12
येसुस गे ख़न्न ऎख़ना उल्ला ही मइय्याँ अदिया र'ई
1 आ बेड़ा नू येसुस ख़न्न ऎख़ना उल्ला नू ख़ल्ल गुट्ठी नू मन्नुम काला लगियस। अरा तंग्है चेलर गे कीड़ा लग्गिया, ख़ने आर बालन तोंखा तोंखा मॊख़ा हेलरर।† 2 फरिसीर इदिन ईरियर ती ब'आ हेलरर, “ऎरा, निंग्है चेलर एन्ने नलख ननालनर एकदा ख़न्न ऎख़ना उल्ला ही नॆग ही बिड़दो र'ई।” 3 येसुस आरिन बाचस,† “नीम नेम्हा पुथी नू एन्देर पढ़चकर अदिन सुरता मल नन्दर का? इकला दाऊद बॆलस अरा तंग्है संगेर कीड़ा रहचर, ख़ने आस एन्देर नंजस? 4 आस धर्मेसी एड़पा नू कालरकी नैगस धर्मेस गे दाँड़े नंजका असमन मोक्खस, अरा तंग्है संगेर गे हूँ चिच्चस, एकदन मॊख़ना मूसासी पॆसका नू नैगारिन अम्बरकी नॆका हूँ नॆग मल्ला।† 5 अरा एन्देर नीम मूसासी नॆग नू मल्ला पढ़चका का नैगर ख़न्न ऎख़ना उल्ला धर्मेसी मन्दिर नू तंग्है नलखन नन्ना ती ख़न्न ऎख़ना उल्ला ही नॆगन चाड़ना ती हूँ आर गे बदी मल लग्गी?† 6 लिकिन ऎन निमन ब'अदन, एकास इसन र'अदस आस धर्मेसी मन्दिर ती हूँ कोहाँ र'अदस। 7 नेम्हा पुथी एन्ने ब'ई, ‘ऎन सोग्गे ऎरनन पत्तारदन दाँड़े गुट्ठी अरगनन मला।’ इदही मनेन नीम अक्का होले बदी मलका आलारिन बदी मल टिड़'ओर दने।† 8 मनवा ख़द्दन एंगा हूँ ख़न्न ऎख़ना उल्ला नू एन्देर एन्देर नन्ना र'ई, अदही फैसला नना गे अदिया र'ई।”
ख़ैका ख़ेक्खा आलासिन उजग'अना
9 फिन येसुस असलेक ती उरखस ती आर ही गोड़हा एड़पा नू कोरचस। 10 अइय्या ओन्टा आलस रहचस, आसी ख़ेक्खा ख़ैकी रहचा। जोक्को फरिसीर येसुस मइय्याँ बदी टिड़'आ गे आसिन मेंजर, “ख़न्न ऎख़ना उल्ला नू कोड़े नन्ना दौ र'ई का?” 11 ख़ने आस आरिन बाचस, “निम्हैन्ती नॆ एन्ने र'ई? नॆखअय ओन्टे लेका भेंडो र'ई अरा आद ख़न्न ऎख़ना उल्ला गड्डी नू खत्र'ओ क'ओ होले, आस आदिन धर'ओस ती मल ओथ्र'ओस।† 12 लिकिन ओन्टा भेंडो ती आलासी मईन बग्गे र'ई। औंगे ख़न्न ऎख़ना उल्ला नू दौ नलख नना गे मूसासी नॆग चि'ई।” 13 ख़ने आस आ आलस ती बाचस, “निंग्है ख़ेक्खन लमाब'आ।” आस लमाबाचस ख़ने नन्ना ख़ेक्खा लेक्खा कोड़े मंजा केरा। 14 ख़ने फरिसीर बहरी उरखर ती आसी बिड़दो नू चिताबुता नंजर येसुसिन एकासे पिटोत।
येसुस धर्मेसी चज्जिका जॊंख़स
15 इदिन अक्खस ती येसुस असले किर्रिम बिच्चियस, अरा कोड़हे आलर आसी ख़ॊख़ा गुड़ियारर अरा आस आर नू ती बेमरहा ओर्मारिन कोड़े नंजस। 16 अरा आरिन चेताबाचस का तान नॆ हिकदस अदिन अम्बोर तेंगा। 17 आस इबड़न इदगे नंजस का एका कत्थन धर्मेसी कत्था तिंगुस यसायास बाचकाचस आद मनो:
18 “ऎरा, इसन एंग्है जॊंख़स, ईसिन ऎन चज्जिका र'अदन।
ईस एंग्है चोन्हास एकासी ती एंग्है जिया रिझ्र'ई।
एंग्है बॊलतन आसी नू सज'ओन,
अरा आस उर्मी जातियर नू एंग्है नेंवई ही हला तेंगोस।
19 आस नग्गा मल नख्र'ओस महले रिरयार'ओस मला
महले बजार गुट्ठी नू नॆ हूँ आसी कत्थन पोल्लोर मेना।
20 आस लट'ई मंजका जिन्तो लट्टिन मल एस'ओस
महले कुहड़ारना बिल्लिन मल तेभ'ओस।
अरा आस नेंवई आबोन जितना गूटी कड़हाब'ओस।
येसुस दरा बॆलजेबूल
22 तहाँ आलर ओन्टा अन्धहा अरा कोंदासिन, नॆ नाद ती धरताचका रहचस, आसिन आसी हेद्दे ओन्द्रर, अरा येसुस आसिन कोड़े नंजस, अरा आस ऎरा आरा कछनख्र'आ हेलरस। 23 इन्नु ओर्मर धन्धरर केरर ती ब'आ हेलरर, “एन्देर ईस दाऊदसी ख़द्दस मसीस मना ओंग्दस दने।”
24 लिकिन फरिसीर इदिन मेंजर ती बाचर, “ई आलस गा नाद गुट्ठी ही मुद्धस बॆलजेबूल ती नाद गुट्ठिन ओथ्रदस।”† 25 आस आर ही सोचनन अक्खस ती आरिन बाचस, “एकअम राजी तंग्है नू लड़ाई ननी होले आ राजी नठार'ई क'ई। अरा एकअम नगरे महले एड़पा ता आलर तम्है नू लड़ाई नन्नर होले आ नगरे महले एड़पा ता आलर खत्तरनर कानर। 26 अरा सैतान दिम सैतान आबोन ओथ्र'ओ होले आद तंग्हा दिम बिड़दो लड़ाई ननी, होले अदही राजी एकासे कम्रकी र'ओ? 27 अरा ऎन बॆलजेबूल ही सवंग ती नाद गुट्ठिन ओथ्रदन होले, निम्है आलर अबड़न नॆखा सवंग ती ओथ्रनर? औंगे आर निम्है नेंवई ननुर र'अनर। 28 लिकिन ऎन धर्मेसी बॊलता ती नाद गुट्ठिन ओथ्रदन होले ईद ईद'ई का धर्मेस आलर ही जिया नू राजी नन्ना निम्है मझी नू अंड़स ख़च्चिया। 29 एकासे ओर्तस ओन्टा बहंगर आलासी एड़पा नू कोर'अरकी आसी जिनिसन बच्चा ओंग्दस? एका गूटी आस आ बहंगर आलासिन मल हें'ओस हो'ओस, होलेम आस आ बहंगरसी एड़पन बच्चा ओंगोस।a 30 नॆ एंग्है गने मलकी आर एंग्है बिड़दो र'अनर अरा नॆ एंग्है गने नलख मल नन्नर आर एंग्है बिड़दो नू नलख नन्नर।† 31 औंगे ऎन निमन ब'अदन आलर ही उर्मी रकम ही पाप अरा हींड़ना आर गे अम्बतार'आ उंगी, लिकिन नेम्हा बॊलतासी बिड़दो ही हींड़ना आर गे मल अम्बतार'ओ। 32 नीकईम मनवा ख़द्दन एंगा बिड़दो नू इन्द्रिइम कत्था ब'ओस, आद आस गे अम्बतार'आ उंगी, लिकिन नीकईम नेम्हा बॊलतासी बिड़दो इन्द्रिइम ब'ओस, आद आस गे ई सौंसे नू महले बरना सौंसे नू कहियों मल अम्बतार'ओ।†
आलर निमन निम्है कत्था ती अख़'ओर
(लूक 6:43–45)
33 मन्न अदही ख़ंजपा तिम चिन्हर'ई। मन्न बॆस र'ई होले अदही ख़ंजपा हूँ बॆस र'ओ। महले मन्न पयहा र'ई होले अदही ख़ंजपा हूँ पयहा र'ओ।† 34 अना नेर्र लेक्खा बिक्ख उइय्यु आलारो! नीम मलदौ मनरकी एकासे दौ कत्था ब'आ ओंग्दर? एन्देरगेका एन्द्रा जिया नू निन्दकी र'ई आदिम बई ती उरखी।† 35 दौ आलस तंग्है दौ जिया ही दौ कुट्ठी ती दौ नलखन नन्दस, अरा मलदौ आलस तंग्है जिया ही मलदौ कुट्ठी ती मलदौ नलखन नन्दस। 36 अरा ऎन निमन ब'अदन, एका एका अनभनियाँ कत्था आलर कछनख्र'ओर रायबड़ी उल्ला नू आर गे अबड़ा उर्मी कत्था ही लेखा चि'अना दिम मनी। 37 एन्देरगेका नीम निम्है कत्था ही चड्डे बदी मल खत्र'ओर, अरा निम्है कत्था ही चड्डे बदी खत्र'ओर।”
यॊनासी अकबक नलख
38 अक्कु जोक्को यहूदी नॆग सिखाब'उर अरा फरिसीर येसुसिन बाचर, “अना गुरु, निंग्है ती ओन्टा अकबक नलख ही चिन्हा ऎरा बेद्ददम।”† 39 ख़ने येसुस आरिन आनाकिर्ताचस, “मलदौ अरा नन्ना आली गुसन कालू आलर ही परिया ता आलर अकबक नलख ही चिन्हा बेद्दनर, लिकिन धर्मेसी कत्था तिंगू यॊनासी उज्जना नू मंजका अकबक नलखन अम्बरकी आर गे नन्ना एन्देर चिन्हा हूँ मल चितार'ओ।† 40 यॊनास एकासे तीन उल्ला माख़ा कोहाँ इंजो ही कूल नू रहचस, अन्नेम मनवा ख़द्दन ऎन तीन उल्ला माख़ा ख़ॆख़ेल भितरी र'ओन।† 41 निनवे नगरे ता आलर यॊनासी कत्थन मेंजर ती जियन किर्ताचर। अरा ऎरा, इसन ओर्तस यॊनास ती हूँ कोहँस र'अदस। ख़ने रायबड़ी उल्ला नू निनवे ता आलर ई बेड़ा ता आलर गने चो'ओर ती आरिन दोस'ओर।† 42 दखिन देस ता रानी ख़ॆख़ेल ही ओन्टा कोड़ा ती सालोमॊनसी लूर ही कत्थन मेना गे बरचा। अरा ऎरा, इसन सालोमॊनस ती हूँ कोहँस ओर्तस र'अदस। ख़ने रायबड़ी उल्ला नू आद ई बेड़ा ता आलर गने चो'ओ ती ईरिन दुस'ओ।†
मलदौ बॊलता ही किर्रना
(लूक 11:24–26)
43 एकाबारी मलदौ बॊलता आलस ती उरखी ख़ने ख़ैका अड्डा नू ख़न्न ऎख़ा गे अड्डा बेद्दा कुद्दी अरा मल ख़क्खी। 44 ख़ने ब'ई, ‘ऎन एसले उरखकी रहच'अन आ आलस नुम किर्रोन।’ अरा बर'ई ती अदिन छछिन्द अरा ईगका ओथ्रका अरा चेमचेम नू ख़क्खी। 45 ख़ने आद क'ई तहाँ तंगन ती बग्गे मलदौ सात गोटंग नादन उन्दर'ई। अरा अबड़ा अइय्या रस'ई ती मड़'ई, अरा आ आलासी दसा ख़ॊख़ा ता दसा ती बग्गे मलदौ मनी। ई परिया ता मलदौ आलर ही दसा हूँ एन्नेम मनो।”
येसुसी तंग्यो अरा भई
46 एकाबारी आस गोंहड़ा गने कत्था कछनख्र'अम लगियस ख़ने, येसुसी तंग्यो अरा भइय्योर बरचर ती बहरी इज्जर अरा आसी गने कछनख्र'आ बेद्दा लगियर। [ 47 एकअम ओर्तोस येसुसिन बाचस, “ऎरा, निंग्यो अरा निंग्है भइय्योर बहरी इज्जका र'अनर अरा निंग्है गने कछनख्र'आ बेद्दनर।”] 48 लिकिन येसुस आ आलासिन बाचस, “नॆ एंग्है अयंग अरा नॆ एंग्है भइय्योर र'अनर?” 49 अरा तंग्है चेलर तरा ख़ेक्खा टोंहा बाचस ती बाचस, “ऎरा, ईर एंग्है अयंग अरा भइय्योर हिकनर। 50 एन्देरगेका एका ओर्तर एंग्है मेर्ख़ा बंगासी मने लेक्खा ऎकनर, आरिम एंग्है भई अरा एंग्है बहिन अरा एंग्है अयंग हिकनर।”