24
ख़ॆख़ेल मुंज्रना ही चिन्हा
1 एकाबारी येसुस धर्मेसी मन्दिर ती उरखस ती कालियस ख़ने, आसी चेलर मन्दिर ही कम्रकन ऎद'आ गे आस गुसन बरचर। 2 येसुस आरिन बाचस, “एन्देर नीम इबड़ा उर्मिन ऎरदर का? ऎन निमन मानिम ब'अदन, उन्दुल ई धर्मेसी मन्दिर उर्मी दिम धसतार'ओ कालो अरा उर्मी पखना अक्कुन र'ई आ अड्डा नू मल र'ओ।”
3 एन्ने बाचका ख़ॊख़ा येसुस चेलर गने जैतून परता केरस। ख़ने आसी चेलर भिनेम आसी हेद्दे बरचर ती बाचर, “एमन तेंगा, इबड़ा कत्था इकला मनो? निंग्है बरना ही अरा ख़ॆख़ेल मुंज्रना ही एन्देर चिन्हा मनो?”
4 अरा येसुस आनाकिर्ताचस, “चिहुंक र'आ, निमन नीकईम अम्बोर ठक'आ। 5 एन्देरगेका नगदे आलर एंग्है नामे ती बर'अरकी ‘ऎन मसीस हिकदन’ ब'ओर ती कोड़हे आलारिन ठक'ओर। 6 अरा नीम लड़ाई अरा लड़ाई ही हलन मेनोर, लिकिन अमके बयार'आ। एन्देरगेका इदही मन्ना चाड़ र'ई, लिकिन ईद मुंज्रना बेड़ा मल्ली। 7 ओन्टा जातियर नन्ना जातियर ही बिड़दो नू, अरा ओन्टा राजी नन्ना राजी ही बिड़दो नू लड़ाई गे चो'ओ। कैनो अड्डा ख़ॆख़ेल नुक्रना मनो, अरा ख़ॆख़ेल नू अड्डा अड्डा अकाल मनो। 8 लिकिन ईद ओर्मा गा खिलपत ही ऒरे मन्ना लेका हवे अरा अउरिम कोड़हे सस्ती बरना र'ई।
9 आर निमन सस्ती नना गे धर'ओर, अरा निमन पिटोर, अरा उर्मी राजी ता आलर नीम एंग्है गने चॊंख़्र'उर र'अना चड्डे निमन बिड़दो ननोर।† 10 आ बारी कोड़हे आलर एंग्है ती किर्रोर अरा ताम ताम धरतार नख्र'ओर अरा ओर्त ईरिब ही बैरी मनोर। 11 अरा कोड़हे ठकवा धर्मेसी कत्था तिंगुर बोंग चो'ओर अरा बग्गेरिन भोड़ाब'ओर। 12 मलदौ ही नीन्दना चड्डे बग्गे आलर ही चोन्हा ऎख़ो क'ओ। 13 लिकिन नॆ तम्है उज्जना ही मुंज्रना गूटी सह'ओर आरिम जनमजुग ही दंडे ती बछर'ओर।† 14 अरा धर्मेसी राजी ही ई दौ कत्था सौंसे ख़ॆख़ेल नू मेन्द्र'ओ का उर्मी राजी ता आलर इदन मेनोर, फिन मुंज्रना अंड़सा ख़च्चो।
15 धर्मेसी कत्था तिंगुस दानियॆलसी बाचका लेक्खा, ‘नीम इकला आ उझड़'अना भंगड़भट्ठ ख़ाँड़ना आलॊन धर्मेसी मन्दिर ही नेम्हा अड्डा नू इज्जका ऎरोर’ (पढ़'उर बुझुर'आ हो'आ),† 16 अउला यूदेया जिला नू र'ऊ आलर परता मइय्याँ बोंके कालके। 17 अरा एड़पा ही बहरी नू र'ऊ आलस तंग्है एड़पा नू एन्द्रा र'ई अदिन ओन्द्र'आ गे अम्बोर काला।† 18 अरा ख़ल्ल नू नलख ननू आलस तंग्है किचरिन हो'आ गे ख़ॊख़ा अम्बोस किर्रा। 19 अबड़ा उल्ला नू ओत्था ऎख़ अरा ख़दमाख़ो मुक्कर गे कल्पारना मनो। 20 गोहरार'आ का पइय्याँ उल्ला मलता ख़न्न ऎख़ना उल्ला निमा बोंगना अम्बो मना। 21 एन्देरगेका फेन नगदे सस्ती मनो का धर्मेस ख़ॆख़ेलन गढ़चका उल्ला ती इन्ना गूटी अन्ने मल्ला मंजका, अरा ख़ॊख़ा हूँ अन्ने सस्ती मल मनो।† 22 उर्बस अबड़ा उल्लन मल घटा ब'अना होले, नॆ हूँ मल बछर'ओर दने। लिकिन तंग्है चज्जिका आलर चड्डे आस अबड़ा उल्लन घटा बाचकादस।
23 फिन नीकईम निमन, ‘ऎरा, मसीस इसन र'अदस’ महले ‘असन र'अदस’ एन्ने ब'अदस होले, आसी कत्थन अमके पत्त'आ। 24 एन्देरगेका जोक्कोर फसकट'ओर ती ‘ऎन मसी हिकदन’ ब'ओर अरा जोक्कोर फसकट'ओर ती ‘ऎन धर्मेसी कत्था तिंगुस’ ब'ओर। अरा बेड़ाब'आ गे आर कोड़हे चिन्हा अरा अजगुत नलख गुट्ठिन ऎद'ओर, मना ओंगो होले धर्मेसी चज्जरका आलारिन हूँ बेड़ाब'ओर चि'ओर। 25 ऎरा, ऎन मन्ना उर्मी कत्थन निमन मुन्द तिम तेंगालदन।
26 औंगे निकईम निमन ब'ओर, ‘ऎरा, आस टुंगरी नू र'अस’ होले, बहरी अमके उरखा, अरा ‘आस एड़पा भितरि कुठली नू र'अस’ ब'ओर होले अमके पत्त'आ। 27 एकन्ने का बिजली लौकारना पुरुब तरती उरखी ती पच्छिम तरा हूँ लौकर'ई, अन्नेम ऎन मनवा ख़द्दासी बरना हूँ मनो।† 28 एसन एसन मरी र'ई, असन गिद्हा गुट्ठी ख़ूंड़र'ई।†
29 अबड़ा उल्ला सस्ती ही ख़ॊख़ा लॆम,
‘बीड़ी अरा चन्दो मल रफ'ओ,
अरा मेर्ख़ा ती बीनको खत्र'आ हेलर'ओ।
धर्मेस मेर्ख़ा नू र'ऊ उर्मी आलॊन नुक'ओस।’†
30 अरा आ बारी एंगा मनवा ख़द्दासी चिन्हा मेर्ख़ा नू ऎथ्र'ओ। तहाँ ख़ॆख़ेल ता उर्मी खुटी ता आलर चींख़'ओर ओलख़ोर। उर्मी आलर मनवा ख़द्दन एंगन मेर्ख़ा नू बदाली नू ती सवंग अरा कोड़हे महबा गने बरनन ऎरोर।† 31 अरा ऎन एंग्है पैकारिन पेंड़हे ही कोड़हे सड़ा गने तइय्योन, अरा आर मेर्ख़ा ही ई गंडा ती आ गंडा गूटी, चरियो खूंट ती एंग्है चज्जिका आलारिन ख़ॊंड़'ओर।
32 अंजीर मन्न ती ई कत्थन सिख्र'आ। अदही गुफरी उरखी अरा अतख़ा ख़ॊरा हिलर'ई होले, नीम अख़दर का बिड़ना उल्ला हेद्दे र'ई। 33 इकला नीम इबड़ा उर्मी कत्थन एन्ने मन्नुम ऎरोर, निमा अख़ना र'ई का एंग्है बरना हेद्दे र'ई। 34 ऎन निमन मानिम ब'अदन, एका गूटी इबड़ा उर्मी कत्था मनो आ गूटी ई परिया ता जोक्को आलर उज्जोर। 35 मेर्ख़ा अरा ख़ॆख़ेल छपर'ओ कालो, लिकिन एंग्है कत्था इकला हूँ मल बदलार'ओ।
एज्रका र'आ
36 एंग्है बरना उल्ला ही पत्त नू धर्मे बंगासिन अम्बरकी नॆ हूँ बलनर। ऎन ख़द्दन अरा मेर्ख़ा ता पैकर हूँ आ बेड़न बलदम। 37 अरा एकन्ने नूहसी बेड़ा नू मंजा अन्नेम मनवा ख़द्दन एंगा बरना बेड़ा नू हूँ मनो।† 38 एन्देरगेका एकासे बया बड़ही ही बरना उल्ला ही मुन्द ती नूहसी कोहाँ डोंगा नू अरगी अरगना गूटी आलर ओना मॊख़ा लगियर, बेंज्र'आ लगियर, बेंजा लगियर।† 39 अरा बया बड़ही बरचा ती आर ओर्मारिन होच्चा आ गूटी आलर गे एन्द्रा हूँ अरो मल लग्गिया। अन्नेम ऎन मनवा ख़द्दासी बरना मनो। 40 आ बारी ऎंड़ आलर ख़ल्ल नू र'ओर, ओर्तोस होर'ओस अरा ओर्तोस अम्ब्र'ओस। 41 ऎंड़ मुक्कर जता ती कस'अत र'ओर, ओर्तो होर'ओ अरा ओर्तो अम्ब्र'ओ।
42 औंगे एज्रका र'आ, एन्देरगेका नीम बलदर का निम्है उर्बस एका उल्ला बर'ओस। 43 लिकिन इदन अख़'आ का एड़पा उर्बस ख़लबर माख़ा एकाबारी बर'ओर अदिन अख़'ओस होले एजरका र'ओस दने, अरा तंग्है एड़पन उम्पा मल चि'ओस दने। 44 औंगे नीम हूँ सपड़ारका र'आ, एन्देरगेका एकाबारी नीम सोच'आ हूँ मल सोचदर आ बेड़ा नू मनवा ख़द्दन ऎन बर'ओन।†
45 नॆ लूरगर अरा असरा जॊगे जॊंख़स र'अदस। उर्बस आसिन नन्ना जॊंख़र गे ठौका बेड़ा नू तम्है ओन्ना-मॊख़नन चि'आ गे असरा नन्दस, फिन आस डहरे ऎका गे कालदस। 46 उर्बस बरदस ती आ जॊंख़ासिन एन्ने नन्ते ख़क्खदस होले उर्बस आस नू रिझ्र'ओस। 47 ऎन निमन मानिम ब'अदन का उर्बस आसिन तंग्है उर्मी आलॊ मइय्याँ जिमा चि'ओस। 48 लिकिन आ मलदौ जॊंख़स तंग्है उर्बस दीरी ती बर'ओस ब'अरकी तंग्है जिया नू ब'ओस 49 ती तंग्है संगे जॊंख़ारिन लौ'आ हेलरस ती उंखुर गने उन्नुम मॊख़नुन र'अदस होले, 50 आ जॊंख़स इकला पाब मल ऎरालदस अरा एका बेड़न बलदस आ बारिम आसी उर्बस बर'ओस 51 ती आस गे कोड़हे दंडे चि'ओस। आस आस गे उतुरमाड़ुर गने हिसा चि'ओस। असन आलर गे चींख़ना ओलख़ना अरा पल्ल चब्रना मनो।