Anxutta Phawlosey Qollasiyasaxituse Anso Woosso
Do'o
Ha woosso anxutta Phawlosey e diizosi Isiya wudiya yecha Qollasiyase katamaa aadexeesitusuko. Yenniya Rooma kaati oomoko u aqicha. Modhe odo u siidosi Phawlosekofa e maaddho baanne ye katama axe maaqe Ephafrakofako. E diizosini 60 Maaro beraakako yeydiko e maxutte.
Phawlosey tufiya yesune Ephafray odo esuko e aandine Qollasiyasiya aadexesiti giddaa zaade erunxi e gellonike e siido. Ye zaade erunxi aba e maaqesa modhussi adduse e dheeddakoni ususe sekke zaade erunxi gisha e mato uttaafa erese danda'ako nu danda'e. Ha e oomo benteesiti ye zaade erunxi maxo ayteseesitako.
1. Be bishana bishana yese gate wogaara Muse wogaara kafe; 2. Aafey beene abakowara kuchey ayke abakowaray uddi iita e maaqe gisha axi garase e worguse abako kunxe dheebe; 3. Afaase woosaxe hade Wontokeysi kuxe; 4. "Kristosawoy elluwasso" hidi e gara fede era kose; 5. Axi modhussi gaxxhi hanto abakowara gate wogaara etti esuna kiidhutteko e maaqicha.
Ha e wonfa diizutta zaade erunxituse lam'i xhabhoko yesa. Ayhudaxiti woga gara eedha zaade erunxaara Grikaxiti be qinowafa kesse zaade era gara eedhesesaarako.
Phawlosey ye usita inxha'isine burona Kristosako kedda kedda eyse. Axi looloronike e worgusesi Kristosawo baaka abani e gara kose e worgusuwanikeko e adduse. Ye e geede aadexeesiti be aadexo hantana beysese waakidi yese uso e worgusesa be bishana bishana yese axita densiko e ohe.
Ha fissharoy shahuttesi ichichi godoko:
1. 1:1-8 Burona sawaara galataara
2. 1:9 - 2:5 Kristosay hanto hantaara Phawlose hantaara
3. 2:6 - 3:4 Kristosana bente kille yeso gisha
4. 3:5 - 4:6 Kristosaara wolko waakidi yese e worgusesa
5. 4:7-18 Aallicira sawo