22
बेंजा मंडी ही जोक्खा ख़ीरी
(लूक 14:15–24)
1 अउरिम येसुस जोक्खा ख़ीरी गुट्ठी ती तेंगा हेलरस। आस बाचस, 2 “मेर्ख़ा राजी ओर्त बॆलस लेक्खा र'ई। आस तंग्दासी बेंजा गे कोहाँ बेंजा मंडी सराजमा नंजस। 3 अरा इकला बेंजा मंडी सराजमा मंजका ख़ने, आस तंग्है जॊंख़ारिन एड्डका आलारिन बेंजा नू मॆख़'आ गे तइय्यस। आर बर'आ मल बिद्दियर।
4 औंगे आस अउरिम तंग्है नन्ना जॊंख़ारिन एड्डका आलारिन तेंगा गे तइय्यस। ‘ऎरा, ऎन मंडी खटच ख़च्चिकादन, मेक्खो अरा डढरका अड्डो गुट्ठी पिट्रकी र'ई, अरा उर्मी सर्चकी र'ई। बेंजा मंडी ओना गे बरा।’ 5 लिकिन आर तुस्सियर अरा तम्है तम्है नलख गे केरर। ओर्तोस ख़ल्ल गे अरा नन्नस ख़ॆंदा पिटा गे किर्रिम बिच्चियर। 6 लिकिन नन्नर एंगरका रहचर आर आसी जॊंख़ारिन धरचर ती कांड़चर अरा पिटियर।
7 औंगे बॆलस कैरारस ती तंग्है फउदन तइय्यस ती अबड़ा पिटुरिन पिटियस अरा आर ही पद्दन बस्सियस चिच्चस। 8 ख़ने आस तंग्है जॊंख़ारिन बाचस, ‘बेंजा मंडी गा सर्चकी र'ई, लिकिन एड्डका आलर जॊगे मल मंजर। 9 औंगे दोप्फा डहरे तरा कला ऎ बग्गे आलर ख़क्ख्र'ओर ओर्मारिन बेंजा एड़पा नू एड़'आ ओन्द्र'आ।’ 10 औंगे अबड़ा जॊंखर डहरे तरा केरर ती कोड़े मल कोड़े एवंदा आलारिन ख़क्खियर ओर्मारिन ख़ॊंड़चर, बेंजा एड़पा पाहियर ती निंदिया केरा।
11 लिकिन एकाबारी बॆलस मदी अड्डा नू ऎरा गे कोर्चस ख़ने, असन आस ओर्त बेंजा किचरी बिगर अत्तका आलासिन ईरयस। 12 अरा आस आसिन मेंजस, ‘अना संगी, नीन इसन बिगर बेंजा किचरी अत्तका एकासे भितरी बरचकय?’ लिकिन आसी बई मल चलख़्रा। 13 ख़ने बॆलस तंग्है जॊंख़ारिन बाचस, ‘ईसी ख़ेक्खा ख़ेड्डेन हें'आ ती बहरी ता ऊख़ा नू हेबड़ा चि'आ, अइय्या चींख़ना दरा पल्ल चब्रना मनो।’† 14 एन्देरगेका एड्रका बग्गे र'अनर, लिकिन चज्जरका जुक्की र'अनर।”
कैसरस गे मालगुजारी चि'अना
15 फेन फरिसीर केरर ती भेंट मंजर ती कछनख्रर का येसुसिन आसी कत्था ती एकासे बझाब'ओत। 16 आर जोक्को तम्है चेलारिन अरा हॆरॊदॆरिनa येसुस गुसन ब'आ गे तइय्यर, “अना गुरु! ऎम अख़दम का नीन उजगो आलय अरा नीन धर्मेसी डहरेन मानी गने तेंगदय, नीन आलर एन्देर सोच'ओर अदही पत्त नू गुनन मल नन्दय, अरा नीन तीना मल ख़ाँड़दय। 17 औंगे एमन तेंगा नीन इदही पत्त नू एन्देर सोचदय, यहूदी नॆग नमन कैसरसb गे मालगुजारी चि'आ गे पॆस'ई का मला?”
18 लिकिन येसुस आर ही चतरा आबोन अक्खस ती बाचस, “नीम उतुरमाड़ू आलारो, एंगन एन्देरगे बिढ़दर? 19 मालगुजारी चि'अना ही ओन्टा ढिबन ऎद'आ” ख़ने आर ओन रोमी ढिबन आस गुसन ओन्द्रर। 20 अरा आस आरिन मेंजस, “ई छपा अरा नामे नॆखअय?” 21 आर आसिन बाचर, “कैसरसी।” ख़ने आस आरिन बाचस, “औंगे कैसरस गे एन्देर चि'अना र'ई अदिन कैसरस गे चि'आ, अरा धर्मेस गे एन्देर चि'अना र'ई, अदिन धर्मेस गे चि'आ।” 22 ख़ने आर येसुसी ई कत्थन मेंजर ती अनचकरर केरर अरा अम्बियर ती किरिम बिच्चियर।
बेंज्रना अरा उज्जा चो'अना
23 अउलम, केचका ख़ॊख़ा उज्जा चो'अना र'अम मलकी ब'ऊ सदुकीरc येसुस गुसन बर'अरकी मेंजर,† 24 “अना गुरु! मूसस एमा गे एन्ने पॆसका चिच्चस का, एकअम ओर्तस बिगर ख़द्द-ख़र्रा ही खे'अदस कादस, अरा आसी तंग्आली उज्जाली होले, आसी भइय्योस गे अदिन बेंज्रना ती केचका तंग्है भइय्योस गे ख़द्द कुन्द्रत'अना र'ई।† 25 ओंग्होन एम्है नू सात भइय्योर रहचर। कोहँस बेंज्रस ती बिगर ख़द्द-ख़र्रा केच्चस केरस चड्डे तंग्है आलिन भइय्योस गे अम्बियस केरस। 26 मझलस अरा सझलस हूँ एन्नेम नंजर, अरा सातियो भइय्योर गुट्ठी इन्नेम बेंज्रर। 27 ओर्मर ती ख़ॊख़ा आ मुक्का हूँ केच्चा केरा। 28 अक्कुन एमन तेंगा, उज्जा चो'अना नू आद सतियो भइय्योर ती नॆखअय मनो, एन्देरगेका आद ओर्मर ही मुक्का मंजकीचा।”
29 येसुस आरिन आनाकिर्ताचस, “नीम नेम्हा पुथी नू उज्जा चो'अना ही पत्त नू एन्देर लिख्रकी र'ई अदिन बलदर अरा धर्मेस एन्देर नना ओंग्दस अदन हूँ बलदर, ई चड्डे नीम अन्नेम मलदौ सोचदर। 30 एन्देरगेका केचका ती उज्जा चो'अना नू आलर अरा आलीर मल बेंज्रनर महले मल बेंजनर। लिकिन आर मेर्ख़ा नू मेर्ख़ा पैकर लेक्खा मनोर। 31 लिकिन केचका ती उज्जा चो'अना ही पत्त नू एन्देर नीम धर्मेसी कत्थन मला पढ़चका का धर्मेस मूसस ती एन्देर बाचस? 32 ‘ऎन अब्राहम अरा इसाक अरा याकॊबसी धर्मे हिकदन।’† आस केचका आलर ही धर्मे मलदस, लिकिन आस उज्जना आलर ही धर्मेस हिकदस।” 33 इदन मेंजर ती आलर आसी तेंगना ती अकबक मंजर केरर।
उर्मी ती कोहाँ पॆसका
34 येसुस सदुकीर ही बईन उट्टस ब'अरकी फरिसीर मेंजर ख़ने, आर ख़ॊंड़रर ती भेंट मंजर। 35 अबड़र ती ओर्तोस नॆ यहूदी नॆग गुट्ठिन दौले अक्खस, आस आसिन बिढ़'आ गे मेंजस,† 36 “अना गुरु! मूसासी नॆग नू उर्मी ती कोहाँ पॆसका एकदा हवे?” 37 अरा येसुस आसिन बाचस,† “नीन निंग्है धर्मे उर्बासिन निंग्है उर्मी जिया अरा निंग्है उर्मी बॊलता अरा निंग्है उर्मी लूर गने चोन्हा नना। 38 कोहाँ अरा मुद्ध पॆसका गा ईदिम हवे। 39 अरा ईद लेक्खा दोसरा पॆसका ईद हवे, ‘नीन निंगन एकासे चोन्हा नन्दय अन्ने निंग्है अर्बा-पर्बारिन चोन्हा नना।’† 40 इबड़ा ऎंड़ पॆसका दिम सौंसे नॆग अरा धर्मेसी कत्था तिंगुर ही मूली हवे।”
मसीस नॆखअय ख़द्दस
41 फरिसीर ख़ॊड्रका रहचर ख़ने, येसुस आरिन मेंजस, 42 “मसीसी पत्त नू नीम एन्देर सोचदर? आस नॆखअय बनस ता हिकदस?” अबड़र आसिन बाचर, “मसीस दाऊदसी ख़द्दस हिकदस।” 43 आस आरिन मेंजस, “होले दाऊदस नेम्हा बॊलतस नू मन्दस ती आसिन एन्देरगे उर्बस ब'अदस। एकासे का,
44 ‘धर्मे उर्बस एंग्है उर्बासिन बाचस का,
नीन एंग्है तीना पक्खे ओक्करकी एंग्है गने राजी नना,
ऎन निंग्है बैरीरिन नास नंज ख़च्चोन।’†