3
Bidzi doomay loollosa
1 Bidzi wonte Phexhrosiyara Yohanisiyaray Wontoy shi'utticho wogga odduppi saatena Wonto Hayla Zawaa u hangicha. 2 Be yeluttowafa ayti dooma maaqe bidzi adey e yecha. "Bishachi Suma" hidi hisso Wonto Hayla Zawa qeyshi sumaa uddi wonte miijhe e shi'orosa axiti iddi oodi u gadicha. 3 Ye adeni Phexhrosiyara Yohanisiyaray Wonto Hayla Zawa qeyshe gelese uysune beedi miijhe uso e shidho.
4 Usini e aafiya caddi beedi Phexhroseni "Hanke nuuko beewwa!" hidi e hido. 5 Esini bidzi abako esuse ingesa esa u bisshine gobbisine usuko modhussi e beedo.
6 Phexhroseni "Miijhe keenguwasso, maaqe baaka ha ta keengesako neese ta inge. Nazrataxi Yesuusi Kristosa sunxuna dendi qaadhuwa" hidi e hido. 7 E oshichi kuche ayti e denso. Yenniyawo e tokiyara e qicamilitiyaray miindo. 8 Afaani doondi dendi e eedho, sekke hanke hame e ayto. Qaadhisineni, afaa doongisineni Wonto galatisine usaara wolko Wonto Hayla Zawaa e gello.
9 Axitini uddina Wonto e galatusuniyara e qaadhusuniyara beedi 10 "Bishachi Suma" hidi hiyutte Wonto Hayla Zawa qeyshi suma da'aa utti miijhe shi'ichashi esa maaqichosha u erdo. E gara maaddhasunani miciyakaara dhonxhiyakaara u yecha.
Phexhrosey Wonto Hayla Zawaa mato zeere
11 Ye adeni "Phexhrosiyara Yohanisiyara dakkuwasso" hidi usaara e yesune orjena micishine axi uddi "Salamone kara" hidi hiyutte godo wolko usuko u woxxho.
12 Phexhroseni ye esa beedi "Isra'eele gerito, ha esuna ame hi mice? Hanno ha adey nu osana oo'oyne uddi wogga Wontosewo nu maxicho gisha e qaadhoronike nu matosa hinuse e bisshiniya nu aafiya caddi hi beene? 13 Nuwadiyaxhiti Wontoy, Abrahaame Wontoy, Yissaaqe Wontoy, Yayqoobe Wontoy garsi hi indechoshaara Philaxhosey 'Birchoko ta birche' hidi hidakoni e buro hi inxhadhechoshaara be yele Yesuusa keddaysi e kusso. 14 Maaqe baaka hinuni haylani gizoni maaqesa inxhadhi axe woddhecha axe Philaxhose birchoronike hi shidho. 15 Yeso ingichashe hi woddho. Wontomay esa haybowafa e denso. Nuni ye esuse atoko.
16 Ha axi Yesuusa aadesesesa e maaqicho gisha buro hi beedechoshaara hi erichoshaaray loolli e osaxhosi e sunxunako. Esuna be degesso aadexonako hi buruwaka kumena e loollosi.
17 Gerito! Hade hinumba ahichashituke hinunini erdo badi hi hantonike erako ta ere. 18 Hankeydese ogenako Wontoy burona be kaayaxituna uddi 'Mesihey maddha efako e ekke' hidi beydecho kaayoy aaloronike e mato.
19-20 Yoonase Laaxi sekke hi killoonge bera hinuse ingoronike, burussi hinuse be massecho Yesuusi Kristosa e anxoronike hi cubboy attoronike cubbo hante dhagguwayte, hanke Wontoko maaquwayte. 21 Olowafa ayti hayla maaqe kaayaxituna Wontoy zeerdechonike uddi ha sahay e killoongoro aallo Mesihey afaa deceko esa e worguse. 22 Museni zeerisine
'Ni Laaxi ni Wontoy taanke yese kaayaxe hinusuko hi ommaafa e denxe, e ohesa aba e maakoni e uddina siwwayte.
23 Ye kaayaxi ohesa siwwa axi uddi axi garafa shahuttiko e baane' yeydiko e hidecha.
24 Yeydiwo Samu'eeliyafa densi e geede yecha kaayaxiti ooneni uddi ha woggasuko u zeerdecha. 25 Hinuni kaayaxiti otechosha ettaasitako. Wontoy Abrahaamese 'Neekofa yeluttesunako ha saha gara yese axi ommay uddi u suuzutte' hidi zeerisine nimba yella adiyaxhituse yenniya caadhi e indechoshi hatte hinusuko. 26 Be yele be denso geede burona Wontoy e ansosi hinusuko, ye esini hi bidzi bidzina hi iitetiyafa hinumba mati suuzesuko" yeydi e hido.