21
Yesuusay kuxana Yerusaleeme gellosa
Mrq 11:1-11; Luq 19:28-40; Yoh 12:12-19
1 Yesuusaara esaara hangichashitaaray Yerusaleeme handi uddhi yesine Zayte Bakkaa yese Beetefaage katamaa u ello. Yenniyani be erusichoshitaafa lam'i axe 2 "Hi buro yese katamaa hanguwayte! Hamenawoko ganuttese bidzi harre e darmiyara yaha hi degexe. Uso birshi oowayte! 3 Ooneni hinumba oyco'ayko 'Laaxi uso wordineko' yeydi hiwayte. Yenniyawoko ye harrita e anxe" yeydi e hido.
4-5 Ye esini kaayaxuna zeeruttechashi
"Xhiyoone katamase 'Ne kaati gawwo aako maaddhi harre gara uttisine darme gara yesine e yoone' hidi hiwwayte"
yeydi hiyuttechashi aaloronikeko e maaddho.
6 Handi Yesuusay biya woossonike e erusichoshiti u mato. 7 Harre e darmiyara u oodo. Ye u shashaani be maa'ita u gaddine Yesuusay u gara e utto. 8 Axi lagaafani angussi ogiya be maa'o ollicha fedeesitini mixi dahe tarshi oge gidda u dakkicha.
9 Yesuusase e buro buro hidiyara e geede geede hidiyara hangicha laga axiti "Kuxay maaquwayea Dawite yelese! Laaxi sunxuna yoonesi suuzuttesesako! Kuxay Wontose wona afaaka maaquwaye" hidi hissine maggana u uwwicha.
10 Yesuusay Yerusaleeme handi elloniya katama axiti be uddina yekke wokke hidi "Ha esi oonena?" hidi hissine u koysso. 11 Axitini "Ha esi Yesuusako, Galila wudiya yese Nazrate katamafa yooda kaayaxuko" yeydi u hido.
Yesuusay Wonto Hayla Zawa geesshosha
Mrq 11:15-19; Luq 19:45-46; Yoh 2:13-22
12 Yesuusay Wonto Hayla Zawa qeyshi giddaa gelli yaha e gawwaa zal'ichashitaara woongichashitaara uddi e gooddo. Miijhe e gara gaddi u arxicho xharabheeza assi woyya zal'ichashiti e gara utticho wombariyaraysi e gufunso. 13 Ususeni " 'Ta zaway shi'e zawako hidiko e xheygutte' hidiko e diizuttese. Hinunimay fuuliti googgoko mati essa hi yese" yeydi e hido.
14 Aafe bal'iti toke doomiti esuko Wonto Hayla Zawaa u yoonne uso e loolusso. 15 Kahinituse afana maagitaara Muse woga eruseesitaaray Yesuusay du'usesa hantine be beedoniyakaara nayshiti Wonto Hayla Zawa giddaa "Kuxay maaquwaye Dawite yelese!" yeydi u uwwesa be siidoniyakaara u huullo. 16 "Ha nayshiti ohesa siyaka ne yese?" yeydi esuko u hido.
Yesuusani "Siyako ta yese. 'Nayshi nuunannaara dhange xhahiti nuunannaara kundese galatako neese e naddho' yeydi diizuttesesa zeerusobaytuwa?" yeydi e hido.
17 Usoni yaha dhaddi ye katamaafa kessi dhaddi Biitaniya handi yahani e adho.
Bidzi belesey aacuttosa
Mrq 11:12-14,20-24
18 Hanke ketiya sho'e katamaa yoosine e naayutto. 19 Oge da'aa bidzi beleseb hiyutte mixe beedi esuko handi ye mixi gara washewo baaka abani degexe e dheeddo. Hine "Hattiyafa ayti koolo makkina aafe kaxhofuna!" yeydi e hine yenniyawo ye mixi mello.
20 Ye esani be beedoniya e erusichoshiti "Waakidini ha belesey hattewo e mello!" hidi u micco. 21 Yesuusani "Aadewoko hinuse ta ohe, eezzo badi 'Wontoy ha esa mahoko e mahe' hidi hi aadessako tani ha belese mixi gara matonikewo mahese danda'ako hi danda'e. Fetto ye esawo e maaddho baane ha bakkani 'Dendi bagadiya unguwa' hidi hiidako ungoko e unge. 22 Wonto hi shi'eniya hi shi'esa aba e maaddhakoni 'Efako nu ekke' hidi hi aadessako efako hi ekke" yeydi e hido.
Yesuusa adetoy ayafa maaqenike
Mrq 11:27-33; Luq 20:1-8
23 Yesuusani sekke Wonto Hayla Zawaa gelli yaha erusiya e yecha. Yenniyani kahinituse afana maagitaara gate cimitaaray esuko yoodi "Ha zeerita ne hantesi an adetonana? Ha adeto neese inday oonena?" yeydi u oycco. 24 Yesuusani "Hine tanini bidzi oyche hinumba ta oycceere. Hanke taase hi maho'ayko tanini uddina an adetona ta hantosa hinuse ohoko ta ohe. 25 Yohanisey Wontoy ansiniya e xhamaqichani axi ansinena?" hidi e oycco.
Usini sekke hanke wolko " 'Wontokofako' hidi nu hikkete 'Hinne ame "Aadeko" hidi esa efe hi dheeddo?' yeydiko e hine. 26 'Axukofako' hidi nu hita'ayko axi uddina 'Yohanisey kaayaxuko e maaqicha' yeydi uyne gisha jhashoko nu jhashe" yeydi wolko u kundo.
27 Ha e gisha Yesuusako "Nuni eruwanxhiko" hidi hissine u mato. Esini "Hinne tanini an adetona ha esa ta hantesa hinuse ohuwasso" hidi e hido.
Lam'i na'axhe mamako
28 Yesuusani "Hine am hinumba e bishe? Lam'i nayshe keengicha bidzi adey e yecha. Burona bidziko uddhi 'Ta yelliye, weyney yese godo hanzo handi hantuwa!' yeydi e hido. 29 Ye e yeleni 'Tani hanguwasso' hidi e inxhadho. Ye e geedeni ye be maxo arsi hantaaka e hando.
30 Assi lakkokoni ye esukewo e otine ye yeleni 'Modheko abbayo!' yeydi beydo geede hantaa hando badi e atto. 31 Ye u lam'ukaafa biyadey woossosa hantasi a'esana?" yeydi e hine "Ye burosuko" yeydi u hido.
Yesuusani "Aadewoko hinuse ta ohe. Wonto kaatetiya iita cubbachitaara seesaara haasaara hicha indowaxhitaarako hi burona gelesa. 32 Xhamaqicha Yohanisey gizo oge beysese hinuko yoodine 'Aadeko' hidi hissine etto baytako. Hinuni efe dheeddakoni iita cubbachitaara seesaara haasaara hicha indowaxhitaaray u etto. Hinne ususe beedi ame hi maxo arsi esa efe hi dheeddo?" yeydi e hido.
Weyne hantaxituse mamakuttase
Mrq 12:1-12; Luq 20:9-19
33 Yesuusani "Fede mamako siwwayte! Be gatiya weyne zuuse tottecha bidzi adey e yecha. Be tottese weyne googe qeysheni e qeyjho. Ye weyne zuusi aafey esa cicutte godo e naddho. Kafese shuchi shakka e keexxho. Ye e geedeni ye tofuttecha weyne godo miijhe efese hanteesituse u hantorosa indi zara wude dhaddi e hando.
34 Ye weyne aafe maxhese woggay ello geede e bade e hantaxiti ooworonike miijheshe hantichaashiti gara e anso. 35 Usini ye e hantaxita ayti bidzo u durdo, bidzo u woddho, fedani shuchuna u icco. 36 Sekke ye adeni burositume laga be hantaxita e ansine hade burosukewo uyso.
37 Geede aallowa 'Ha ta yele kuxako u kuxe' hissine usuko be yele e anso. 38 Ye e yele beedi 'Ha esimay e dhaalaxuko. Yoowayte, esa nu woddheese! E dhaallichoshi nuusuko e maaqe' yeydi u hido. 39 Hinne ye yele ayti weyney tofuttecho godo qeyshume wude kessi u woddho.
40 Ye weyne tottecha adey be yoodoyna ye miijhe efese hantichaashiti gara am e hantesa hinumba e bishe?" hidi e oycco.
41 Usini "Ye iita gerita waayye beysiko e bayse, ye weyneni kaxhenniya e woggana woggana e aafe biya elluse fede hantaxitusuko e inge" yeydi u hido. 42 Yesuusani "Hayla Fissharowafa fetto zeerusso baytuwa? Ye esini
'Shuchuna keexhichashiti haassi dattecho shuchi hade boorey keexe aykenike zawa ayke shuche e maaddho. Ha esini Wonto hantako, nu aafeseni du'usesako' yeydi hinesako.
43 Ha e gisha hinuse 'Wonto kaatetey hi garafa efuttiko ye kaatetese modhe aafe kaxhe fede axituse e ingutte. 44 [Ooneni ha shuchi gara ungesi medhiko e gukke, shuchi e gara unge axini fettonawoko gaacutti e baane.]' yeydiko tayne" yeydi e hido.