू आर ही गने नलख ननालियस। इबड़ा नलख गुट्ठी ई कत्‍थन मानिम साबित नंजा।] आमेन।