20
Afa kaatetey aba bishesha
1 Sekkeni Yesuusay "Afa kaatetey ha esukeko e maaqe. Bidzi adey weyney essa tofuttese saha e keengicha. Bidzi wonte ketiya sho'e kessi miijhena hanteesita worgiya e hando. 2 Uso degessini bidzi wonte hanta wooma elle miijhea ingese usaara kundi be gatiya e anso.
3 Haydzi saate e maaqe woggani yeyna handi hanta keenguwadecha fede geriti hanta dheeddi yaha oge dagaa u ee'usune beedi 4 usoni 'Hinunini weyne ta tottese gatiya handi hantuwayte. Hi hantosuse maaqe miijheko ta inge' yeydi e hido. 5 Usini hanta gara u hando.
Ye weyniyadeni izzuppunaara odduppi saatenaara kessi yeysi e mato. 6 Tamma bidzi saatenani kessi fede axiti ee'usune degessi 'Hinuni wonta kume hanta baa haya hi feysshoshi abasuna?' hidi e oycco. 7 Usitini 'Nu hantusesa dheeddiko' yeydi uyne 'Yebo, handi hinunini weyne ta tottese gatiya hantuwayte' yeydi e hido.
8 Sahay qandine ye weyne tottecha sahaadey u gara be maagesechoshukoni 'Hantaxitani uddina xheydi geede gellasitaafa ayti buro yecha hantaxiti aallo u hanta wooma inguwa!' yeydi e hido.
9 Tamma bidzi saatena hante aytechashiti be bidzi bidzinani yoodi ye bidzi wonta be hanto wooma u etto. 10 Burona hantaa gellechashiti wooma efese yoosine usume garesa be ekkenike u maxicha. Maaqe baaka usini ye bidzi wonte be hanto woomawo be uddina u etto. 11 Miijhe be etto geede hantusicha ade gara umbu umbu hidi uydo. 12 'Ha usi geede aaluwa yoodi bidzi saatewo u hantechoyne wonta kume awwa dheekuna hantaa gatti feyshecha nuura woli genno ame ne mato?' hissine e gara u koysso.
13 Ye weyniyadeni usaafa bidziko 'Nuundo na'e, fetto niya miidho baasso. "Bidzi wonta hanta woomako neese ta inge" hidi neera kundo badiya ta yecha? 14 Doo, niya ellesa etti hanguwa! Geede yoodaasituseni ne ettosi gennowoko "Ta inge" hidiko ta hidese.
15 Ta eehenike taase ta miijhena hantese adeto keenguwamba? Hinne yeydi ta jherdo gishaa ne dhiidhe?' yeydi e hido. 16 Ye esukeni burose maaqichashiti geedesuko u maaqe, geedese maaqichashitini burosuko u maaqe" yeydi e hido.
Yesuusay be gara elle maddhase haysso wogga zeerdosa
Mrq 10:32-34; Luq 18:31-34
17 Yesuusani Yerusaleeme hamiya e yecha. Oge wolko hangichine be erusichoshita u goshewo hanke beeko bhikkilli 18 "Siwwayte! Yerusaleemeko nu hange. Yahani tani axi yeley Wonto Zawa kahinituse afana maagitusaara Muse woga eruseesitusaara gardi ta ingutte. Ta hay'oronikeni ta gara u yaa'e. 19 Ayhuda maaquwasituse garsi u inge, usini ta gara u qozooze, jhiraafenani u dure, suxxhi u wodhe, Haybowafani haysso wonte ta dende" yeydi e hido.
Zabdoose machi be nayshi maagetorosa shidhosa
Mrq 10:35-45
20 Zabdoose machi be lam'i na'axhiyara wolko hanke Yesuusako yoodi e buro bocunti be worge bidzi base e hantorosa i shidho. 21 "Am ta hantorosa ne worge?" yeydi e oycco. "Ha ta nayshi lam'e ne kaatetiya bidzo ne oshishaa bidzo ne hadursaa u uttorosa mahuwa!" yeydi i shidho.
22 Yesuusay ususeni "Hi shi'esani eruwaytako. Ta ushe maddha usshe usheshe danda'aa hi danda'e? [Tani xhamaqutte xhinqate xhamaquttese danda'aa hi danda'e?]" yeydi e hine "Eewwa, danda'ako nu danda'e" yeydi u hido.
23 Esini "Tani ushe maddha usshema aadewo ushoko hi ushe, ta oshishakaara ta hadursakaara hi uttoronike mahesi taa e maaddho baane nuwadeko. Esako ye be naddhese godo ususe be hidese axuse ingesa" yeydi e hido.
24 Ye u shidhosa be siido wogga atta tammi e erusichoshiti ye lam'i wolindo na'axhiti gara u huullo. 25 Yesuusay u uddina beeko xheydi "Ayhuda maaquwa ha saha gara yeseesituse u afana maagay axita osana u durkenikiyaara anguzaxheni uso be eehenike ahenikiyara erako hi ere.
26 Maaqe baaka hi giddani yeydi maaddhoppe. Hinukaafa ooneni afana maaqese worgesi hi maraxe maaquwaye. 27 Hinukaafa ooneni angusse maaqese worgesi hi maala maaquwaye. 28 Yeydiwo tani axi yeley ta yoodosi axe maresaara ta yeso garsi indi laga axe taanna wozesaarako baaka axi taa marorosa yoodo baasso" yeydi e hido.
Lam'i bal'ay loollosa
Mrq 10:46-52; Luq 18:35-43
29 Yesuusaara e erusichoshitaaray Yarikofa kessi u hangusune laga axiti usaara wolla u hando. 30 Lam'i bal'ay oge nuuna uttiya u yecha. Yesuusay yeyna garesa siidi "Dawite yele nu Laaxo! Odde, nuu beewwa!" hidi hissine lagussi u uydo.
31 Axitini "Mikkuwayte!" hidi hissine uso u gayllo. Inxhadhiwo "Dawite yele nu Laaxo! Odde, nuu beewwa!" hidi hissine lagussi kato keddaysi u uydo. 32 Yesuusani eedhi uso xheydi "Am hinuse ta hantorosa hi worge?" yeydi e oycco.