2
Ayaana Geeshi hoddhosa
1 Ayhudaxiti kuxicho Phenxheqoste hidi hisso massala wontey elline be uddina bhikkilutti bidzi godo u yecha. 2 Yahani masso badi u yesune orje gubabe bishe katoy afaafa yoodi u yecho zawa e kundo. 3 Tama looxhe bisheshi ususe e bento. Ye esini be looxhena looxhena u bidzi bidzi gara e utto. 4 Ayaana Geeshini u uddiyaka kundi ususe indonike fede fede wude nuunana zeere u ayto.
5 Ha saha gara yese axitaafa uddi yoodasitaara Wonto jhasshi kuxe Ayhudaxitaaray Yerusaleeme yenniya u yecha. 6 Ye katoni be siidoniya laga axiti u bhikkilutto. U wude nuuna nuuna u zeerusune siidi u buro e baadinne 7 dhonxhidi miccini "Ha yeydi zeereesiti uddi Galila wude axita maaquwaye? 8 Hinne nuni nu yelutto wude nuunana nuunana u zeerusune, hay, siya nu yesesi waakidini? 9 Nuni Phartiyafa, Mediyafa, Elameexhiyafa, Masphotoomiyafa, Yuudafa, Qaphadoqiyafa, Phanxhosiyafa, Isiyafa, 10 Frigiyafa, Phanfiliyafa, Gibxhiyafaara Qarana da'aa yese Libiya wudiyafaara, yeydiwo Roomafani yooda Ayhudaxitaara Ayhuda gelli Ayhuda maaddhasitaara maaquwaye, hay, haya yesesi? 11 Yeydiwo Qerxhesefani Arabiyafani yoodasiti nuni yesako nu yese. Hay, nuni nu uddina Wontoy hanto orje hantita nu nuunana nuunanako ha usiti zeerusune nu siine" yeydi u hido. 12 Yaha micci be ohesa dheeddi "Ha esi am?" yeydi sekke hanke wolko uydo.
13 Usaafani bidzi bidziti "Weyne daanako usshi u goojheshe!" yeydi hissine u dhaaddo.
Phexhrosey zeerdo zeere
14 Ye woggani Phexhrosey tamma bidzi anxuttaasitaara eedhi be kato keddaysi yaha yecha axituse "Hinuno Ayhudaxito, uddi Yerusaleeme yeseesito! Hinuse ta zeere bidzi zeereko yesa, haysuwayte! 15 Hinuse e bishenike ha geriti goojhutto baasso. Ketiyafa haga hay haydzi saateko. 16 Hanzo ha maaddhasi olo kaayaxi Iyu'eelena ohuttechashuko.
17 Ye esini
'Wontoy yeydiko e hine. "Aallicira woggaa ta Ayaanako axi gara uddi ta gusse. Hi nayshi bushoy na'i kaayoko u zeere, hi na'i mullay harajako u haraje, asanxi cimiti afukkako u afukke.
18 Ye woggaani ta maaliti garani maaqqe ta maakiti gara ta Ayaanay guforonikeko ta mahe, kaayoni u zeere.
19 Afaani micushe abakita ha sahaakani du'use yeragita ta beyse, suuxaara tamaaray yeydiwo cuwwa tulatulowaray e bente.
20 Orjiyara kuxuttesesaara maaqe Laaxi wontay yooneesume buro qoossi cenchaaka e arte, agunnani suuxe e bishe.
21 Wontoy be sunxe xheygeesita uddina maarako e maare" yeydiko Wontoy hido'
hidiko Iyu'eele hidecha.
22 Isra'eele axito, ha ta ohesa siwwayte! Hinuni erenike Wontoy Nazrataxi Yesuusa badena micushe hantaara du'use abakowarako e hanto. Ye esuna Wontokofa e maaqenike e addusso.
23 Wontoy 'Yeydiko e maaqe' hidi be hidosunaara buronawo e maaqenike be erichoshunaara ha axeni garsi hinuse e indo, hinunini wogana baa geri kuchiya garsi indi hi suxhusso hi wodhusso. 24 Maaqe baa hayboy esa iisshi ayti yaha gadese dandadho baa gisha Wontoy haybo osa iisshi e denso. 25 Dawiteni e gisha ohisine
'Wonto uddi woggaako ta buro ta beene, taara e yese gishani sekke hanke hiwwasso.
26-27 Ha e gishako ta muxhuroy maddine ta unxhureni galatana kundese. Ta lubboni haybo godowa ne dhagguwa gishaara ne haylaxi boossaa samoronike ne mahuwa gishaara tani ta yeso aallo gobbisineko ta yese.
28 Yeso ogeni taa ne erusso, taara ne yesesuna magganako ta kundese' yeydiko e hido.
29 Nuundo na'axhito! Eruttese nuu yella ade Dawitey haydhi e mooguttonikiyara e boossani hatte aallo nu da'aaka e yesenikiyara hinuse yeydi ta zeerusune aachuttese zeere maaquwasso. 30 Dawitey kaayaxe be maaqicho gishaara Wontoy esuse
'Ne nayshaafa bidzoko ne kaateto godowa ta uttuse'
hidi e caadho caaqo be ericho gishaara 31 maaqese hinesa burussi erdi Kristosa denxo gisha haybo godowa e attuwanikiyara e achoy sanguwannikiyarako e zeerdecha.
32 Ha Yesuusa Wontoy haybowafa e denso, nunini nu uddina ye esuse atoko. 33 Ye e geede esini Wonto oshisha kuxana e utto. Adey 'Ingako ta inge' hidi gobbusecho Ayaana Geeshe Yesuusay esukofa etti ha hi beenesaara ha hi siinesaara e anso. 34-35 Dawitey beese afaa kesso baasso. Maaqe baaka zeerisine
'Ta Wontoy ta Laaxuse "Ne iilaxita iisshi ne toke oomo ta mahoro makko kuxa godo ta oshishaa uttuwa" yeydiko e oto' hidi e hido.
36 Yebo, ha hi suxhecho Yesuusa Wontoy Laaxaara Mesihiyara e matonike aadenawo Isra'eele axiti kumena ha esa eruwaye!" yeydi e hido.
37 Ye esani axiti siidoniya zeerey ususe gelline u muxhuroy dolutto. Usini Phexhrosesaara fede anxuttaasitusaara "Nuundo na'axhito! Am nuuse bishesha?" yeydi u oycco.
38 Phexhroseni "Wontoy hi cubbo 'Attuwaye' hidi hiyorosa, hi cubbo dhaddi maaquwayte! Yesuusi Kristosa sunxuna hi bidzi bidzina xhamaquttuwayte! Wontoy inge Ayaana Geeshuko hi ekke. 39 Nu Laaxi nu Wontoy 'Maaqoko e maaqe' hidi gobbusese gobboy hinusaara hi nayshushaarako. Yeydiwo zara yeseesituseni uddi ooneseni beeko e xheydeseesitusuko" yeydi e hido.
40 Laganani fede badena zeerdi "Ha dooma maaqe yelutte gara yoone yaa'aafa hinumba maaruwayte" hidi hissine minsi e oto. 41 Phexhrosey otosa siidi ettasiti u xhamaqutto. Ye wonteni haydzi kuma elleesiti u gara kosutto.
42 Usini anxuttaasiti erusicho erana, wolla bidzo maaqena, Laaxi qamete miyena, Wonto shi'ena u miingicha. 43 Yenniyani anxuttaasituna micushe laga abakowara du'useesitaaray hantutto gisha uddi axiti u jhassho.
44 Aadexeesitini uddina wolko bidzo maaddhi u yecha, u keengesini uddi kooxe e maaqicha. 45 Be sahitani be keengichoshitani zal'i u bidzi bidzise e worguse aallo miijhe u ingicha. 46 Uddi wonteni bidzi muxhurona Wonto Hayla Zawa qeyshi giddaa u bhikkilutticha, wol zawa hanti Laaxi qamete u muucha, maggisine geeshi muxhurona yesine be kaxa u muucha. 47 Wontoni u galatticha, axi uddi ususe modhetewo keengicha. Wontoni looleesita wontana wontana u gara e kossicha.