Yohanise Modhe Odo
1
Katoy axe maaddhosa
1 Uddi abakoy badesune buro katoy e yecha. Ye katoni Wonto da'aa e yecha. Ye katoni Wonto e maaqicha. 2 Esini uddi abakoy badesune buro Wonto da'aa e yecha. 3 Uddi abakoy meddhuttosi esunako. Meddhuttassaafa uddi bidzi abakoni esa baaka meddhuttasi baasso. 4 Esini yesona kundesesa maaqusune ye yesoni axuse fo'e e maaqicha. 5 Ye fo'eni cenchaakako faqiya e yese. Cenchani fo'e fetto iichuwassho.
6 Bidzi Yohanise sungesi Wontoy woosso axi e yecha. 7 E ohete axiti be uddina fo'e aadexorosa fo'ey aba maaqenike e gisha ohese e yoodo. 8 Yohanisey fo'e gisha ohese e yoodosa baaka beese fo'e maaquwadiko e yecha. 9 Esawoy aade fo'e maaqe fo'ey uddi axuse fo'e ingesi ha saha gara yoowiya e yecha.
10 Ye fo'eni ha saha gara e yecha. Ha sahay meddhuttosi beese esuna maaddhessakoni ha saha axiti esa ere u dheeddo. 11 Esi be axituko e yoodosa baaka e axiti esa efe u inxhadho. 12 Maaquwaye baaka bemba ettasituse uddi yeydi hiyoni bemba aadesaasituse Wonto nayshe u maaqoronike godo e indo. 13 Ye usitini Wontokofa u yeluttosa baaka axi bohiyafa acho maxowafaara col'afaara yelutto baasso.
14 Katoy axe e maaddho, nu giddani e yesso. Wontoy axuse keenge maxo modhetiyara aadiyaray essaaka kundine bidzi yeley biyade da'aa keenge kuxakewo e kuxa fuulani nu beedo.
15 Yohaniseni e gisha zeerisine " 'Ta geede yoonesi taame buro yechashe e maaqe gisha taame garoko e gare' yeydi ta otechoshi hay ha esako" yeydi be kato keddaysi e oto.
16 Wontoy beese kundi gardesesaafa nuuse uddi base hanti sekke kossi kossi modhe e hanto. 17 Wonto wogay Muse badenako e ingutto. Wontoy axuse keenge maxo modhetiyara aadiyaramay Yesuusi Kristosa badenako e bento. 18 Wonto beedesesi koolona baasso. Esaara wolla shibhi hidese Wonto maaqe bidzi e yelewoko esa addusa.
Xhamaqicha Yohanisey oone maaqesa
Mat 3:1-12; Mrq 1:1-8; Luq 3:1-8
19 Ayhuda afana maagiti Yerusaleeme katamaafa kahinitaara Lewaxitaara xhamaqicha Yohaniseko woosso ansi "Neni oonewa?" hidi u oycusho. 20 Yohaniseni "Tani Mesihe maaquwasso" hidi sekke hanke hido badi be aade e oto. 21 Woosaxitini "Hinne neni Elaasiya?" hidi u oycco. "Oo'o, tani Elaase maaquwasso" hidi e mato. "Hinne 'E yoone' hidi hiyuttecha kaayaxi nemba?" hidi uydo. "Oo'o, tani kaayaxi maaquwasso" hidi e hido.
22 "Hinne neni oonena? Woosso neeko nuu ansa geruse nu ohoronike neni neese nemba ooneydini ne hine?" hidi uyne 23 esini "Kaayaxi Isayasey otonike ' "Laaxi oge naquwayte" yeydi hissine saha melaa uwwara axi kato' yeydi hiyuttechay tambako" yeydi e hido.
24 Woosso handechashiti Farasaxitaafako u maaqicha. 25 Usini "Hine Mesihe oo'oyne Elaase oo'oyne kaayaxe ne maaquwasa ame ne xhamaqe?" hidi u oycco.
26 Esini "Tani waaxunako xhamaqe. Maaquwaye baaka hi eruwasako hi giddaaka eedhesa. 27 Esini taame geedeko e yoone, tani fetto e kobha tufe bircheshe ellesesa maaquwasso" yeydi e mato.
28 Haanxhi uddi yeydi e maaddhosi Yohanisey essa xhamaqicho Yordanose waaxuse qoossi kese bade yese Biitaniya katamako e maaqicha.
Wonto dore
29 Geede wonte Yohanisey Yesuusay beeko yoonesa beedi "Hay ha saha gara yese axi cubbo densi ooxe Wonto dori ha esako. 30 'Ta geede yoonesi taame buro yechashe e maaqe gisha taame garoko e gare' yeydi ta otechoshi ha esako. 31 Tanini esa eruwadiko yecha. Maaqe baaka esi Isra'eelaxituse addeyoronike yoodi waaxuna xhamaqiyako ta yese" yeydi e hido.
32 Yohaniseni sekke ateysine "Ayaana Geeshi afaafa hade woyyake hoddhi e gara uttusune ta beedo. 33 Tanini taase esa eruwadiko yecha. Maaqe baaka waaxuna ta xhamaqoronike tamba ansasi ohisine 'Ayaana Geeshi hoddhi e gara uttusune ne beenesi esako Ayaana Geeshuna xhamaqesi' yeydi taako otiko e yecha. 34 Yeydi e maaqusune beediko ta yese. Ye e gisha tani Wonto yele e maaqenike esuse atoko" yeydi e hido.
Lam'i geritaara Yesuusaara
35 Geede wonte Yohanisey be erusicho lam'i geritaara sekke ye godowa e yecha. 36 Yesuusay yeyna garesa beedi "Hay Wonto dori!" yeydi e hido. 37 Ye e erusicho lam'i geriti e otosa siidi Yesuusa geede u aadho.
38 Yesuusani be geede ye lam'i geriti yoowiya yesesa maaddhi beedi uso "Am hi worge?" hidi e oycco. Usini "Rabbe! Ayaw ne yese?" hidi uydo. ("Rabbe" yeydi hiyoy "Eruseyo" yeydi hiyoko.)
39 Yesuusani "Hana yoodi beewayte" yeydi hido. Hinne esaara handi aya e yesesa u beedo. Ye wonte yenniya esaara wolko u decco. Ye woggani tammi saate ellesa e maaqicha.
40 Yohanisey otosa siidi Yesuusaara handecha lam'ukaafa bidzi Simoone sungicha Phexhrosese esindo na'e Indiraaseko e maaqicha. 41 Ye Indiraasey burona beyndo na'i Simooneko handi "Mesiheko nu degesso" hidi e oto. ("Mesihe" yeydi hiyoy "Kristosa tishuttesesa" yeydi hiyoko.) 42 Ye e geede Indiraasey Simoone Yesuusako e oodo. Yenniyani Yesuusay Simoone aafiya caddi beedi "Neni Yoona na'i Simooneko, ha e geede sekke Keefako ne sunge" yeydi e hido. ("Keefa" yeydi hiyoy "Phexhrose" oo'oyne "Shoollo" yeydi hiyoko.)
Filphoosiyara Natina'eeliyara xheyguttosa
43 Geede wonte Galila wude hamese e wordo. Filphoosiyara muti "Taara yoowwa" hidi e hido. 44 Filphooseni hade Indiraasekiyara Phexhrosekiyara Beetesayda katama axuko e maaqicha.
45 Filphooseni Natina'eeleko handi "Musey be woga fissharowaka kaayaxiti be kaayo fissharowa diizechoshako nu degesso. Esini Yoosefe na'i Nazrate katamaxi Yesuusako" yeydi e hido. 46 Natina'eeleni "Nazrate katamaafa modhe abakoy bentese danda'aa danda'e?" hidi oycco. Filphooseni "Hana yoodi beewwa!" hidi hido.
47 Yesuusay Natina'eeley beeko yoonesa beedi "Doomete keenguwa aade Isra'eelaxe hidi hissoosi ha esako" hidi e gisha e hido. 48 Natina'eeleni "Ay taa ne ericha?" hidi oycco. Yesuusani "Filphoosey neeko otosume e buro belese oomo ne yesuneko ta beedecha" hidi e hido. 49 Yenniyani Natina'eeley "Laaxo, neni Wonto yeleko, neni Isra'eelaxituse u kaatuko" hidi e hido.