22
Kuulase xheygutta geri mamako
Luq 14:15-24
1 Sekke assi Yesuusay mamakona zeerisine, 2 "Afa kaatetey bisheshi ha esako. Bidzi kaati be yelese kuula naddhi 3 kuulase xheyguttechashituko 'Yoonase yoowayte!' hidi hissine be maalita ansine usini ye kuulaa yoowe u inxhadho.
4 'Xheyguttechashituko handi "Kuulase tato uddina naddhiko ta yese, ta sangitaara malla malla ta keemitaaray shufutti uddina naquttiko e yese. Kuulaa yoowayte" hidi ohuwayte!' hidi hissine kaati fede be maalita e anso. 5 Xheyguttasitini e otosa belxheydi bidzi bidziti be woota feditini be gadhesa u hando. 6 Attasitini ye e maalita ayti usuna kaadhi u woddho.
7 Kaati iitana e huullo. Be yebita ansi woddhechaashita woddhussi u katamani tamana e meggusso.
8 Ye e geedeni be maalita 'Kuulase kaxay naquttiko e yese. Xheyguttechashitimay bishutto baasso. 9 Ha e gisha oge dagaa seya haya handi hi degexe axita uddi xheyguwayte!' yeydi e hido. 10 E maalitini ogey yese aallo handi iita axitani maaqqe modhe axitani be degessosita uddinawo u bhikkillo. Kuulay essa gelicho zawa borsiti kundo.
11 Tato gara yecha borsita beyese ye kaati e gello. Yaha kuula maa'o maadho baa bidzi axe e beedo. 12 Yenniyani 'Doo, waydini kuula maa'o maadho badi haya ne gello?' hidi e oycco. Ye axi mikki e hido. 13 Kaatini be hantaxita 'E kuche e toke tutti shanna cenchaaka wude kessi dakkuwayte! Yahani yeseesiti u yeeke, be gaggoni u qiice' yeydi e hido. 14 Xheyguttaasiti lagako, xharuttaasitimay oddheko" hidi e hido.
Gaalose uddha oyche
Mrq 12:13-17; Luq 20:20-26
15 Yesuusay zeerdosuna esa qaxhese wordi Farasaxiti dhaddi handi wolla u kundo. 16 Be erusichoshitaara Herodise bade maaqe axitaara Yesuusako u oycorosa u anso. "Nu Laaxo! Aadaxe ne maaqesaara Wonto oge aadenawo ne erusesaara 'Axi am taa ohe?' hidi hissine hooddi ne hantuwannike erako nu ere. Axi aafusha beedi hantuwannako. 17 Rooma kaatusea gaalo gaaluwa e hineni gaallofunani e hine? Am niya e bishe? Mee, nuuse ohuwa!" yeydi u oycco.
18 Yesuusay u maxo iiteteni erdi "Hinuno awshachito! Abasun taa qaxhese hi worge? 19 Mee, gaalose shamutte miijhe taa beysuwayte!" yeydi e hido. Miijheni oodi esuko u indo. 20 "Ha miijhe gara yese bishaara diizuttese sunxaaray ooni e bishe?" yeydi uso e oycco. 21 "Rooma kaatuko e bishe" yeydi u hido. "Modheko, Rooma kaatuse maaqesa kaatuse, Wontose maaqesani Wontose inguwayte!" hidi e hido. 22 Ye esani siidi micci datti dhaddi u hando.
Axi be haydho geede aba e maaqesa
Mrq 12:18-27; Luq 20:27-40
23 "Haydhasiti denduwasso" hidi hine Sodoqaxiti ye wonte Yesuusako u yoodo. 24 Esani "Nu Laaxo! 'Be machi garafa bidzi axi yello badi e baadako esindo na'i ye e macho dhaalli yelli baada beyndo na'i sunxe xheysuwaye' yeydiko Musey hidecha.
25 Hinne bidzi indo na'axhey laappi nu da'aa u yecha. Na'i angussi macho etti yello baadesine e baado. Ye baadasi machoni e barsi dhaallo. 26 Lakkoni hayssoni yeydiwo se esi dhaala hay'o ha esi dhaala hay'o hissine be laappuna u itto. 27 U uddime geede ye indoy baado. 28 Iso be laappunako u ettecha haydhaasiti dende wonte oone machina i maaqe?" hissine u oycco.
29 Yesuusani "Hayla Fissharoy ohesaara Wonto osaara ere dheeddiko hi hale. 30 Haydhaasiti be dende wonte afaa yese Wonto woosaxituke u maaqesa baaka efuttuwasso geluttuwasso.
31 Haybo denxo gisha Wontoy hinuse Hayla Fissharowa otechosha zeerusobaytuwa? 32 'Tani Abrahaame Wonto, Yissaaqe Wonto, Yayqoobe Wontoko' yeydiko e hido. Wontoy haydhi yeso keengeesiti Wontoko baaka haydhi yeso keenguwasiti Wonto maaquwasso" yeydi e hido.
33 Axiti ye esa be siidoniyani e erusosuna dhonxhidi u micco.
Uddime gare woosso gisha
Mrq 12:28-34; Luq 10:25-28
34 Yesuusay Sodoqaxita zeerena iisshosha Farasaxiti siidi wolko bhikkilutti 35 esani qaxhese wordi usaafa Muse woga eraxi bidzi 36 "Laaxo! Muse wogaafa uddime gare woossoy a'esana?" yeydi e oycco.
37 Yesuusani "Ne Laaxe ne Wonto fetto ne muxhurona, fetto ne lubbona, fetto ne maxona eehuwa! 38 Buronasaara uddime gare woossowaray ye esako. 39 Lakko woossoni ha esa bisheshako. 'Fede axe uddina niya ne eehenikeysi eehuwa!' yeydi hinesako. 40 Ha lam'i woosso bakkaako Muse woga fissharowara kaayaxitusaarayb uddina e eedho" yeydi e hido.
Kristosa gisha uddha oyche
Mrq 12:35-37; Luq 20:41-44
41 Farasaxiti bhikkiluttesune Yesuusay 42 "Mesihese am hi maxe? Oone yelena hinumba e bishe?" yeydi e oycco. Usini "Dawite yeleko" yeydi hido.
43-44 Yesuusani "Dawitey hine Ayaanana durkutti 'Wontoy ta Laaxuse "Ne iilaxita iisshi ne adeto oomo ta mahoro aallo ta oshishaa uttuwa!" hidiko hidese' hidi abasuwa e hido? Hine waydini Dawitey Mesihe 'Laaxo' hidi e xheyge? 45 Dawitey 'Laaxo' hissine xheydine hine waydini e yele maaqese e danda'e?" yeydi e hido.
46 Bidzini e zeere utta hanke esuse matay dheeddo. Ye wontiyafa bidzi oycheni sekke e gara uqusese naassay baasso.