16
Yesuusay micushe abako hantorosa e oycutto
Mrq 8:11-13; Luq 12:54-56
1 Yesuusa naadhi beyese wordi Farasaxitaara Sodoqaxitaaray esuko yoodi "Wontokofa maaddhese yerago micushe hanta nuu beysuwa" hidi hissine u oycco. 2 Yesuusay ususeni "Qamese e hisune 'Afay zodhiko yese, iray bukuwasso' yeydi hiine, 3 assi ketiya sho'e hi dendoyna 'Dhumay afaa ayti yesune e zodhese gisha, hanzo iray bukkako e bukke' yeydi hiine. Afama beedi abay maaqesa erese danda'ako hi danda'e, maaqe baaka beray aba maaqesa e yerago erese danda'uwaytako.
4 Iitaara Wonto dhaddi fede wontoko hangesaara maaqe ha beraa yese axiti micushesha beyesuko u worge. Kaayaxi Yonase gara hantutta micushe hantame fede micushe hantay beysuttuwasso" hidi hissine be oto geede Yesuusay fede godo dhaddi e hando.
Farasaxiti garafaara Sodoqaxiti garafaara biya kafe gisha
Mrq 8:14-21
5 E erusichoshitini bagade semfa fotti be handoniyani gallase maaqe boora botti u handecha. 6 Yesuusay be erusichoshitani "Farasaxitusaara Sodoqaxitusaara maaqe iraacite garafa hinumba kakkuwayte! Oseywayte!" yeydi e hido. 7 Usini "Boora nu oodo baa gishako yeydi e hido" yeydi hissine sekke hanke wolla u zeerdo.
8 Yesuusani u zeeresa erdi "Tamba hi gobbesi waakeydiwo oddhe e maaddho. 'Boora nu oodo baa gishako yeydi e hido' hidi hissine ame sekke hanke wolla hi zeere? 9 Ada hinuse geluwaye? Ichichi kuma axuse ichichi boora bachey ellosaara atta baxe aanxhi kofa hi densechoshaara maxiya baytuwa? 10 Yeydiwo oyddi kuma axuse laappi bache booray elline attase aanxhi kofa kume hi densechosha maxiya baytuwa?
11 Ta zeerdosi boorase e maaquwannike waydi ere hi dheeddo? Yebo Farasaxitusaara Sodoqaxitusaara maaqe iraacite garafa hinumba kakkuwayte" hidi e hido. 12 E erusichoshiti Farasaxitaara Sodoqaxitaaray erusesaafa biya u kaforonike baaka boora iraacitiyafa e maaquwannike e zeerdosa u erdo.
Yesuusay oone maaqesa Phexhrosey otosa
Mrq 8:27-30; Luq 9:18-21
13 Yesuusay Filphoose Qesaariya hisso katamay essa yese wude handi yaha be elloniya be erusichoshita "Axiti taa axi yele oonekoydini uyne?" hidi e oycco. 14 Usini "Bidzi bidziti 'Xhamaqicha Yohaniseko', feditini 'Elaaseko', assi feditini 'Eremiyaseko' oo'oyne 'Kaayaxitukaafa bidziko' hidiko uyne" yeydi u hido. 15 Yesuusani "Hinne hinunichi? Oonekoydini taa hiine?" yeydi e oycco. 16 Yenniyani Simoone sungicha Phexhrosey "Neni Mesiheko, en'a Wonto yeleko" yeydi e hido.
17 Yesuusay "Yoona yele Simoone! Neni suuzuttesesako. Ha esa neese addusay afaa yese nuwade baaka axe maaquwasso. 18 Phexhrose neese yeydiko tayne, neni shuchuko, ha kaacho shuchi garako ta zawa ta keexhe. Hayboy be osana ha ta zawa iichuwassho. 19 Afa kaatete suma esuna ne do'esako neese ta inge. Sahaa ne tuttoy afaa tufuttesesako e maaqe, ha sahaa ne birshoy afaa birchuttesesako e maaqe" yeydi e hido. 20 Yeydi beydosi geede be erusichoshituko bemba "Ha esi Mesiheko" hidi hissine oonekoni sekke u zeeruwannike e tucco.
Yesuusay be gara elle maddhase bidzunxo wogga zeerdosa
Mrq 8:31-33; Luq 9:22
21 Ye woggaafa ayti Yesuusay be erusichoshituse "Yerusaleeme hameko taa e worguse. Yahani gate cimitaara, kahinituse afana maagitaara, Muse woga eruseesitaaray laga maddha taa u beyse, taa u wodhuse. Wodhusuttuwaye baaka haybowafa haysso wonteko ta dende" yeydi e ohicha. 22 Phexhrosey Yesuusa bade gara kessi "Ta Laaxo! Wontoy ha esa ne gara oodoppe, fettoni niya elloppe!" yeydi e kassho. 23 Yesuusay sekke maaddhi Phexhroseko "Neno Humbaye, ta da'aafa haruwa! Neni maxesi axi maxoke baaka Wonto maxoke e maaquwa gisha taase dhumoko ne maaqe" yeydi e hido.
Yesuusa gisha bemba dhabe
Mrq 8:34-9:1; Luq 9:23-27
24 Ye e geede Yesuusay be erusichoshituko "Taara hamese worgesi yesa'ayko bemba dhaddi be suxi mixe iddi taara yoowaye. 25 Beese be yeso kafese worgesi uddina baysako e bayse, be yeso taame hissine garsi ingesimay yesoko e degexe. 26 Axi ha sahaaka yesesa uddina degexa be lubbo dheeba e hidako am esa e go'e? Axi be lubbo wozese danda'esa am e shange? 27 Tani axi yeley nuwade kuxa fuulana hayla ta woosaxitaara yootako ta yoone. Ye woggaako u bidzi bidzise u hantake wooma ta inge. 28 Aadewoko hinuse ta ohe, tani axi yeley afaafa ta kaateto kuxana ta yoosune be beyoro aallo haya yeseesitaafa hay'uwasitako yesa" yeydi e hido.