24
Wonto Hayla Zaway woddenike ohutta kaayo
Mrq 13:1-2; Luq 21:5-6
1 Wonto Hayla Zawa karaafa kessi Yesuusay hangusune e erusichoshiti Wonto Hayla Zaway waa waydi e keexhuttosa beysese esuko u uddho. 2 Yesuusani "Ha esa uddi beyama hi yesesi? Aadewoko hinuse ta ohe, ha shuchi shuchi gara beyesenike bidzini woddo badi attuwasso" yeydi e hido.
Saha also wogga maaqe orje maddha gisha
Mrq 13:3-23; Luq 21:7-24
3 Yesuusay Zayte Bakkaa gara uttusune esuko e erusichoshiti be goshewo uddhi "Haanxhi basi uddi maaqesi aydena? Ne yoowesaara ha saha aallicirasaara e yeragoy amuna? Nuuse ohuwa" yeydi hissine u oycco. 4 Yesuusani "Ooneni hinumba qaarusoppe hinumba kakkuwayte! 5 'Tani Mesiheko' hidi hissineko ta sunxuna lagiti u yoone, lagitani u qaaruse.
6 Hi ukke tooray dende fakkiyani toora odoko hi siine. Maaqe baaka du'eydofita! Haanxhi uddi maaqeko e worguse. Ha zeerey maaqusune 'Aalliciray yoodosso' hidi hidofita! 7 Bidzi wudey fede wude gara, kaatini kaati gara toora e denxe, seya haya naayaara saha en'uwaaray e maaqe. 8 Haanxhi maddhay uddi haga hade zersoke aykesako.
9 Yenniyani maddhase hinumba ayti garsi u inge, hinumbani u wodhe, ta gishani uddi wude axi hinumba iitana u inxha'e. 10 Lagitini be aadexo dhaddi u dhumutte sekke hanke wola garsi u inge woli gara dendi wola u inxha'e. 11 Laga kaayaxe maaquwasiti 'Nuni kaayaxuko' hidi zaaddeesiti dendi laga axitani u haluxe.
12 Iitetey e lage gisha laga axi eehay e toyye. 13 Maaqe baaka danda'ona aallicira aallo miingesa Wontoy esa maarako e maare. 14 Ato maaqese modhe odo be nuunana nuunana zeere axi uddi siyoronike Wonto kaatete modhe odoy be wude wude yese axituse uddi e ohutte, aallicirani yenniyawo e yoone.
15 Kaayaxi Dan'eeley zeerdonike hayla maaqicha godowa dhohusesaara darrise abakowaray eedhi yesune hi beene -- Ha esani zeerusesi eruwaye -- 16 yenniyani Yuuda wude yeseesiti bakkita ba'uttuwaye! 17 Shuchi keexi qinowa yese godo yeseesiti abani efese be zawaa yekke hodhofe. 18 Woota yesesi be maa'o efese be geede hanke maaddhoppe.
19 Ye wogga gawwaara yeseesitusaara dhanxe dhamuseesitusaara uso baduffu! 20 Ye hi ba'e wontay bargowara sanbata wontaara e maaqeeme Wonto shi'uwayte. 21 Esume hi shi'esini yenniya sahay meddhuttosafa ayti hatte aallo benti eruwa maddhaara waayyaarako maaqesa. Buro garani ye esa bishe maddhaara waayyaaray yoowasso. 22 Ye wontita hatuse e dheeddako bidzi axini maaruttese danda'uwadiko yecha. Maaqe baaka xharutta axumeko ye wontita e hatuse.
23 Yenniyaka ooneni 'Beewwa, Mesihey hayako e yese!' oo'oyne 'Sey seyako e yese' yeydi e hidako 'Aadeko' hidi hidofita. 24 Mesihe maaquwasiti 'Tani Mesiheko' kaayaxita maaquwasiti 'Tani kaayaxuko' hissineko zaadaxiti yoodi Wontoy xhardechoshita danda'a'ayko haluxese hissine hantuttese danda'uttuwa yeragowara micushe abakowara u hante.
25 Siwwayte! Ha esi maaqeesume burona hay uddi hinuse zeerdiko ta yese. 26 Yoonase 'Saha melaako e yese' hidi u hidako yaha handofita. Sekkeni 'Orkako e yese' hidi hidako 'Aadeko' hidi hidofita. 27 Zeelunxi afaa faddhi oshishaafa hadursi aallo e bentenike tani axi yeley yoone wonteni yeenkewo e maaqe gishako. 28 Ayani ahay yese godoko yewudday u bhikkilutte" yeydi e hido.
Kristosa lakkunxo yoowe gisha
Mrq 13:24-27; Luq 21:25-28
29 Sekke assi Yesuusani "Yeenxhi maddha wontiti geede yenniyawo qoossi e ceenge, agunnani be fo'e beysuwasso, xhoolintitini afaafa u gukke, afaaka yese ositini iitana u en'e.
30 Ye e geedeni axi yele yeragoni afaaka e bente. Saha gara be ommana ommana yese axiti uddi yenniya 'Wu, wu, yiiy yiiy!' hidi u yeeke. Tani axi yeley adetonaara orje kuxa fuulanaara dhumaanna yoosune u beene.
31 Keddaysi uwwe marachi katowara wolko Wonto woosaxitani e anxe. Usini hadursi badefani oshichi badefani afa badefani oomo badefani afa wosulaafa saha wosula aallo handi esuse xharuttese axita u bhikkile" yeydi e hido.
Laaxi yoowese hisune maaqe yeregiti gisha
Mrq 13:28-31; Luq 21:29-33
32 Sekke Yesuusay "Belese sunge mixi garafa bidzi abako eruwayte. Be gara e cultusune e washey dice ayti e jhilettoyna atoy uddhosako hi ere. 33 Yeenkewo haanxho uddi hi beeneniyaka axi yele hidi hiyuttasi yoowey e uddhonike eruwayte, fetto sumaa elliko e yese yeydi hiyoko. 34 Aadewoko hinuse ta ohe, haanxhi uddi ittoro aallo ha yeletay garuwasso. 35 Afani sahani baattako u baane, ta katomay miindi koolo aalloko e yese" yeydi e hido.
Laaxi yoowe oseydi kafe gisha
Mrq 13:32-37; Luq 17:26-30,34-36
36 Assi Yesuusay "Ye wontaara ye saatiyara ayde e maaqenike adewo baaka afaa yese woosaxitani maaqqe e yeleni ooneni eresi baasso. 37 Nohe beraa be maaddhechonike tani axi yeley yoone beraani ye esukewoko e maaqe. 38 Ye beraakani bayso waaxume e buro fetto Nohey markabiya gello wonta aallo axiti miyakaara ushiyakaara efiyakaara geliyakaara u yecha. 39 Bayso waaxi yoodi uddinawo fitti uso etto aallo erdo badiko u yecha. Yeenkewoko tani axi yele yooweni e maaqe.
40 Ye wonte wootaa lam'i axi u yesune ussaafani bidzi efutte, lakkoni atte. 41 Lam'i indowaxhini wolla woxhaa gaaciya yesune bidzi i efutte, lakkoni atte.
42 Yoonase ani wonte hi Laaxi yoonesa hi eruwa gisha oseydi miindi kakkuwayte. 43 Bidzi zawaadey qama kaysoy beeso yoodi bookke saate erdako birti kattiko kaysoy bootti geluwannike e tucaane. Ha ta otosa eruwayte. 44 Yeydiwo hi masso baa saatiya tani axi yeley ta yoone gisha hinumba naddhi katti yesuwayte!" yeydi e hido.
Lam'i maraxiti gisha
Luq 12:41-48
45 Sekkeni Yesuusay "E worguse aallo kaxa be zawa axuse e ingorosa zawaadey be zawaa e maagesso muxhuraxe maaqe gaxe keenge maalay oonewa?
46 Laaxi be yoone woggaa yeydi hantiya e yesune degexe ye maalay galatuttesesako. 47 Aadewoko hinuse ta ohe. Uddi be keenge abako garako esa e maagexe. 48 Maaqe baaka ye maalay iita maaddhi 'Ta laaxi ukke yoowasso, dooggako e doogge' hidi be muxhurowa massi 49 hanta wolko esaara be hantichoshita dure ayti goojheshaara e muudakowara e ushakowara 50 ye iita maalase e laaxi e masso baa wontiyakaara e erdo baa saatiyakaarako e yoone. 51 Ye be maala gara laaxi keddaydese yaa'ako e yaa'e, awshachiti yese godo esani e dakke. Ye godo yesesi u yeeke, be gaggo u qiice" yeydi e hido.