Anxutta Phawlosey Qollasiyasaxituse Anso Woosso
1
Burona sawo
1 Wontoy "Maaquwaye" hidi hidonike Yesuusi Kristosay ansosa maaqe Phawlosekofaara nu indo na'i Xhimootoosekofaara 2 Qollasiyase katamaa yese Kristosaara bidzo maaddhese haylaxitaara esa aadessi e ogiya miindesesaara maaqe indo nayshushe ha woosso nu anxe.
Nuuse ade maaqe Wontoy axuse keenge modhe maxowara modhetiyaray hinuse maaquwaye.
Phawlosey Wonto galatto
3-4 Yesuusi Kristosa hi aadexenikiyara Wonto haylaxita hi eehenikiyara nu siidese gisha hi gisha Wonto nu shi'eniyaka nu Laaxi Yesuusi Kristosaade maaqe Wonto uddi woggaako nu galate. 5 Hi aadexowara hi eehaaray e kaachuttosi afaaka naqutti hinumba kakke gobbo garako. Ye gobboni aade gisha ohesa maaqe modhe odoy hinuko yoodoniya buro siidiko hi yese. 6 Modhe odo hi siido wontiyafa aytiyara Wontoy axuse keenge maxo modhetey aba e maaqenike hi erdo wontiyafa aytiyara ha modhe odoy hi giddaaka aafe be kaxhonike uddi ha saha gara aafe kaxhiyakaara diciyakaarako e yese. 7 Ha modhe odo nuura wolko hantiya yese eehuttese Ephafray hinuko otiko e yese. Esini hi gisha Kristosase bidzi muxhurona hante hantaxuko. 8 Ayaana Geeshi hinuse indo eeha gishani nuuko zeerdiko e yese.
Phawlosey Wonto shidhosa
9 Ye e gisha ye esa nu siido wontiyafa ayti Wontokofa bente eranaara gaxunaara uddi Wonto maxo hi eroronike era hinuse lagussi e ingoronike hi gisha Wonto shi'e dhaddobaanxhiko. 10 Yeydi e maaqo'ayko Laaxuse yese e worgusenike yessiko uddi ogena Laaxe hi magguse, laga bisha modhe hanta hanti aafe beysenaara Wonto erenaara diceshe hi danda'e. 11 Yeydiwo uddi abakona maggana dandadhi hi miimoronikeko keddaydi kuxuttese e osana miimete degexese hi danda'e. 12 Assi fo'e maaqe kaateto giddaaka haylaxitaara wolko ade maaqe Wontoy ingesaa hi shahoronike hinumba mata esako hi galate. 13 Ye esini Wontoy cencha osaafa numba maardi eehuttese be yele kaatetowa nuu e oodo. 14 E yelena wozuttiko cubbose maaro nu degessese.
Kristosay oone maaqenikiyara e hantaara
15 Kristosay bentese danda'uwa Wontoy be bisha maaqesako e beyse. Esini meddhome uddi angussuko. 16 Ye esini afaakani maaqqe sahaaka yeseesiti, benteesitaara bentuwasitaaray, afaaka yese osaara afanunte keengeesitaaray, durkeesitaara maagitaaray uddina meddhuttosi esunako. Wontoni uddi abako e meddhosi esunaara esusaarako. 17 Esini uddi basume buronako e yecha. Uddi abakoy hanke wola ayti e eedhosi esunako. 18 Esini be gara maaqe Wonto zawa axituse qinoko. Uddi abakose buronase be maaqoronike haybowafa dendena achaara bidzoydi hiyuttesaarako. 19 Yeydi e maaddhosi be wontuntey kumena esuka yesoronike Wontoy eetineko. 20 Wontoy suxi mixi gara e gusso suuxuna modhete mati afaakani maaqqe sahaaka yeseesita uddi beera wolko e naddho.
21 Buro Wontokofa zardi hi maxonaara iita hi hantanaara Wonto inxha'esako hi maaqicha. 22 Hattema e yeley axe maaddhi e haydhosunab Wontoy beera wolko hinumba naddhiko e yese. E naddhosini haylaxaara geeshaara haasse keenguwasa mati be buro hinumba uqusesuko. 23 Esini uqusesi kaachuttiyara sekke hanke hiye baaka eedhesesaara maaddhi hi siidese modhe odoy gobbusesesi garafa arto badi hi aadexona oseydi hi yesa'aykoko. Ye modhe odoni ha saha gara yese meddhose uddi ohuttesesako. Tanini Phawlosey ye modhe odose e hantaxuko ta maaddhese.
Phawlosey Wonto zawaxituse hanto hanta gisha
24 Hatte hi gisha essa ta yese maddhana maggako ta magge. E gara maaddhi yese Wonto zawa axitume hissineko Kristosa maddhaafa facechashe ta acho maddhana kunsi ta alse. 25 Wontoy oto modhe odo bidzoni shahe baaka e kumena hinuse ta ohoronike taase e indese adetona Wonto zawaxituse hantaxec maaddhiko ta yese. 26 Ha modhe odoni e aalliciray eruttese danda'uttuwasa maaddhi axukofa olo aachutti decechine hattema hayla maaqe aadexeesituse addeydesesako. 27 Wonto maxoy ye eruttobadechine hatte eruttasi kuxaara woduntiyara Ayhuda maaquwasiti giddaaka an makko malla e maaqenike haylaxituse adduseko. Ye eruttobadechine hatte eruttasi Kristosako. Hatteni hinukaaka e yesesuna Wonto kuxa fuula shahaxe maaqese gobbe keemako hi keenge. 28 Axi be bidzi bidzina Kristosana uuxha axe maaqoronike mahese laga gaxuna uso shi'isiniyara erusisiniyarako Kristosay oone maaqenike nu eruse. 29 Ye esusuko Wontoy orje be osana taaka e hantesuna ye e osa badena keddaysi karduttisine ta gakke.