26
Yesuusa wodhese kumutta kume
Mrq 14:1-2; Luq 22:1-2; Yoh 11:45-53
1 Yesuusay haanxho uddi erussi be also geede be erusichoshituko 2 "Hi erenike lam'i wonta geede Garo Massalako yesa. Yaha taa axi yele ta suxhuttorosako garsi ingusso" yeydi e hido. 3 Ye woggaa kahinituse afana maagitaara gate cimitaaray Qayaafa sunge kahinituse afana adeso u bhikkilutto. 4 Yesuusani zaadena qaxxhi aykesaara wodhesaara yaha wolla u kundo. 5 "Axi toora denxoroome Garo Massala wonte mahuwanxhiko" yeydi u hido.
Bidzi indoy Yesuusa shittona tisshosha
Mrq 14:3-9; Yoh 12:1-8
6 Yenniya Yesuusay Biitaniyaka kom'e harge keengicha Simoone zawaa e yecha. 7 Esini tato gara utti e yesune bidzi indoy e woomay orje maaqe shittoy essa kundesesa albasxhirose bilqaaxhe etti esuko yoodi e qiniya ye shitto i gusso.
8 Ye esani beedi e erusichoshiti huulli "Ha shittoy ame yaho e baane? 9 Laga miijheshe zal'utti ye miijhey jhi'ituse inguttesuko e danda'utticha" yeydi u hido.
10 Uynesani Yesuusay erdi "Ha indo ame yeysi hi maddhunxe? Taase modheko i hanto. 11 Jhi'iti uddi wogga hinunaarako u yese, tanimay uddi wogga hinunaara haya yesuwasso. 12 Ha shitto ta gara i gussosunako tani mooguttese naqutto. 13 Aadewoko hinuse ta ohe, ha saha gara uddi ha modhe odoy ohutte godowa ha i hantosuna axi iso massiko u zeere" yeydi e hido.
Yuuday Yesuusa aykusese kundosa
Mrq 14:10-11; Luq 22:3-6
14 Yesuusay erusicho tamma lam'ukaafa bidzi esini Asqorotaxi Yuuday kahinituse afana maagiti da'aa handi 15 "Garsi Yesuusa hinuse ta ingete am taase hi inge?" yeydi e oycine qangaafa hantuttese miijhe haydzi tammi birre esuse u indo. 16 Ye wontiyafa ayti Yesuusa garsi ingese bissheshe wogga e worgicha.
Yesuusay Garo Massala tato be erusichoshitaara muudosa
Mrq 14:12-21; Luq 22:7-14,21-23; Yoh 13:21-30
17 Helto Boora Massalase acha wonte e erusichoshiti Yesuusako uddhi "Garo Massala tato ne miyoronike ayani neese nu naqorosa ne worge?" yeydi u oycco. 18 Esini "Katamaa ebeloso handi 'Laaxi "Ta woggay ellosso, ta eruseesitaara Garo Massala tato ta muunesi ne zawako" yeydiko e hine' hidi hiwwayte" hidi e hido. 19 Yesuusay woossonikeni e erusichoshiti u hando. Garo Massala tatoni u naddho. 20 Sahay qandine be erusicho tamma lam'aara wolko tato gara e utto.
21 Miya u yesune Yesuusay "Aadewoko hinuse ta ohe, hinukafa bidzi garsiko taa e inge" yeydi e hido. 22 E erusichoshiti e zeerdosuna orjena higilli be bidzi bidzina "Hanno tamba neyneni?" hidi hissine esa oyce u ayto.
23 Yesuusani "Garsi ta ingesi taara wolko sanqiya anxiya yesesako. 24 Tani axi yeley ta gisha e diizuttonikema hay'oko ta hay'e. Maaqe baaka axi yele garsi inge axe baduffu! Ye axi yelutte dheeddesako esuse bishako e bishaane" yeydi e hido. 25 Esa garsi ingese hine Yuuday "Laaxo, tamba neyneni?" yeydi e hidine "Otima ne yesesi" yeydi e hido.
Laaxi qamete
Mrq 14:22-26; Luq 22:15-20; 1Qr 11:23-25
26 Miya u yesuneni Yesuusay boora densi Wonto e galatto. Be erusichoshituseni boora meyssi "Hii'eyte, muuwayte. Ha esi ta garakoa" hidi hissine e indo.
27 Essa ushushoosha densi Wonto be galatto geede ususe indi "Hi uddina ha essafa ushuwayte! 28 Ha esi Wonto caaqoy esuna ee'e cubboy attoronike lagituse gukke ta suuxuko.
29 Hinuse ohoko ta ohe, nuwade kaatetiya hinunaara weyne daana sekke kille mati ta ushoro wonte aallo ha weyne usshaafa sekke ushuwassho" yeydi e hido. 30 Ye e geede zingale zingalli kessi Zayte Bakka gara dhaddi u hando.
Yesuusaara Phexhrosiyara
Mrq 14:27-31; Luq 22:31-34; Yoh 13:36-38
31 Yenniyani Yesuusay be erusichoshituse
" 'Yeengichashe oxxhiko ta wodhe, yeemutticha doritini u budutte'
yeydi e diizuttesenike hi uddinako ha qamaa dhumutti taa hi dhagge. 32 Maaqe baaka haybowafa ta dendosi geede hinume buroko dhaddi Galila ta gare" yeydi e hido.
33 Phexhroseni "Fediti uddi dhumutti niya dhaddakoni tani fetto niya dhagguwasso" yeydi e hido.
34 Yesuusani "Aadewoko neese ta ohe, ha qamaa lukkali ollo baaneko haydzi wogga 'Tani esa eruwasso!' hidi ne zaadde" yeydi e hido.
35 Phexhroseni "Hay'e e worgusakoni neera ta hay'esa baaka niya dhagguwasso" yeydi e hido. E erusichoshitini be uddina yeydiwo u hido.
Yesuusay Wonto shidhosa
Mrq 14:32-42; Luq 22:39-46
36 Ye e geede Yesuusay be erusichoshitaara Getesemaane hisso zayte mixi tofutte godo u hando. Handi be elloniyani "Seya handi ta shi'oro aallo haya uttuwayte" yeydi e hido.
37 Phexhrosiyara, Zabdoose nayshi lam'aara beera etti handi higilliyara maddhumiyara e ayto. 38 " 'Haydhusso' tayoro aallo ta muxhuroy iitanako e maddhundese. Hinuni haya decuwayte, taara wolko miindi kakkuwayte" yeydi e hido.
39 Oddhe fakkidi u garafa shidhi be deemona sahaa undi shi'isine "Nuwadde, e danda'uttako ha maddha usshi ta garafa garuwaye. Ha esini ne maxoke baaka ta maxoke maaddhoppe" yeydi e hido. 40 Hanke maaddhini be erusicho haydzuko yoodi geti u yesune beedi Phexhroseko "Fetto taara bidzi saatiyani waani birti kafese danda'e hi dheeddo? 41 Naa'owa gelli hi unguwannike oseywayte, shi'uwayte. Axi be maxona naquttoko naqutte, achomay gafaxuko" yeydi e hido.
42 Lakkunxoni Yesuusay sekke handi "Nuwadde! Ha maddha usshe ta ussho baane garuwasa e maaqo'ayko ne maxoke maaquwaye" yeydi e shidho. 43 Assi hanke maaddhi e yoonne gehunxi uso ayti iishecho gisha hatteni gehiyaka u yecha.
44 Yaha uso dhaddi assiwo handi haysso woggaani buro be shidhechonike sekke Wonto e shidho. 45 Hanke be erusichoshitukoni yoodi "Haha'e! Yenawa hatte aallo gehiya hi yese? Hi kaxe efiya hi yese? Hay, woggani elliko yese, tani axi yeley cubbachiti kuchiya gardiko ta ingutte. 46 Denduwayte, nu hammeese, beewayte, garsi taa ingesi yoodiko e yese" yeydi e hido.
Yesuusa aykutte
Mrq 14:43-50; Luq 22:47-53; Yoh 18:3-12
47 Hagawo ye esa e zeerusune e tamma lam'ukaafa bidzo maaqicha Yuuday e yoodo. Laga axitini esaara wolko satataara bikkaara ayti kahinituse afana maagitaara gate cimitaaray ansine u yoodo. 48 Yesuusa garsi ingese hicha Yuudani "Hi aykorosi ta muuxhe axuko, esa aykuwayte" hidi yerago e otecha.
49 Yenniyawo Yesuusako yoodi "Sawo, ta Laaxo!" hidi hissine e muuxxho. 50 Yesuusani "Nuundo na'e, esume ne yoodosa alsuwa" yeydi e hine yenniyawo axiti e gara gutti esa u ayto.
51 Yesuusaara yechashitaafani bidzi be satata kessi kahinituse afana ade maala gara dendi e washe e burso. 52 Yesuusani esuse yenniya "Satata kesseesiti satatanako beese u baane. Ha e gisha ne satata e koofiya gelsuwa. 53 Tani nuwade shidhako yenniyawo izzuppi kuma kuma aytese tamma lam'i godowa shahuttese tooraxitume afana maaqe Wonto woosaxita anxese danda'uwasuwa niya e bishe? 54 Hinne yeydi ta shidhakoma 'Maddha efeko esa e worguse' yeydi hine ha Hayla Fissharo katoy waanidini e aale?" yeydi e hido.
55 Sekke yooda laga axituse "Fuulo aykusonike satataara bikkaara etti taa aykesuwa hi yoodo? Wonto Hayla Zawaa wontana wontana erusisine uttiya ta yesune taa ayto badiko hi yecha. 56 Haanxhi uddi yeydi e maaddhosi kaayaxituna diizuttechay itoronikeko" hidi e hido. Yenniyawo e erusichoshitini be uddina esa datti u badho.
Yesuusa yaa'ase uqussosa
Mrq 14:53-65; Luq 22:54-55,63-71; Yoh 18:13-14,19-24
57 Yesuusa ayti axiti yenniya Muse woga eruseesitaara gate cimitaaray bhikkiluttecho kahinituse afana ade maaqe Qayaafaso u aando. 58 Phexhrosemay kahinituse afana adeso aallo zara zaraydi Yesuusa geede e hando. Zeerey waydi aalesa beyese hissine qeyshi giddaa gelli hantaxitaara yaha e utto.
59 Kahinituse afana maagitaara Ayhuda gate aheesitaaray be uddina Yesuusay hay'oronike yaa'usese zaadena ateynesa u worgicha. 60 Laga zaade atoy e gara uddhakoni haybose esa elluse ato fettona degexutto baasso. Aalliciraka lam'i atoy uddhi 61 "Ha axi 'Wonto Hayla Zawa woddussi haydzi wontena keexhese danda'ako ta danda'e' hidiko e hido" yeydi hissine u oto. 62 Kahinituse afana adey dendi "Haanxhi ne gara ateyneesuse hanke ne mahe uttay baye?" hidi hissine Yesuusa e oycco. 63 Esini mikki hido.
Sekkeni esuse kahinituse afana adey "Yeso maaqe Wonto sunxunako niya ta oyce. Wonto yele Mesihey niya maaqesa nuuse aadewo caadhi ohuwa" yeydi e hido. 64 Yesuusani "Hidiko ne yese, maaqe baaka hinuse ohoko ta ohe. Ha esume sekke tani axi yeley uddi base danda'e Wonto oshishaa uttusuniyara yeydiwo afa dhumaanna ta yoosuniyaarako hi beene" yeydi e hido.
65 Yenniyani kahinituse afana adey huulli be maa'o feeddhi "Hay, Wonto casshiko e yese, hinuni e casshosha siidiko hi yese. Ha e geede aba atona feda e worguse? 66 Hine am hi ohe?" yeydi e hido. "Hay'eko esuse bishesha!" hidi hissine sekke esuse u mato. 67 Cucheni e aafusha u cutto, u durdo, esa baqiya yesineni 68 "Mesihe, niya baddhay oonena? Mee, kaayaxe maaqo'ayko nuuse ohuwa!" yeydi u hicha.
Phexhrosey "Yesuusa eruwasso" hidi zaaddosa
Mrq 14:66-72; Luq 22:56-62; Yoh 18:15-18,25-27
69 Kahinituse afana adeso qeyshi gidda Phexhrosey uttiya yesune bidzi maaki hanke esuko uddhi "Doo, nenini Galilaxi Yesuusaarama ne yechoshi" yeydi i hido. 70 Esini "Fetto ha ne zeeresi taase geluwasso" yeydi uddiyade buro e zaaddo.
71 Qeyshi suma e kesusune feden'i beedi yaha yecha axituse "Ha esini Nazrataxi Yesuusaarako e yecha" yeydi i hido. 72 Phexhroseni sekke assiwo caadhi "Ye axe tani eruwasso" hidi e zaaddo.
73 Oddhe wogga decci yaha eedhecha axiti esuko shidhi "Ha ne zeeresako an wude axe ne maaqesa niya erusesa. Aadenawo neni u badeko" hidi uydo. 74 Esini "Ye axe eruwasso" yeydi hissine biya aaciyara caaqiyara e ayto. Lukkalini yenniyawo oollo. 75 "Lukkali oollo baanneko haydzi wogga 'Esa eruwasso' hidi neyne" hidi Yesuusay zeerdecho kato e masso. Dhaddi wude kessi suuxi aafunxe e yeetto.