4
Humbayey Yesuusa naadhi beedosa
Mat 4:1-11; Mrq 1:12-13
1 Yesuusay Ayaana Geeshuna kundi Yordanose waassaafa dhaddi maaddhine ye Ayaana Geeshi saha melaaka durti etti hando. 2 Oyddi tammi qamani wontani Humbayey naadhi beesune yaha e dooddo. Yeenxhi aallo abani e muudo baa gisha aallicira gara naayey esa oycco.
3 Humbayey Yesuusa "Wonto yele maaqo'ayko ha shuche 'Boora maaquwaye' hidi hiwwa!" yeydi e hido. 4 Yesuusani "Wonto katowa 'Axi yesesi booranawo maaquwasso' hidiko e diizuttese" hidi hissine e mato.
5 Ye e geede Humbayey Yesuusa keddaydese godowa etti kessi ha saha gara be kaatetona kaatetona yese wudita uddi aafe qibhena beysi 6 "Ha esi uddi taasuko inguttese. Tanini ta eeheesuse ingesuko ta danda'e. Ha e gisha haanxho uddi iitana moddhese kuxa fuula keenge wudita neese ingako ta inge. 7 Neni ta buro akkiruwa, uddi neesuko e maaqe" hidi e hido. 8 Yesuusani "Wonto katowa 'Ne Laaxuse ne Wontose akkiruwa, esawo kuxuwa' hidiko e diizuttese" hidi e hido.
9-11 Ye e geede hatteni Humbayey Yesuusa Yerusaleeme aandi Wonto Hayla Zawa qinowa kessi e esso. Esini "Wonto katowaka 'Niya u kaforonikeko Wontoy be woosaxituko e ohe, ne tokey shuchi gara oxheesume be kuchenako niya wokke u ayke' yeydiko e diizuttese. Ha e gisha, mee, Wonto yele maaqo'ayko hayafa sahaa doonguwa" hidi e hido. 12 Yesuusani "Hayla Fissharowa 'Ne Laaxi ne Wonto naadhi beedofuna!' hidiko e diizuttese" hidi e mato.
13 Humbayeni Yesuusa laga ogena naadhi be beedo geede fede bissheshe wogga be degexoro aallo datti dhaddi e hando.
Nazrataxiti Yesuusa inxhadho
Mat 4:12-17; 13:53-58; Mrq 1:14-15; 6:1-6
14 Yesuusani Ayaana Geeshi osana kundi Galila wudiya hanke e yoodo. E odoy ye wude uddi sinto. 15 Ayhuda Bhikkilo Zawaa gelli e erusicha. Ye e erusoosuna uddi esa kedday kedda u hisso.
16 Ye e geede Yesuusay essa be diccecho Nazrate e hando. Zage be lossoke sanbata wonte Ayhuda Bhikkilo Zawaa gelli geeshi fissharo zeerusese e dendine 17 usini kaayaxi Isayase fissharo u indo. 18 Esini e xhaassafa birshi
"Wonto Ayaanay ta garako yese, jhi'ituse modhe odo ta ohoronike taa tisshiko e yese, tufutteseesituse u birchuttoronike bal'ituse u beyoronike, ususe ta ohorosa maaketeseesitani shawo ta kessoronikeko ta anxuttese.
19 Yeydiwo Wonto axe loolusese modhe bera ta ohoronike anxuttiko ta yese"
yeydi hine godo degessi e zeerusso.
20 Ye fissharo hanke xhaaxhi yaha maraxuko indi e utto. Ye Bhikkilo Zawaa yese axi aafey uddi e gara yecha. 21 Esini "Hatte ta zeerususune hi siido Hayla Fissharowa zage ohuttechashi hay hatteko hi buro e itto" hidi e hido.
22 E gisha be uddina sekke hanke modhewo u zeericha. Iitana sooqe zeere e zeerdine micci "Ha esi ha Yoosefe na'e maaquwaye?" hidi uydo.
23 Yesuusani ususe "Hinuni taako 'Doo, neno dhaliyade, nemba loolusuwa!' hidi hiinesaara yeydiwo 'Qifirnahoome ne hantoydi hissune nu siidosa mee ha ne wudiyani hantuwa!' hidi taa hi hiinesaara erako ta ere. 24 Aadewoko hinuse ta ohe, kaayaxi essa be yelutto wudiya kuxa keenguwasso. 25 Yebo siwwayte! Aadewo ta zeerete. Olo kaayaxi Elaase beraako haydzi bera izzuppi agunnaydi iray bukke dheeddine sahay xhordo. Hinneko axi naaydecha. Yenniyakani Isra'eele wudiya uddi u adiyaxhi baadese indowaxhi lagako u yecha. 26 Yenniyaka Elaasey Siidoona wudiya Saraffita sunge godo i adey baadese bidzi indosowo e anxuttosa baaka ye laga indowaxhituko oonekoni anxutto baasso. 27 Yeydiwo kaayaxi Elsa'e beraakani kom'e harge keenge laga axituko Isra'eele wudiya yecha. Maaqe baaka ussaafa Sooriyaxi Ni'imaane baaka fetto bidzini loolli geejhay baasso" yeydi e hido.
28 Ye Bhikkilo Zawa yecha axiti be uddina e zeerdosa siidi iitana u huullo. 29 Usini dendi Yesuusa katamaame wude u kesso. Gaagaanna ur'i esa dafese wordi ye katamay yecho kedda gara gaaga deemowa u aando. 30 Maaqe baa Yesuusay u feeqaanna gardi dhaddi e hando.
Bidzi ade garafa xhoozi gooduttosa
Mrq 1:21-28
31 Ye e geede Yesuusay Galila wudiya yese Qifirnahoome katamaa yekke e yoodo. Yahani axita sanbata wonte e erusicha. 32 Erusisineni be adetona e erusicho gisha e erusichoshuna u micicha. 33 U Bhikkilo Zawaaka u feeqaa xhoozi e gara yese axi e yecha. Esini keddaysi faazi 34 "Nazrataxi Yesuusa! Am nuuka niya gelsesa? Numba baysesuwa ne yoodo? Tani oone ne maaqesa nemba erako ta ere. Neni Wonto maaqe haylako" yeydi hissine e uydo.
35 Yesuusani ye xhooze "Mikki hiwwa! E garafa kesuwa!" hidi e kassho. Xhoozini esa miidho badi yaha u giddaa olli dhaddi e garafa e kesso. 36 Be uddina micci sekke hanke "Aba bisha zeerewa ha esi? Be adetonaara be osanaara xhooze e goode, usini esuse siidi dakke" hidi uydo. 37 Yesuusay nashuttosi ye wude googe uddina sinto.
Laga hargaxiti loollosa
Mat 8:14-17; 4:23-25; Mrq 1:29-39
38 Yesuusay Bhikkilo Zawaafa kessi Simooneso e hando. Ye zawani Simoone machindoy iitana hardi misshi woy'iya i yecha. Hinne e loolusorosa Yesuusa u shidho. 39 Esini isuko gardi i da'aa eedhi ye micha harge "Dhagguwa!" hidi e kassho. Ye hargeni yenniyawo dattine dendi ususe worgusesa i hanto.
40 Qoossi gelese hisune axi lagay be bishana bishana hardi yecha axita Yesuusako u oodo. Esini u bidzi bidzi gara be kuche gaddi loolusso. 41 Xhoozaxheni esa "Neni fetto Wonto yeleko" yeydi hissine faazi laga axe datti dhaddi u hangicha. Esi beese Mesihe maaqenike u erdecho gisha oonekoni u ohuwannike minsi e oto.
42 Sahay wontusune kessi Yesuusay axi baa godo e hando. Axiti esa degexese u worgicha. Wordi be degesso geedeni "Nu wudefa dhaddi handofuna" hidi u shidho. 43 Yesuusani "Fede katamittaa assi handi Wonto kaatetese modhe odo oheko tamba e worguse, ta anxuttosi esusuko" hidi e hido. 44 Hinne Galila wudiya seya haya hanti Ayhuda Bhikkilo Zawaa uso e erusicha.