27
Yesuusay Philaxhose buro udhosa
Mrq 15:1; Luq 23:1; Yoh 18:28
1 Ketiya sho'e kahinituse afana maagitaara gate cimitaaray Yesuusa wodhusese wolla u kundo. 2 Esani tutti etti handi ye wude ahicha Philaxhosese garsi u indo.
Yuuday higillosa
Anx 1:16-20
3 Ye woggani garsi esa indecha Yuuday e gara e yaa'uttosa beedi be hantosuna iitana e higillo. Kahinituse afana maagitukowara gate cimitukowara ye haydzi tammi birre etti oodi 4 "Geeshi axe haybose garsi ta indosuna baysiko ta yese" yeydi e hido.
Usini "Hinne am nuu dhida? Niyako e maddhunxe!" yeydi u hido. 5 Ye haydzi tammi birreni Wonto Hayla Zawaa yaha buddi dhaddi kessi biya gitti e woddho.
6 Ye haydzi tammi birre kahinituse afana maagiti bhikkilli etti "Ha miijhey suuxi wooma miijheko. Wonto Hayla Zawase inguttechashaara bidzi godo nu gadoronike bishuwassho" hidi uydo. 7 Hinne wolla kundi borsiti essa mooguttorosa ota bache meddhichashi saha u wondo.
8 Ye e gishako hanzo aallo ye sahay "Suuxi saha" hidi e hiyutte.
9 "Isra'eele geri casshecho e wooma maaqe haydzi tammi birre u etto.
10 Ye esini Laaxi taa woosechonikeko ota bache meddhichashi sahase u indo" hidi kaayaxi Ermiyasena ohuttisine yecha kaayoy e itto.
Philaxhosey Yesuusa gara yaadhosa
Mrq 15:2-15; Luq 23:2-5,13-25; Yoh 18:33-19:16
11 Yesuusani ye wude ahicha Philaxhose buro u uqusso. Esini "Neni Ayhuda kaatuwa?" hidi e oycco. Yesuusay "Hidiko ne yese" yeydi e mato. 12 Kahinituse afana maagitaara gate cimitaaramay esa luukusune hanke mahe e dheeddo.
13 Yenniyani Philaxhosey "Haanxhi zeerena niya u luukesa siya baannuwa?" yeydi e hido. 14 Dhonxhidi e micoro aallo Yesuusay bidzi katoni hanke mahe dheeddi mikki e hido.
15 Uddi bera aallo ye wude ahichashi Garo Massala wonte Ayhudaxiti oycco bidzi tufaxe birshi dafe e lossecha. 16 Yenniyani bidzi birraxi "Barbaane" hidi hisso eruttese tufaxi e yecha. 17 Axiti bhikkilutto geede Philaxhosey "Ooni ta birchorosa hi worge? Barbaaniyani Mesihe hiyutte Yesuusana?" hidi hissine uso e oycco. 18 Yeydini e oyccoshi dhiidhana Yesuusa garsi u indosa be ericho gishako.
19 Philaxhosey yaa'ese uttiya yesune e machi "Ye gizo axi gara abani hantofuna! Onxe qamako e gisha afukkana laga ta maddhundese" hidi hissine esuko i woosso.
20 Kahinituse afana maagitaara gate cimitaaray yenniyawo axiti "Barbaaney dafuttuwaye! Yesuusay hay'uwaye!" hidi hissine u oycoronike uso be maxo gara u mahicha. 21 Sekke assiwo ye wude ahichashi "U lam'ukaafa ooni ta birchorosa hi worge?" hidi hissine axita e oycco. Usini "Barbaaneko" yeydi u hido. 22 Philaxhoseni "Hinne Mesihe hiyutte Yesuusa waani ta hise?" hidi e hido. Be uddinani "Suxhuttuwaye!" yeydi u hido. 23 "Hinne am e bayso?" yeydi e oycco. "Suxhuttuwaye, suxhuttuwaye!" hidi hissine fettowo uwwa u lagusso.
24 Philaxhoseni beynesa dheeddi "Ha zeerena yoona toora denxesuko uyne" hidi hissine waaxe oowussi "Ha axi haybose tani essaa geluwasso, hi eehenike hisuwayte" hidi hissine laga axi buro be kuche e shoto. 25 Axitini be uddina "E suuxuna elle gomey nu garaara nu nayshi garaara maaquwaye" yeydi u hido. 26 Philaxhoseni yenniya Barbaane birshi datti Yesuusani be durusosi geede u suxhoronike e indo.
Yesuusay suxhuttosa
Mrq 15:16-32; Luq 23:25-43; Yoh 19:2-3,17-27
27 Ye e geedeni Philaxhose tooraxiti Yesuusa Philaxhose qeyshi giddaa etti u hando. Yaha yecha tooraxitani uddina e googe u bhikkillo. 28 E maa'o kessi zo'o maa'oa u mayso. 29 Anke xhaaxhi naddhi e qino gara u gaddo. E oshichi kuchiyani oddhe shomboqo kallob ayssi e buro bocunti "Ayhuda kaato! Modhetey neese maaquwaye" yeydi dhaadisine 30 cuche e gara cutti ye kallo e kuchiyafa etti e qinowa esuna u oxhicha. 31 Yeydi e gara be dhaaddo geedeni zo'o maa'o e garafa kessi e maa'o maysi suxhese etti u hando.
32 Yahafa kessiya yesine Qarana wude axe Simoone sungesa degessi Yesuusay e gara suxhutte mixe osana esa u iddusso. 33 Ye e geedeni Golgota hisso godo u ello. "Golgota" hidi hiyoy "Qino qooce" yeydi hiyoko. 34 Dhooqe basaara worquttese weyne daana Yesuusase u uqusso. Maaquwaye baaka uudhi be beedo geede ushe e inxhadho.
35 Yesuusa suxxhi e maa'o hixha olli u shato. 36 Utti yaha esa u kakkicha. 37 Esa esuna be luukichoshani e qinowanna e bakka e suxhutto mixi gara "Ha esi Yesuusako, Ayhuda kaatuko" hidi diizuttesesa u gaddo.
38 Yesuusaarani ye wogga lam'i fuulita bidzo e oshishaa bidzoni e hadursaa hissi u suxxho. 39 E da'aanna garya yecha axiti esa haassi be qino en'usisine 40 "Doo, Wonto Hayla Zawa woddussi haydzi wontenako ta keexhe hichayo! Haayya, niya maaruwa! Mee, Wonto yele maaqo'ayko sussaafa hodhuwa!" hidi hissine esa dhaadiya u yecha.
41 Yeenkewo kahinituse afana maagiti Muse woga eruseesitaara gate cimitaaray 42 "Fedeesita e maardo, biya maarese ada danda'uwaye? Isra'eele kaate maaqo'ayko ha sussaafa mee hatte hodhuwaye! Nunini esa aadexako nu aadexe. 43 Wonto gobbe matiko 'Tani Wonto yeleko' hidi e hidese, yebo, Wontoy esa eehesa maaqo'ayketese esa maaruwaye" yeydi hissine qozooziya u yecha. 44 Esaara suxhuttecha fuulitini yeydiwo esa u cashicha.
Yesuusay haydhosa
Mrq 15:33-41; Luq 23:44-49; Yoh 19:28-30
45 Izzuppi saatiyafa ayti odduppi saate aallo sahay kumena e ceendo. 46 Odduppi saate e maaqusune Yesuusay be kato keddaysi "Elohe! Elohe! Laama sabaqitaanii?" yeydi e hido. Ye e bircheni "Ta Wonto! Ta Wonto! Ame taa ne dhaddo?" yeydi hiyoko.
47 Yaha ee'iya yecha axitaafani bidzi bidziti siidi "Elaaseko e xheyge" yeydi u hido. 48 Yenniyawo usaafa bidzi woxxhi handi hade huxha bisheshesha etti dhoodhese usshaaka gelsi e xhunxhorosa shomboqo qinowa gaddi e uqusso. 49 Fedeesitini "Dhagguwa! Mee, Elaasey yoodi maaresa nu beyyeese!" yeydi u hido.
50 Assinawo sekke kato keddaysi uydi kaxe e kesso. 51 Yenniya Wonto Hayla Zawa giddaa hade gilbake fasshecha maa'oy be qinowafa ayti toke aallo feedhutti lam'e e kesso. Sahani en'o, shuchi mallitini u bay'utto. 52 Boossay do'uttineni haydhecha Wonto axita maaqe haylaxitaafa lagay u dendo. 53 Boossaafani u kesso. Yesuusay haybowafa dendo geedeni geeshi katamaa Yerusaleeme u gelline laga axi uso u beedo.
54 Xhiixi gara afana maagaara esaara wolko Yesuusa kakkichashitaaray sahay en'osaara fede maaddha basitaara beedi "Ha esi aadena Wonto yeleko e maaqicha" hidi fettonawo u jhassho.
55 Laga indowaxhitini zara yesine beeneesitini yaha u yecha. Yesuusa marisine Galilaafa ayti yoochashitako u maaqicha. 56 Usaafani Magdoolaxhi Maarame, Yayqoobiyara Yoosefiyara yella Maarame, Zabdoose na'axheyndowaraydiko u maaqicha.
Yesuusay mooguttosa
Mrq 15:42-47; Luq 23:50-56; Yoh 19:38-42
57 Qamese e hisune Yoosefe sunge bidzi wodumay Armatiyase katamaxi e yoodo. Esini Yesuusay erusichoshako e maaqicha. 58 Yesuusa aha efese Philaxhoseko handi e shidho. Esini "Inguwayte" hidi e hido. 59 Yoosefey Yesuusa aha etti talbaafa meddhuttese geeshi maa'ona e acco. 60 Kille maaqe boossa beese essa mooguttese shuche wocci bootti be naddhechoshaa aandi e woyso. Shuchi orje andarsi oodi ye boossa suma tucci dhaddi e hando. 61 Magdoolaxhi Maaramiyara ye fede Maaramiyaray yaha boossa buro uttiya u yecha.
62 Massalase u naquttichoshume geede wonte ketiya kahinituse afana maagitaara Farasaxitaaray Philaxhoseko handi 63 "Nu laaxo! Ye esi haydho badesine 'Haysso wonte geedeko ta dende' hidi e hidechoshako nuuse maxutta. 64 Ha e gisha boossa haydzi wonte aallo oseydi u kaforonike ohuwa. Kafuse ne dheeba'ayko e erusichoshiti kayssi etti 'Haybowafa dendosso' hidiko axe u qaaruse. Burosume geede e haluxesako garesa" yeydi u hido.