26
येसुसिन धर'आ गे मोका बेद्दना
1 येसुस इबड़ा उर्मी कत्थन बाच ख़च्चियस ती तंग्है चेलारिन ब'आ हेलरस, 2 “नीम अख़दर ऎंड़ उल्ला ख़ॊख़ा कट्टनाa ही परब र'ई। आ उल्ला नू मनवा ख़द्दन ऎन क्रुस नू अरग'आ गे धरतार'ओन।”† 3 तहाँ मुध नैगर अरा यहूदी सेयान आलर कैफस नामे कोहाँ नैगासी एड़पा नू ख़ॊंड़रर। 4 अरा ताम ताम कछनख्र'आ हेलरर का नाम येसुसिन एकासे ठक'ओत धर'ओत ती पिटोत। 5 लिकिन आर ब'आलियर, “परब ही उल्ला नू मला, एन्ने अम्बन मना का आलर नू हुलहुली चो'ओ।”
बेतानिया नू ओन्टा आली येसुसिन गमगमरना इसुंगन तुन्दी
6 एकाबारी येसुस बेतानिया पद्दा नू सिमॊन नामे आलासी एड़पा नू रहचस, एकास मुन्द खसरा रोगियस रहचस, 7 ओन्टा आली पंडरू पखना ही संजगी नू नगदे दाम ही जटामासी ही अर्रगा गमगमरना इसुंग ओन्द्रा बरचा। अरा आस मंडी ओना गे उक्काचस ख़ने, आद येसुसी कुक्कु नू इसुंगन तुन्दिया।† 8 इदन ईरयर ती चेलर ख़ीसारर ती ब'आ हेलरर, “ई गमगमरना इसुंगन एन्देरगे एन्ने नठाबातारा? 9 ई इसुंग गा बग्गे दाम ती बीसरकी र'ओ दने, अरा इदन कीड़र गे चितार'आ ओंगालिया।”
10 इदिन अक्खस ती येसुस आरिन बाचस, “इदिन एन्देरगे दिकदिकाब'अदर? ईद गा एंगा गे दौ नंजकी र'ई। 11 कीड़र गा निम्है गने सगरघड़ी र'अनर, लिकिन ऎन निम्है गने सगरो मल र'ओन।† 12 ईद एंग्है माड़ना ही सपड़'अना नू एंग्है मॆद नू मुन्द तिम इसुंगन तुन्दकी र'ई। 13 ऎन निमन मानिम ब'अदन का सौंसे ख़ॆख़ेल नू एसन एसन दौ कत्था तेंग्र'ओ असन असन ईद ही नलख ईद ही सुरता गे तेंगतार'ओ।”
यूदस येसुसिन धर'आ गे सहाड़ा नन्दस
14 ख़ने यूदस इसकारियॊत नॆ बारा चेलर ती ओर्तोस रहचस, आस मुध नैगर गुसन केरस ती बाचस, 15 “ऎन येसुसिन निमा गे धरत'आ गे सहाड़ा ननोन होले, एंगा एन्द्रा चि'ओर?” अबड़र आस गे तीस गोटंग चाँदी ही ढिबा जोखचर ती चिच्चर।† 16 ख़ने आस आ बारी ती आर गे येसुसिन धरत'अना नू संगे चि'आ गे मोका बेद्दा हेलरस।
येसुस चेलर गने कट्टना ही ओन्ना-मॊख़नन मॊख़दस
17 बिगर बिदगी असमा ही परबb ही मुन्द उल्ला येसुसी चेलर बरचर ती आसिन मेंजर, “नीन एन्देर बेद्ददय ऎम एसन कट्टना ही ओन्ना-मॊख़नन निंगा सराजमा ननोम?”
18 ख़ने आस आरिन बाचस, “नगरे नू ओन्टा आलासी गुसन कला अरा ब'अके, ‘गुरुस ब'अदस का एंग्है ओक्ताचका बेड़ा हेद्दे अंड़सिया, ऎन एंग्है चेलर गने निंग्है एड़पा नू कट्टना ही ओन्ना-मॊख़नन मॊख़ोन?’” 19 औंगे चेलर येसुसी बाचका लेक्खा नंजर अरा कट्टना ही ओन्ना-मॊख़ना ही सराजमा नंजर।
20 बीड़ी पुत्तिया ख़ने येसुस बारा चेलर गने आ एड़पा नू बरचस। अरा कट्टना ही ओन्ना-मॊख़ना ओना गे उक्कियस। 21 अरा आर ओनालियर ख़ने येसुस आरिन बाचस, “ऎन निमन मानिम ब'अदन, निम्है ती ओर्तोस एंगन धरत'आ गे संगे चि'ओस।” 22 इदन मेंजर ती आर हेन्दवारर केरर। अरा आर ओर्त ओर्त आसिन ब'आ हेलरर, “अना गुरु आस ऎन हिकदन का?” 23 आस किर्त'अर बाचस, “एकास एंग्है गने तंग्है ख़ेक्खन डुभा नू नूत्तकादस, आस एंगन धरत'आ गे संगे चि'ओस।† 24 धर्मेसी कत्था तिंगुर नेम्हा पुथी नू एंग्है पत्त नू एन्देर लिखचकानर अन्नेम मनवा ख़द्दन ऎन खे'ओन दने। लिकिन नॆ एंगन धरत'आ गे संगे चि'अदस आसी मुंज्रना नगदे भयभयान मनो। आस मल कुन्द्रका होले, आस गे दौ रहचा।” 25 ख़ने आसिन धरत'ऊ यूदस बाचस, “अना गुरु, ऎन हिकदन का?” येसुस आसिन बाचस, “हाँ, नीन बाच ख़च्चिकय अन्ने दिम हवे।”
26 आर मॊख़ालियर ख़ने, येसुस असमन होच्चस ती धर्मेस गे धन्यवाद नंजस। फिन अदिन किच्चियस, अरा चेलर गे चिच्चस अरा बाचस, “ओंदा, मॊख़ा, ई असमा एंग्है मॆद हवे।”
27 फिन आस ओन्टा डुभा नू अंगुर रासिन होच्चस, अरा धर्मेस गे धन्यवाद नंजस। अरा आस अदिन आर गे चिच्चस ती बाचस, “नीम ओर्मर इय्या ती ओना। 28 एन्देरगेका ई अंगुर रासी एंग्है ख़ॆंस हवे, एकदा ऎन बाहत'आ गे कालालदन, ई ख़ॆंस ती ऎन बग्गे आलारिन पाप ती अम्बा गे धर्मेस नंजका गच्छरकन बड़ियर ननोन।† 29 ऎन निमन ब'अदन का ऎन एम्बासी राजी नू निम्है गने पुना अंगुर रासी ओन्ना गूटी इदन ई तरिका ती मुन्द इकला हूँ मल ओनोन।”
30 फिन आर ओन्टा ओहमा डंडी पाड़ियर अरा उरखर ती जैतून परता तरा केरर।
पतरस येसुसिन बलदन ब'अनन येसुस मुन्द तेंगदस
‘ऎन महरासिन पिटोन,
अरा आसी भेंडो ही गोंहड़ा भिड़कार'ओ कालो’
एन्ने नीम ओर्मर एंगन अम्बोर ती इन्ना माख़म बोंगोर क'ओर। 32 लिकिन ऎन केचका ती उज्जा चॊचका ख़ॊख़ा निमन ती मुन्द गलिलेया कालोन, अरा असन निमन भेंटार'ओन।”† 33 लिकिन पतरस आसिन बाचस, “ओर्मर निंगन अम्बोर होले अम्बोर नेकअन, ऎन मल अम्बोन।” 34 ख़ने येसुस आसिन बाचस, “ऎन निंगन ओन्टा मुदे कत्था ब'अदन, इन्नम ई माख़म ख़ॆर चींख़ना ही मुन्द नीन तीन हॆल एंगन बलदन ब'ओय।” 35 पतरस आसिन बाचस, “एंगा निंग्है गने खे'अना मनो दिम होले हूँ, ऎन इकला हूँ निंगन बलदन मल ब'ओन।” एन्नेम नन्ना ओर्मा चेलर हूँ बाचर।
येसुसी गेतसेमनी नू गोहरारना
36 फिन येसुस आसी चेलर गने गेतसेमनी नामे ओन्टा अड्डा नू बरचर। येसुस तंग्है चेलारिन बाचस, “ऎन बिन्ती नना कालालदन, एंग्है किर्रना गूटी इसन उक्का र'आ।” 37 तहाँ आस पतरस अरा जेबदयुसी ऎंड़ ख़द्दारिन तंग्है गने होच्चस केरस। आस दुक्खे अरा खिलपत मना हेलरस। 38 अरा आस आरिन बाचस, “ऎन नगदे हेन्दवारदन, अरा ईद एन्ने हवे ऎन खे'अना ही बेड़ा नू र'अदन। नीम इसन र'आ अरा एंग्है गने एज्रका र'आ।”
39 अरा आस कटी गुना मुन्द केरस। अरा आस ख़ॆख़ेल नू मुही पाब खत्रस ती बिन्ती नंजस, “एंग्है बंगायो, मना ओंगो होले, ई खिलपत एंगा अम्बो मना। लिकिन एंग्है मने लेक्खा मला, निंग्है मने लेक्खा मनन।” 40 फिन आस बरचस अरा चेलारिन ख़न्द्रना ख़क्खियस ती आस आरिन एज्जस अरा पतरसिन बाचस, “औंगे नीम ओन घड़ी हूँ एंग्है गने एज्रका र'आ पोलकर का? 41 ऎन एन्देर बाचकन अदिन नीम नना गे गा बेद्ददर, लिकिन अदिन नन्ना बेसे निमा सवंग मलकी। औंगे एज्रका र'आ अरा बिन्ती नना का निम्है बिड़दो नू इन्द्रिइम बर'ओ होले नीम छेक'आ ओंगोर।”
42 आस फिन दुसर खेप किर्रिम बिच्चियस अरा बिन्ती नंजस, “अना एग्है बंगायो, ई खिलपत एंग्है बिगर ओंडका मल टाड़र'ओ होले, निंग्है मने दिम मना नेकअन।”
43 आस फिन बर'अरकी आरिन ख़न्द्रना ख़क्खियस, एन्देरगेका आर मथलारका केरकाचर। 44 औंगे आरिन अम्बियस ती आस अउरिम केरस ती आस मुन्द ता लेक्खम तिसर खेप गोहरारस।
45 ख़ने आस बरचस ती चेलारिन बाचस। “अक्कु ख़न्द्रते र'अरकी ख़न्न ऎख़ोय का? ऎरा, एंग्है दुक्खे सारना ही बेड़ा अंड़सिया केरा। मनवा ख़द्दन एंगन धर'आ गे ओर्तोस पपहा आलारिन संगे चि'आ कालदस। 46 चो'आ, क'ओत, ऎरा, एका ओर्तोस एंगन धर'आ गे संगे चि'अदस आस हेद्दे बर'आलदस।”
यूदस येसुसिन धरत'अदस
47 येसुसी एन्ने ब'अना गनेम बारो चेलर ती ओर्तोस यूदस बरचस। आसी गने तलवार अरा सोट्टा धरचका ओन्टा कोहाँ गोंहड़ा बरचा। आरिन मुध नैगर अरा सेयान आलर तइय्का रहचर। 48 यूदस एन्ने चिन्हा चिच्का रहचस का “ऎन नॆकन चोंखोन आसिम येसुस हिकदस। आसिन धरके हो'अके।” 49 यूदस लॆम बरचस ती येसुस गुसन केरस, “अना गुरु! जोंहार!” बाचस ती येसुसिन चुंखियसc। 50 येसुस आसिन बाचस, “अना संगी, एका नलख गे नीन बरचकादय, अदिन नना।” ख़ने आर येसुसिन धरचर अरा गुड़चर। 51 आ बारी येसुसी संगेर ती ओर्तोस तंग्है तलवारन ओथ्रस ती कोहाँ नैगासी जॊंख़ासिन खोत्तस। लिकिन आसी ख़ेबदा लेका खंडरा।
52 येसुस आस ती बाचस, “निंग्है तलवारन खाप नू उइय्या, एन्देरगेका नॆ तलवार ती ल'अनर आर तलवार ती पिटतार'ओर। 53 नीन एन्देर बलदय का ऎन एंग्है बंगासिन गोहरार'आ ओंग्दन, अरा आस मेर्ख़ा पैकर ही बारा फउदन ती बग्गे तइय्योस चि'ओस दने? 54 लिकिन नेम्हा पुथी ता लिख्रका आद पुरा मना गे एन्ने दिम मन्ना र'ई।”
55 तहाँ येसुस गोंहड़ा आबोन बाचस, “ऎन गा उर्मी उल्ला धर्मेसी मन्दिर नू निम्है गने सिखाब'आ लिक्कन। ख़ने नीम एंगन मल धरचकर। नीम डाकू आलारिन धरना लेक्खा एंगन धर'आ गे तलवार अरा सोट्टा धर'अरकी बरचकादर। 56 लिकिन इबड़ा उर्मी इदगे मंजा का धर्मेसी कत्था तिंगुर नेम्हा पुथी नू एंग्है पत्त नू लिखचका कत्था पूरा मनो।”† ख़ने उर्मी चेलर अम्बियर ती बोंगर केरर।
यहूदी कोहाँ सभा ही मुन्द येसुस
57 फिन अबड़र येसुसिन कोहाँ नैगस कैफस गुसन होच्चर। असन नॆग सिखाब'उर अरा सेयान आलर ख़ॊंड़रका रहचर। 58 लिकिन पतरस गेच्छा ती येसुसी ख़ॊख़ा ख़ॊख़ा कोहाँ नैगासी चाली गूटी केरस। अरा भितरी केरस ती एन्देर मनो अदिन ऎरा गे धर्मेसी मन्दिर ख़ापुर गने उक्कियस।
59 अक्कुन मुध नैगर अरा गोट्टा यहूदी कोहाँ सभा येसुसिन पिटत'आ गे आसी बिड़दो नू गोवाह बेद्दना नू लक्की रहचा। 60 नगदे आलर आसी बिड़दो नू ठकना गोवाह चि'आलियर, लिकिन आर ही गोवाह ओन्टम मल रहचा। छेद्दे नू ऎंड़ आलर बरचर, 61 आर बाचर, “ऎम ईसिन एन्ने ब'अना मेंजका र'अदम, ‘ऎन धर्मेसी ई मन्दिर आबोन धंस'आ ओंग्दन, अरा तीन उल्ला नू ऎन कम'आ ओंग्दन।’”†
62 ख़ने कोहाँ नैगस इज्जस ती बाचस, “नीन इन्द्रिइम किर्त'अर मल चि'अदय का? इबड़ा आलर निंग्है बिड़दो नू एन्देर गोवाह चि'अनर?” 63 लिकिन येसुस कलेकले रहचस। ख़ने कोहाँ नैगस आसिन बाचस, “ऎन निंगन उज्जना धर्मेस ती किरिया मॊख़दन का नीन धर्मेसी ख़द्दय मसी हिकदय होले नीन उज्जना धर्मेस ती किरया मॊख़ा।”
64 ख़ने येसुस बाचस,† “नीनिम बाचकय चिच्चकय अन्ने दिम हवे। लिकिन ऎन निंगन इदिन हूँ ब'अदन का, अक्कु ती नीम मनवा ख़द्दन एंगन उर्मी नू सवंग उइय्यू धर्मेसी तीना चोक्ख उक्का ती राजी नन्नन ऎरोर। अरा नीम एंगन मेर्ख़ा नू चरियो तरा बदाली ती एत्तनन ऎरोर।”
65 येसुसी ई ब'अनन मेंजस ती कोहाँ नैगस तंग्है बरमारनन ऎद'आ गे तंग्है किचरिन चर्रियस, तहाँ बाचस, “ईस धर्मेसी निंदा नंजकादस, अक्कु नमा गे ईसी बिड़दो नू गोवाह ही एन्देर चाड़ र'ई! ईस धर्मेसी बिड़दो नू तंगन धर्मेसी लेक्खा जोक्खचस, ई ब'अनन नीम मेंजकर, 66 ईसी पत्त नू नीम एन्देर सोचदर?” आर ओर्मर बाचर, “ईस गुन्हस हिकदस, ईसिन पिटना दिम मनो।”† 67 ख़ने आर आसी मुंही नू तुप्पियर ती आसिन घुसियाचर, अरा नन्नर थपड़ाचर ती बाचर,† 68 “अना मसी, एमन मुन्द तेंगना ती ब'आ का निंगन नॆ लौचा?”
पतरस येसुसिन बलदन ब'अना
69 आ बारी पतरस बहरी चाली नू ओक्कालियस। अरा ओन्टा जॊंख़ पेल्लो आसी गुसन बरचा ती बाचा, “नीन हूँ गलिलेया जिला ता येसुस गने रहचकय।” 70 आस ओर्मर ही मुन्दहारे “ऎन बलदन नीन एन्देर ब'अलदी” बाचस ती जिधचस।
71 फिन आस बहरी बखड़े नू केरस। ख़ने नन्ना जॊंख़ पेल्लो आसिन असन एररकी हेद्दे इज्जका आलारिन बाचा, “ईस हूँ गा नासरेत पद्दा ता येसुस गने रहचस” 72 आस किरिया मोक्खस ती अउरिम जिधचस, “ऎन आ आलासिन बलदन।”
73 अरा जोक्को बेड़ा ख़ॊख़ा असन इज्जका आलर पतरसिन अउरिम बाचर, “नीन मानिम अबड़ा आलर ती ओर्त हिकदय, एन्देरगेका निंग्है कत्था ती लग्गी का नीन गलिलेया जिला ता हिकदय।” 74 ख़ने पतरस तंगन सर्प'आ अरा किरिया मॊख़ा हेलरस, “ऎन आ आलासिन बलदन।” अरा लॆम ख़ॆर चींख़िया। 75 ख़ने पतरस गे येसुसी आ बाचका कत्था सुरता बरचा, “ख़ॆर चींख़ना ही मुन्द नीन तीन हॆल ऎन निंगन बलदन ब'ओय।” अरा आस बहरी केरस ती चींख़ियस।