14
Xhamaqicha Yohanise haybo
Mrq 6:14-29; Luq 9:7-9
1 Galila wude ahesa maaqicha kaati Herodisey yenniyaka Yesuusay hanto odo e siido. 2 Be hantaxituse "Ha axi Xhamaqicha Yohaniseko. Esako haybowafa denda. Ha e gishako ha micushe hanta hantese osa e keenge" yeydi e hido.
3-4 Ye esume buro Herodiseyndo na'i Filphoose macho maaqicha Herodiyada gisha Yohanisey "Wogay oossechosha Herodiyada neese macho mati ne ettosi modhe maaquwasso" hidi e hicha. Hinne Herodisey Yohanise aykussi tufussi tufe zawa e gelsusso. 5 Yohanise wodhese wordi Ayhudaxiti "Kaayaxuko" hidi uycho gisha uso e jhassho.
6 Herodisey yelutto kuxa wonte Herodiyada bushoy xheyguttecha borsiti buro yoodi ose sekke hanke dholli kaadhi Herodise iitana i maggusso gisha 7 "Ne worge abako taa oycuwa! Aadewo ingako ta inge" hidi hissine Herodisey caadho. 8 Ye busshini beyndoy otonike "Xhamaqicha Yohanise qino abako gara gaddi hattewo taase inguwa" yeydi iido.
9 Ye i otosuse kaati e higillo. Maaqe baaka be caaqo gishaara tato gara beera uttecha borsiti "Am taa ohe?" hissiniyara Yohanise qinoy isuse inguttorosa e oto. 10 Axe ansi tufe zawaa Yohanise qino e bursusso. 11 Sanqiya gaddi oodi ye be burso qino busshishe u indo, isini beyndose aandi i indo. 12 E erusichoshiti yoodi e aha etti mooddi handi ye esani Yesuusako u oto.
Ichichi kuma axita muusse
Mrq 6:30-44; Luq 9:10-17; Yoh 6:1-14
13 Yesuusay Yohanise haybo be siidoniya be goshe yesese axi baa godo zabhaa gelli e hando. Laga axiti e handosa be siido wogga beyecho katamittaafa kessi e geede sahaanna be tokena u hando. 14 Yesuusay zabhaafa kessi laga axita beedi ususe higilli hargichaashita usaafa e loolusso.
15 Sahay qandine e erusichoshiti hanke esuko uddhi "Ha godoy essaa abakoy baa mela godoko, sahani iitana qandiko e yese. Handi be ukke yese katamittaafa kaxa beese u woomoronike ha axita dakkuwa!" yeydi u hido. 16 Yesuusani "Hame uso worgusuwasso. U muunesa hinuni inguwayte" yeydi e hido. 17 Usini "Nuni haya oddhe ichichi bache booraara lam'i gulxhiyara baaka abani keenguwanxhiko" yeydi u mato. 18 Esini "Ye esita hana taako oowayte" yeydi e hido.
19 Leddo gara axiti uttoronike e oto. Ichichi booraara lam'i gulxhiyara etti afaa beedi Wonto e galatto. Boora meyssi gussi be erusichoshituko e indo. Usini ye axituse uqusso. 20 Be uddina muudi u missho. Atta baxe tamma lam'i kofa kume e erusichoshiti bhikkilli denso. 21 Ye boora muudasiti indowaxhitaara nayshitaaray taabutto baanne ichichi kuma elle asanxitako u maaqicha.
Yesuusay waaxi garana tokena hanti handosa
Mrq 6:45-52; Yoh 6:15-21
22 Yesuusay axita dakkisine be erusichoshita "Zabhaa gelli taame burona semfa fottuwayte" hidi e aallusso. 23 Axitani be datto geede bidzi bakka gara shi'ese be goshe e kesso. E qandineni yaha be goshewo e yecha.
24 Yenniyaka bagade nuunafa zabhay orjena e zardo. Agexi u burona hanke oxhiya e yecho gisha sekke hanke jhirahoy zabha maddhunxiyaka e yecha. 25 Yesuusay be erusichoshituko waaxi garana tokena hanti qamaafa odduppi saate geede e yoodo. 26 E erusichoshitini waaxi garana tokena e hantusune be beedo wogga orjena leemo kessi "Gomaxuko!" hidi hissine be jhasshoshi geede u uydo.
27 Yesuusay ukkenawo usuko zeerisine "Aadeko hidofita, tambako, jhasshofita!" yeydi e hido. 28 Phexhroseni yenniya "Ta Laaxo, fetto niya e maaqo'ayko tamba 'Waaxi garana tokena hanti taako yoowwa' hidi hiwwa" yeydi e hido. 29 Yesuusani "Taako yoowwa!" yeydi e hido.
Phexhroseni zabhaafa kessi Yesuusako hamese waaxi garana hame e ayto. 30 Hanguwaye baaka agexi iitana oxhicho gisha e jhasshinne waaxi esa oodhese hinne "Laaxo, taa kessuwa!" hidi hissine e uydo. 31 Yenniyawo Yesuusay ansi ayti "Doo, taa ne gobbesi waakidi oddhe e maaddho! Ame taa ne eeze?" yeydi e hido. 32 Zabhaa handi u gelloniya agexi mikki hido. 33 Be uddinawo ye zabhaa yechashiti "Aadewo neni Wonto yeleko!" hidi hissine Yesuusa buro u akkirdo.
Yesuusa maa'o dolli loollaasita
Mrq 6:53-56
34 Bagade semfa fotti Yesuusaara e erusichoshitaaray Genserexheydi hisso godo u yoodo. 35 Ye wude axiti Yesuusa e maaqesa erdi uddi be googe yecha wudittaa e yoodosa axi siyorosa woosso u anso. Hargaxita uddi esuko oodi 36 e maa'o bira u dolorosawo Yesuusa u shidho. Dollaasitini be hargiyafa uddiwo u loollo.