Anxuttaasiti Hanto Hanta
1
Yesuusay afaa kessosa
1-2 Tawofilose, buro neese ta diizzosaaka Yesuusay hante aytosaafa densi xhardi be ansosituko Ayaana Geeshuna durkutti woosso be indo geede wona afaa be hando aallo e erusosaara e hantosaara uddi neese diizziko ta yecha.
3 Lagana maddhundi be haydho geede dendi en'a be yesenike laga ogena addeydi ususe bemba e beyso. Oyddi tammi wonte giddaaka addaa benti Wonto kaatetey aba e maaqesa usuko e oto. 4 Bidzi wogga usaarani wolko be yechoniya "Hinuko ta otecho nuwadey hinumba gobbusese gobbo kakkuwayte baaka, Yerusaleeme katamaafa kessofita. 5 Yohanisey waaxunako xhamadhi yecha, hinunimay oddhe wonta geedeko Ayaana Geeshuna hi xhamaqutte" yeydi hissine usuko e oto.
6 Usini bidzi godo esaara bhikkilutti yesine "Nu Laaxo, Isra'eelese kaate sekke mati ne essesi hattiya?" hidi u oycco. 7 Yesuusani "Yeenke yesesi an agunna, an bera e maaqenike nuwadeko beese be adetona mahesa. Hi erorosa hinumba mato baasso. 8 Maaquwaye baaka Ayaana Geeshi hi gara yooneniya osako hi degexe, Yerusaleeme katamaani Yuuda wudiyani Samariya wudiyani uddi sahay matoynani ta gisha oheesitako hi maaqe" yeydi e hido.
9 Ye esa be oto geedeni u beesunewo wokke wokkeydi e hando, dhumaa gelli bente e dheeddo. 10 E kesusuneni afaa tiddhissi beya u yesune booxi maa'o maadhese lam'i axi hay u da'aa eedhi 11 "Hinuno Galila axito, abasun afaa beesine hi ee'e? Afaa e hangusune hi beedo Yesuusay afaa e hangusune hi beedonikewoko yekke maaddhi e yoone" yeydi usuko u oto.
Matiyasey xharuttosa
12 Ye e geedeni e erusichoshiti Zayte Bakkaafa hanke Yerusaleeme u maaddho. Ye bakkani Yerusaleemefa bidzi kiilo meetireko e zare. 13 Yoodini essa be yecho godo fooqiya u kesso. Ye usitini Phexhrose, Yohanise, Yayqoobe, Indiraase, Filphoose, Toomaase, Bartelemoose, Matoose, Ilfiyose yele Yayqoobe, biyade wudese eedhecha Simooniyara Yayqoobe yele Yuudaarako u maaqicha.
14 Ye usiti be uddinawo bidzi muxhurona uddi wogga gafe baaka Wonto shi'ese u bhikkilutticha. Bidzi bidzi indowaxhitaara Yesuusayndo Maaramiyaray yeydiwo Yesuusayndo na'axhitaaray usaara u yecha.
15 Yenniyani bidzi wonte Phexhrosey xhiixe lam'i tamme elle aadexeesiti buro eedhi 16 "Nuundo na'axhito! Yesuusa aytecha gerita durta Yuuda gisha Ayaana Geeshi Dawite badena Hayla Fissharowa ohuttecha katoy aaleko e worgusicha. 17 Yuuday nuura bidzo maaddhi nu hante hantase shahaxuko e maaqicha" hidi e hido.
18 Ye Yuudani iita hanta hanti e wooma miijhe etti saha e woondo. Be deemonani undi giddaafa dhudhi e gawwo basini uddi kessi wora gutto. 19 Yerusaleeme yechashitini uddi ye esa u siido. Hinneko ye sahay u nuunana "Akeldaama" hidi e xheygutto. Ye e bircheni "Suuxi saha" hidi hiyoko.
20 Phexhroseni sekke "Ye esini yeydi e maaddhosi Zingale Fissharowa
'E zaway kaya maaquwaye! Ooneni essa yessoppe'
assi fede godo
'E maagete feday ekkuwaye' yeydiko e diizuttese.
21-22 Hatte Yesuusaara wolla kessi nu gelichoniya nuura yechashaafa ye esini Yohanisey esa xhamadhosaafa ayti afaa e kesso aallo nuura wolko yecha axitaafay bidzi nuura wolko e denxose ato maaqeko esa e worguse" yeydi e hido.
23 Ye e geede lam'i axita u uqusso. Ye usini Barsabase oo'oyne Yostose sungicha Yoosefiyara Matiyasiyarako u maaqicha. 24-25 Wontoni shi'isine "Uddi axi muxhuro ere Laaxo, Yuuday biya e worgusso godo handosi baliya ha marose anxuttase maaddhi maagetesa ha lam'ukaafa ne xhardesesa nuu beysuwa!" yeydi u shidho. 26 Hixhani u olline Matiyase e etto, esini anxuttecha tamma bidzi gara e kosutto.