2
1 Hi gishaara Lodoqiya yese axiti gishaara yeydiwo fetto ta aafusha beedi eruwa axituse uddina aba makko ta karduttenike hi erorosako ta worge. 2 Ta karduttesini u muxhuroy oseydiyara eehana hanke bidzo maaddhi shato badi yesine era aakete degessi e aallicira makkoy eruttese danda'uttuwadi yecho Wonto maxo u eroronikeko. Ye esini Kristosako. 3 Gaxusaara erasaara e aaketey aachutti yesesi Kristosa da'aako.
4 Esume yeydi ta hinesi ooneni be zeere sooqussi hinumba qaarusoppe hidiko. 5 Hinukofa zardi yesesa maaddhakoni ta muxhuro hi garako ta gaddese. Hi hamoy modhe wogana yesesani maaqqe Kristosa gara hi oseydese miimo aadexoy taase e gelloosuna maddiko ta yese.
Facete keenguwa yeso Kristosana yese gisha
6 Yoonase Laaxi Yesuusi Kristosa hi ettesenike esaara wolko bidzo maaddhi yesuwayte. 7 Esuna xhabho datti eedhi hi oseydesenike dicuwayte. Hi erdesenike hi aadexona miindi ee'uwayte. Lagussi esa galatisine yesuwayte.
8 Axi be qinowafa yeso gisha kesse eranaara e maresi baasa qaarusuttusso zeerenaara ooneni hinumba beeko aykeesume hinumba naddhi kakkuwayte. Ye usiti Kristosana kaachutti eedhase u maaddho baane axi gaddese woganaara ha sahakofa eedhese erunxunaarako u yese. 9 Wonto wontuntey be kumena axe maaddhi e yesesi Kristosaakako. 10 Hinuni afanuntesaara adetosaara qino maaqe Kristosaara bidzo hi maaddhosuna kundesesa maaddhiko hi yese. Ye esumeko hinumbani hi kakke.
11 Esuna maaddhiko kuchena maaquwasa gada hi utto. Kristosana gada hi uttoosuna cubbaxe maaqe hi oonuntey ooxuttiko e yese. 12 Ye esini hi xhamaquttoniyaka Kristosaara wolko mooguttiko hi yese. Esa haybowafa densa Wonto osa aadexena esaara wolko assi haybowafa dendiko hi yese. 13 Cubbo hi hantoosunaara cubbaxe maaqe hi oonuntey gada utte dheeddosunaara haydhiko hi yecha. Hattema Wontoy Kristosaara wolko en'a hinumba matiko e yese, ni cubboni uddi "Attuwaye" hidiko e yese. 14 Esini nimba luukichashaara inxha'ichashaara maaqe diizutti yese wogay nuukofa oycichosha ucci suxi mixi gara mismaarena caddi suxxhi nu garafani densi oossiko e yese. 15 Afana maagitaara afana aditaara suxi mixi gara iisshi u maagete hossi uso tiddhiya etti hanti e beyso.
16 Yoonase ooneni hinumba hi miyona oo'oyne hi usshuna, massalita oo'oyne agunnay haga ee'usune kuxusoosa oo'oyne sanbata kuxusoosi gisha densi hi gara yaadhoppe. 17 Ye usiti uddi buro gara yoonesa u bishesha baaka beese aade maaquttuwasso. Kristosako beese aadey. 18 Maaquwa ogena shenedhi afaase woosaxita hade Wontokeysi kuxena cee'utte axi ooneni wooma hi ekkuwannike hinumba maheesume hinumba naddhi kakkuwayte. Ye e bisha axi be beene harajhiya woxxhi gelli go'uwasaara achoshe massiyarako e cee'utte. 19 Garase qino maaqe Kristosaara wolko abani muho keenguwasso. Ye qino badenako e kumena kaatonaara xhabhonaara hanke wola aykiya yesesaara kaxa miya yesesaara maaqe garay e dice. Wontoy ye ogenako garay dicoronike e mahe.
Yesineni maaqqe haydhi Kristosaara wolko yese gisha
20 Ha sahakofa eedhese woga garafa Kristosaara haydhi shahuttesesa hi maaddho geede hinne abasuna ha saha garafa shahutto baannike e maxona durkutti hi hante? 21 Ye woossitini "Ha esa aytofuna, ha esa daddadhofuna, ha esa dollofuna" yeydi hineesitako. 22 Ha usiti be uddina axiti woossokofaara erakofaara be eedhese gisha hanta gara feyshishine baaneesitako. 23 Ye axi woossitini "Ha ogena Wonto kuxuwa! Ye ogena shenaxe maaquwa! Ne garani ha esuke maddhunxuwa!" yeydi hinesako. Ye e bisha woossiti aade modhe woossoko u bishe, bishuttuwaye baaka axiti be achoy col'e hanta garafa bemba kaforonike mahese danda'uttuwasso.