25
Tammi woduraxhe mamako
1 Sekkeni Yesuusay "Yenniyaka afa kaatetey ha esako e bishe. Be faqe etti ekke na'e mokkese kessa tammi woduraxhey u yecha. 2 Ye esini usaafani ichichi muyita ichichi gaxaxita u maaqicha. 3 Woduraxhe muyiti faqe etti faqese e da'aa koso maaqe zayte etto badi u yecha.
4 Ye gaxaxitini be faqiyara wolko be miijhiya faqese e da'aa koso maaqe zayte ayti u yecha. 5 Kuula handechashiti yoowe deccinne uddina dossey aytinne u geto. 6 Ekke wodhakka e maaddhine 'Kuulaxitako yooda, kessi mokkuwayte' hidi hinne koysi sinto.
7 Yenniyani ye woduraxhey be gehunsaafa birti be faqe u naddho. 8 Hade muya maaqicha woduraxheni gaxaxita 'Nu faqey bayesuko hine, odde, hi zaytiyafa nuuse inguwayte!' yeydi u hido.
9 Usini 'Oo'o, hinuseni nuuseni ellesa keenguwanxhiko. E zal'utte godo handi hinuse woonguwayte' yeydi u hido. 10 Muyitini zayte woomese dhaddi u hando. Handi u yesune kuulay yoonne, naqutti kakkicha woduraxhey usaara kuula zawaa wolko u gello, gasani aykutto.
11 Ye e geedeni muyiti yoodi 'Laaxo! Odde, nu laaxo! Gasa nuuse do'uwa!' yeydi u hido. 12 Esini 'Aadewoko hinuse ta ohe, fetto tani hinumba eruwasso' yeydi ususe e mato.
13 Ha e gisha wontaara saatiyara hi eruwa gisha birti kakkuwayte" yeydi e zeerdo.
Haydzi maaliti mamako
Luq 19:11-27
14 Assi Yesuusay "Afa kaatetey ha esako e bishe. Bidzi adey e yecha. Esini fede wude dhaddi hangisine be maalita xheydi be keengesa usuko e indo. 15 U danda'e aallo u bidzi bidzise shahisine bidzuse ichichi sigire miijhea fedase lam'i sigire miijhe se esuseni assi bidzi sigire miijhe hissi taddi fede wude dhaddi e hando.
16 Ichichi sigire miijhe ettechashi yenniyawo handi esuna hanti fede ichichi sigire miijhe e gara e kosso. 17 Lam'i sigire miijhe ettechashini yeydiwo hanti fede lam'i sigire miijhe e gara e kosso. 18 Maaqe baaka bidzi sigire miijhe ettechashini ye be laaxi miijhe saha bootti essaa e mooddo.
19 Laga bera geedeni ye maaliti laaxi yoodi be miijhe uso oyce e ayto. 20 Ichichi sigire miijhe ettechashini fede ichichi sigire miijhe kossi etti yoodi 'Ta laaxo! Ichichi sigire miijheko taako ne indecha, hay tani fede ichichi sigire miijheko hanti e gara ta kosso' hidi e hido. 21 E laaxini 'Hasshu, neni muxhuraxe maaqe maalako! Modheko ne hanto. Oddhe basuna muxhuraxe maaddhi ne bento gisha laga basi garako niya ta maagexe. Yoodi taara wolko magguwa' yeydi e hido.
22 Lam'i sigire miijhe ettechashini be laaxuko yoodi 'Laaxo, lam'i sigire miijheko ne indecha, fede lam'i sigire miijheko hanti e gara ta kosso' yeydi e hido. 23 E laaxini 'Hasshu neni muxhuraxe maaqe maalako! Modheko ne hanto. Oddhe basuna muxhuraxe maaddhi ne bento gisha laga basi garako niyani ta maagexe. Yoodi taara wolko magguwa' yeydi e hido.
24 Bidzi sigire miijhe ettechashini yoodi 'Laaxo, ne ayllo baasani ne acesha, ne buddo baa godofani bhikkilesa danda'uttuwa axe ne maaqenike erako ta ere. 25 Ye e gishako jhasshi handi ne miijhe saha bootti essaa ta mooddo. Hii, ekkuwa ne miijhe!' yeydi e hido.
26 E laaxini 'Doo, iitaara belxhaxaara maaqe maalako neni! Ta ayllo baa godofa ta acenike, ta buddo baa godofa ta bhikkilenike haasichi ne eresi! 27 Hinne ta miijhe esuna hanti laguseesituko ingeko niya e worgusicha, tani ta yoodonniya e kosowarako ta efaane. 28 Yey, ha miijhe esukofa etti tammi sigire miijhe keengesuko inguwayte.
29 Keengesuse ooneseni kosuttoko e kosutte, fettoko e lage, keenguwasi garafa fetto ye e keengichoniyoko efuttesa. 30 Ha go'uwa maala cenchaaka wude kessi dakkuwayte! Yaha axiti u yeeke, be gaggoni u qiice' yeydi u laaxi e hido" hidi e hido.
Aallicira wonte be hantake ekkuso wooma gisha
31 Sekkeni Yesuusay "Axi yele hidi hiyuttasi kuxa fuulana uddi Wonto woosaxitaara yoodi yenniya kaatese kaati uttuxo gara e utte. 32 Be wudefa wudefa axi uddi e buro u bhikkilutte. Doritani deyshitaafa yeengesi shahenike axitani e shahe. 33 Doritani be oshichi badena deyshitani be hadursi badena e esse.
34 Yenniyakani kaati be oshishaa be essositani 'Hinuno nuwadey suuzeseesito, yoowayte! Sahay meddhuttowafa ayti hinuse naquttese kaatete gelli ekkuwayte. 35 Hi ekkesini ta naaydine taa muussiko hi yese, ta sazzineni usshiko hi yese, borsa maaddhi ta yoonne taa mottiko hi yese, 36 ta gundusine maysiko hi yese, ta hardine oycciko hi yese, ta tufuttine taako yoodi oycciko hi yese' yeydi e hido.
37 Gizo axitini yenniya 'Laaxo! Ne naaydine beedi aydeni niya nu muussecha? Ne sazzine beedi aydeni niya nu usshecha? 38 Borsa niya mati aydeni nu mottecha? Ne gundusine beedi aydeni niya nu maysecha? 39 Ne hardine oo'oyne ne tufuttine beedi aydeni niya nu oyccecha?' yeydi uyne.
40 Ye kaatini 'Aadewoko hinuse ta ohe, ha nuundo na'axhitaafa uddime eerose hi hantosi uddi taase hi hantosako' hissine e mahe.
41 Ye e geedeni be hadursaa yeseesituse 'Hinuno aacutteseesito, taakofa zaruwayte! Humbayesaara e woosaxusaara naquttese koolo makkina yese tamaa hanguwayte! 42 Ta naaydine taa muusso bayta, ta sazzine taa ussho bayta, 43 borsa maaddhi ta yoonne taa motto bayta, ta gundusine taa mayso bayta, ta hardine ta tufuttine taa oycco baytako. Ye e gishako tamaa hi hange' yeydi e hidine 44 usitini 'Laaxo, ne naaydine oo'oyne ne sazzine oo'oyne borsa maaddhi ne yoodine oo'oyne ne gundusine oo'oyne ne hardine oo'oyne ne tufuttine beedi aydeni niya mare nu dheeddecha?' hidiko esuko uyne.