17
Yesuusa bishay artosa
Mrq 9:2-13; Luq 9:28-36
1 Izzunxo wonte geede Yesuusay Phexhrose, Yayqoobe esindo na'i Yohanise yeysi beera etti bidzi orje bakka gara beesewo u kesso. 2 U buro yaha e bishay arto, hade qoossuke e aafushay faddho, e maa'oni bootti aafiya e caddicha.
3 Yenniyawo Musiyara Elaasiyaray Yesuusaara zeerusune u beedo. 4 Phexhroseni Yesuusa "Ta Laaxo, haya ni yesesi niise waydese modhena! Ne eeha'ayko bidzo neese bidzo Musese bidzo Elaasese hissi haydzi ashita ta keexxheere" yeydi e hido.
5 Hagawo Phexhrosey zeereniya lehhidese dhumay yoodi uso e fassho. Ye dhumaannani "Esuna ta magge ta eehe yeley ha esako, esuse siwwayte" yeydi hine kato u siido. 6 Ye esani be siidoniya leemo be kesso gisha e erusichoshiti sahaa deemona u undo. 7 Yenniyani Yesuusay usuko shidhi be kuchena uso ayti "Aadekoydi hidofita! Denduwayte, jhasshofita" hidi e hido. 8 Wokke keddaydi u beesune Yesuusawo baaka ooneni beyutto baasso.
9 Bakkaafa yekke u hodhusune Yesuusay "Tani axi yeley haybowafa ta dendoro aallo ha hi beedosa oonekoni zeerdofita" hidi hissine be erusichoshituse minsi e oto. 10 Usini "Muse woga eruseesiti 'Mesihey yooneesume burona Elaaseko yoowe e worguse' hidi ame uyne?" yeydi esa u oycco. 11 Esini "Aadeko! Elaasey buronako e yoone, uddi baseni naqako e naqe. 12 Hinuse ohoko ta ohe, yoowema Elaasey ollowoko e yoodo. Axitini esa e maaqesa erdo badiko be eetonike e gara u hanto. Ye esukewoko taa axi yeleni maddha u beyse" yeydi e hido. 13 Yeydi e hine e zeerdosi Xhamaqicha Yohanisese e maaqesi yenniya ususe e gello.
Bidzi yele garafa xhoozi gooduttosa
Mrq 9:14-29; Luq 9:37-43
14 Usini yekke laga axituko u yoodo wogga bidzi axi Yesuusako yoodi e toke gara undi 15 "Ta Laaxo! Odde, ta yele maaruwa! Jhiiceya iitana esa aytiko tamaani waassaani laga woggaaka olli e maddhunxe. 16 Ne erusichoshituko ta oonneko loolusey uso iissho" yeydi e hido.
17 Yesuusani "Hinuni waydi aadexuwa gizo oge eruwasitani! An aallona hinunaara ta yese? An aallowa hinumba ta danda'e? Mee, yele taako oowayte" yeydi e hido. 18 Yesuusani xhooze kasshine yenniyawo xhoozi esa dattine ye yeley loollo.
19 Ye e geede e erusichoshiti be goshewo yesine Yesuusako uddhi "Abasuna nuni xhooze goode danda'e nu dheeddo?" hidi hissine u oycco. 20 Yesuusani "Goode hi dheeddosini Wonto gara hi keenge aadexo eeretenako. Aadewoko hinuse ta ohe, saamo aafe genni aadexoy hinuka yessako ha bakka 'Hayafa dendi se bade garuwa!' yeydi hiidako maaqoko e maaqe. Hinumba iiche abakoy baasso. [ 21 Haanke yese xhoozi Wonto hi shidho baasaara hi xhoondo baasaara goodese danda'uwaytako]" yeydi e hido.
Yesuusay be gara elle maddhase lakkunxo wogga zeerdosa
Mrq 9:30-32; Luq 9:43-45
22 Bidzi wonte e erusichoshiti Yesuusaara wolko Galilaa u bhikkilutto. Yenniyaka esini "Tani axi yeley axiti kuchiya gardi ta ingutte. 23 U wodhe, haybowafani haysso wonte ta dende" yeydi e hine e erusichoshiti orjena u higillo.
Gaalo gaale gisha
24 Yesuusay be erusichoshitaara Qifirnahoome katamaa handoniya Wonto Hayla Zawase gaalo ekkichaashiti Phexhroseko uddhi "Hi Laaxi Wonto Hayla Zawase gaalo gaala e gaaleni, gaaluwannikeni e hido?" yeydi u oycco. 25 "Gaalako e gaale" yeydi e hido.
Zawa hanke Phexhrosey gelline burona Yesuusay "Simoone, am niya e bishe? Ha saha kaataxhey qaraxhaara gaaluwaara oone garafana u ekke? Be axi garafaani fede wude axi garafaara?" yeydi e oycco. 26 Phexhroseni "Fede wude axi garafako" yeydi e matine Yesuusay "Hinne beese e wude axiti gaalo gaaluttuwasso yeydi hiyoma!
27 Maaqe baaka uso nu huuluseesume manxhaqob aandi bagadiya datti burona ne ayke gulxhe assha dodhi Wonto Hayla Zawa gaalose elle miijheko ne degexe. Ye esa neesaara taasaara aandi gaaluwa!" yeydi e hido.