15
Gate woga kakkisine Wonto woga bote gisha
Mrq 7:1-13
1 Yerusaleemefa Farasaxitaara Muse woga eruseesitaaray Yesuusako yoodi 2 "Ne erusichoshiti olofa yecha gate wogana ame u hantuwaane? Woga gardiko kuche shoto badia kaxa u muune" yeydi hissine u oycco.
3 Yesuusani "Hinunichi? Hi wogame hissine Wonto woosso gariya baytuwa? 4 Ye esini Wontoy 'Niyadiyara neyndowara kuxuwa!' assi 'Biyade oo'oyne beyndo casheshi fetto hay'uwaye' yeydiko e woosese.
5 Hinunimay 'Bidzi axi biyadese oo'oyne beyndose go'esa ingese beychosha "Wontosuko ta indo" hidi e hidako 6 biyade oo'oyne beyndo kuxe worgusuwasso' yeydiko hiine. Ye esukeysi hi gate wogame hissineko Wontoy otechosha hi bayse.
'Ha geriti be nuunanawoko taa u kuxe, u muxhuromay taakofa zardiko yese.
9 Axukofa kessa era Wonto woga mati erusisineko yaho taase u akkire'
yeydi e hidecha" hidi e hido.
Axe dhohusesi gisha
Mrq 7:14-23
10 Yesuusay beeko hanke axita xheydi "Siwwayte, gaxhuwayte! 11 Axe dhohusesi axi nuunafa kesesako baaka hanke asshaanna gelesa maaquwasso" yeydi e hido. 12 E erusichoshiti esuko hanke uddhi "Ha ne zeerdosa siidi Farasaxiti ne gara u huullosa eriyaka ne yese?" hidi hissine u oycco.
13 Esini "Afaa yese nuwadey totto baa tofey uddinawoko e shodutte. 14 Beese bal'itaara bal'a durkeesitaara u maaqe gisha uso dhagguwayte! Bal'ay bal'a durko'ayko hobolowako be lam'una u unge" yeydi e hido.
15 Phexhroseni Yesuusa "Ha ne zeerdo zeere nuuse birshi ohuwa!" yeydi e hido. 16 Yesuusani "Hinuni hatte aallo gaxhuwasituwa? 17 Asshaanna gelesi gawwa handi uddinawo wude e kesenike gaxhuwaytuwa? 18 Maaqe baaka nuunaanna kesesi muxhurowafako e kese. Ye esako axe dhohusesi. 19 Muxhurowafa kesesi iita maxo, axe wodhe, laggete, maaquwa ogena wolla muhe, kayse, zaade ateye, axe cashe uddi ha esako. 20 Axe dhohusesi ha esa bissheshe zeere baaka kuche shoto badi miyemay axe dhohusuwasso" yeydi e hido.
Bidzi Kene'aanaxhi aadexo
Mrq 7:24-30
21 Yahafa dhaddi Yesuusay Xhirosiyara Siidooniyara hisso katamay essa yese wudiyaka e hando. 22 Kene'aanaxhiyo maaqicha indoni yahafa Yesuusako yoodi "Ta Laaxo, Dawite yele! Ta bushoko xhoozi ayti iitana maddhunxe, odde taa beyashuna?" yeydi uwwisine i oto.
23 Esini bidzoni mahe baaka mikki e hido. E erusichoshiti hanke esuko uddhi "Ha indoy nu geede yoodi uwwesa, odde, iso anxuwa" yeydi u shidho. 24 Esini "Isra'eele geritaafa hade baada doruke hideseesitusewoko tani anxutto" yeydi e hido.
25 Maaqe baaka ye indoy uddhi e toke gara undi "Ta Laaxo, odde, taa maruwa" yeydi i hido. 26 Yesuusani "Nayshiti boora etti kanase dafey bishuwassho" yeydi e hido. 27 Isini "Ta Laaxo! Ye esini aadeko. Maaqe baaka kanitini fetto be laaxiti tatowafa gukkesako maxxhi u muune" yeydi i hido. 28 Yesuusani "Neni ta gara ne keenge gobboy orjeko, ne worgenike maaquwaye" yeydi e hine yenniyawo ye i bushoy loollo.
Laga hargaxiti loollosa
29 Yesuusay yahafa dendi Galila bagade da'aanna gardi bakka garani kessi yaha e utto. 30 Fettona laga axiti esuko toke doccesheeshita, bal'ita, doomita, muumitaara fede hargaxitaara etti u yoodo. E buro oodi u gaddine e loolusso. 31 Axiti toke doccechaashitini loolusune, doomitini gizzi hangusune, bal'itini beesune, muumiti zeerusune be beedoniyaka orjena micci Isra'eele Wonto kedda kedda u hisso.
Oyddi kuma axita muusse
Mrq 8:1-10
32 Be erusichoshita beeko xheydi Yesuusay "Ha axiti haydzi wonte aallo taara u deceshe gishaara u muunesi haya baa gishaara higilsako taa u higilse. Hangisine naaydi ogiya gatti u ungeeme abani u muudo baanne 'Dhaddi hi zawa hanguwayte' hidi hiye worguwasso" yeydi e hido. 33 E erusichoshitini "Hinne haanxhi axuse elle boora ayafani ha saha melaa nu efe?" yeydi u hido. 34 "Aanxhi boorana hi keenge?" yeydi e oycco. "Laappi bache booraara oddhe giddha gulxhitaarawoko nu keenge" yeydi u hido.
35 Yesuusani axituko "Sahaa uttuwayte" hidi e hido. 36 Ye laappi bache booraara gulxhiyara etti Wonto e galatto. Meyssi gussi be erusichoshituko e indine usini axiti buro u garso. 37 Be uddina muudi u misshine atta baxe e erusichoshiti laappi kofa kume bhikkilli u denso. 38 Muudasiti indowaxhitaara nayshitaaray taabutto baane oyddi kumako u maaqicha. 39 Yesuusay axita be buddo geede zabhaa gelli Magadoone wude e hando.Ee'o