15
Yesuusay Philaxhose buro
Mat 27:1-2,11-26; Luq 23:1-5,13-25; Yoh 18:28-19:16
1 Ketiya sho'e Wonto kahinituse afana maagiti gate cimitaara Muse woga eruseesitaaray ye Ayhuda gate aheesiti be uddina bhikkilutti wolla u kundo. Ye e geedeni Yesuusa tutti etti handi Philaxhosese garsi u indo. 2 Philaxhosey "Neni Ayhuda kaatuwa?" hidi e oycco. Yesuusay "Hidiko ne yese" hidi hido.
3 Kahinituse afana maagiti Yesuusa laga zeerena u luukicha. 4 Philaxhosey "Haanxhi zeerena niya u luukesa beewwa! Fetto hanke ne mahe basi baye?" yeydi hissine sekke e oycco. 5 Philaxhosey micoro makko Yesuusay bidzoni hanke mahe e dheeddo.
6 Philaxhosey uddi bera aallo Garo Massala woggaaka u oyce bidzi tufaxe e dakkicha. 7 Yenniyawo kaati gara dendi axita wodhena tufe zawa gellecha birraxiti u yecha. Ye tufuttechashiti gidda Barbaane sunge axi e yecha.
8 Yaha yecha axiti Philaxhosey be lossechonike tufaxe birshi e daforosa e buro uddhi u oycco. 9 Philaxhoseni "Ha Ayhuda kaate birshi ta daforosa eeha hi eehe?" hidi e oycco. 10 Yeydini e oyccoshi kahinituse afana maagiti Yesuusa dhiiddhi garsi u indechosa be ericho gishako. 11 Kahinituse afana maagiti "Yesuusay birchuttoffe, Barbaaney birchuttuwaye!" hidi hissine Philaxhose u oycoronike axe u suqusicha. 12 Philaxhoseni "Hine ha Ayhuda kaateydi hiinesa waani tayse?" yeydi e oycco. 13 Usini assiwo be kato keddaysi bidzi nuunana "Suxhuwa! Suxhuwa!" hidi u hido. 14 Philaxhoseni "Amuna? E hanto baysoy abana?" yeydi e oycco. Usini "Suxhuwa! Suxhuwa!" hidi sekke bidzi nuunana mati mati u hido.
15 Philaxhoseni axita maggusese ususe Barbaane birshi datti Yesuusani be durusosi geede u suxhoronike e indo.
Yesuusay duruttosa
Mat 27:27-31; Yoh 19:2-3
16 Kaati tooraxitini Yesuusa ye wude ahichashi qeyshi giddaaka aandi beekafa attecha tooraxitani uddi u xheydo. 17 Zo'o maa'o u mayso. Anke xhaaxhi naddhi e qinowa gaddi 18 "Ayhuda kaato, modhetey neese maaquwaye!" hidi kuxa sawo bishesha u sawusso. 19 Kallona e qinowa oxhisine be cuche e gara u cuticha. Qozoozisine e buro bocunti u akkiricha. 20 Esa be dhaadosi geede ye zo'o maa'o e garafa shoddi etti e maa'o maysi suxhese etti u hando.
Yesuusay suxhuttosa
Mat 27:32-44; Luq 23:26-43; Yoh 19:17-27
21 Qarana wude axe maaqicha Simooney wudefa katamaa gelisine usaara e muto. Esini Iskindiresaara Rufosesaara usadeko e maaqicha. Yesuusay e gara suxhutte mixe osana u iddusso. 22 Ye e geedeni Yesuusa Golgota hidi hiyutte godo u aando. E birchey qine qooce hidi hiyoko. 23 Yaha be ello geede karawaara worquttese weyne daana e ushorosa u indo. Esini ushe e inxhadho. 24 Ye e geedeni esa u suxxho. E maa'itani ooni ooneni e elle hissine hixha olli u shato.
25 Yesuusa u suxxhosi ketiya haydzi saatenako e maaqicha. 26 Esuna esa be luuttosa "Ayhuda kaate" hidi hiinesa diizzi addaa u gaddo.
27 Lam'i fuulita oodi Yesuusase bidzo e oshishaa bidzo e hadursaa u suxxho.
28 [Ye esunani "Iita hanteesitaara wolko e taafutto" yeydi hine kaayo katoy aallo.]
29 E da'aanna garya yecha axiti esa haassi be qino en'usisine "Haaya mee, neni Wonto Hayla Zawa woddussi haydzi wontena keexhesi! 30 Mee, sussaafa hodhi nemba maaruwa!" yeydi u dhaaddicha.
31 Kahinituse afana maagitaara Muse woga eruseesitaaray yeydiwo "Fedeesitako e maardo, biya maarese danda'uwasso. 32 Esi Mesihey Isra'eele kaate maaqo'ayko haaya sussaafa hodhwaye! Nunini beedi esa nu aadexxoose" hidi sekke hanke dhaadiya u yecha. Esaara suxhuttecha fuulitini yeydiwo cashiya u yecha.
Yesuusay haydhosa
Mat 27:45-56; Luq 23:44-49; Yoh 19:28-30
33 Ye wonte sahay izzuppi saatiyafa ayti odduppi saate aallo kumena e ceendo. 34 Odduppi saatena Yesuusay be kato keddaysi "Elohe! Elohe! Laama sabaqitaanii?" hidi e hido. E bircheni "Ta Wonto! Ta Wonto! Ame taa ne dhaddo?" yeydi hiyoko.
35 Yaha ee'iya yecha bidzi bidzi geriti "Mee siwwayte, kaayaxi Elaaseko e xheyge" yeydi u hido.
36 Ussaafa bidzi woxxhi handi hade huxha bissheshesha etti dhoodhese usshaaka gelsi e xhunxhorosa shomboqo qinowa gaddi e uqusso. "Hagako mee! Elaasey yoodi esa hoxusune nu beyyeese!" yeydi e hido.
37 Ye e geede Yesuusay keddaysi uydi e haydho. 38 Wonto Hayla Zawaaka hade gilbakeysi fasshecha maa'oy be qinowafa ayti toke aallo feedhutti lam'e e kesso.
39 Yesuusay suxhuttosi buro ee'icha xhiixi gara afana maagay Yesuusay waa waydi haydhosa beedi "Ha axi aadewo Wonto yeleko e maaqicha" yeydi e hido.
40 Bidzi bidzi indowaxhitini zara eedhi u beecha. Ussaafa Magdoolaxhi Maaramey, barsi Yayqoobiyaraa Yoosaara yella Maaramey, Salomey yaha u yecha. 41 Usini Yesuusay Galila yechoniya esaara hamiyakaara mariyakaara yechashitako. Yeydiwo Yesuusaara Yerusaleeme yoodecha fede laga indowaxhitini u yecha.
Yesuusay mooguttosa
Mat 27:57-61; Luq 23:50-56; Yoh 19:38-42
42-43 Sahay qamese e hisune Armatiyase katamaxi Yoosefey e yoodo. Esini Ayhuda gate aheesitaafa maaqisine kuxuttese axe e maaqicha. Beese Wonto kaatete gobbisine e kakkicha. Ye wontey sanbatase u naqutticho wonte ye sanbatame buro wonte e maaqicho gisha Yoosefey gaggo melli Philaxhoseko gelli Yesuusa aha e ingorosa e oycco.
44 Philaxhoseni "Aydeniyaw e haydho?" yeydi e micco. Xhiixi gara afana maaga xheygussi "Aadewo haydhi decciya e yese?" yeydi e oycco. 45 Yesuusay haydhosa esukofa naddhi be siido geede Yoosefeko "Ye aha handi ekkuwa" yeydi e hido.
46 Yoosefeni achushe talbaafa meddhuttase kille maa'o woondi suxi mixi garafa hossi esuna e acco. Aandi axi wocci bootti naddhese bookuttese shushaaka gelsi aha e woyso. Shuchi malla andarsi oodi ye boossa suma e tucco. 47 Magdoolaxhi Maaramiyara Yoosayndo Maaramiyaray Yesuusa an godo u mooddosa beya u yecha.