13
Mor'e mamako
Mrq 4:1-20; Luq 8:4-15
1 Ye wonte Yesuusay zawafa kessi bagade da'aa handi e utto. 2 Iitana axi lagay esuko yoodo gisha zabhaa gelli e utto. Axitini bagade da'aa u ee'icha. 3 Mamako mamatti laga base e erusso.
Erusisine "Bidzi adey ayla aylese e kesso. 4 E aylusuneni mor'iyafa bidzi bidzi aafey oge da'aa undine kafiti yoodi maxxhi u muudo.
5 Fede mor'eni laga saha be oomo keenguwa qaaqa gara e undo. Be oomo laga saha keenguwasa e maaqicho gisha ye mor'ey yenniyawo e mudho. 6 Mu''eese baaka awway aydo geedeni shulli xhabho be dakke godo dheeddi e mello.
7 Fede mor'eni haga cultiya yese anke gidda e undo. Ye ankeni dicci be oomo esa e ayto.
8 Fede mor'eni modhe saha aylutti mudhi laga aafe e kaxxho. Badey xhiixe, badey izzuppi tamme, badey haydzi tammi aafe yeysi u kaxxho. 9 Yoonase washe keengesi naddhi siwwaye!" yeydi e hido.
10 E erusichoshitini Yesuusako yoodi "Mamakona ame axe ne eruse?" yeydi u oycco. 11 Esini "Afa kaatete gisha axi eruwasa hi eroronike hinuse maaddhiko e yese. Ususema u eroronike maaddho baasso. 12 Ye esini keengeesituse assi e ingutte, orjena e lagge, keenguwasi garafa ye e keengicho oddheni fettonawoko e efutte.
13 Mamakona ta zeeresi beesine beewasitukiyara siisine siwwasitukiyara gaxhuwasitukiyara u maaqe gishako. 14 Yeydi e maaddhosi kaayaxi Isayasey
'Siyama siitako hi siine, gaxhuwaytako.
Beyema beetako hi beene, naddhi beewaytako.
15 Ha axiti be muxhuro minsiko be washeni tucci be aafeni cinadhi u yese. Yeydi maaqe u dheeddako be aafenani beedi be washenani siidi be muxhurowani massi taako u yoodakoko ta loolusaane' yeydi diizechashi e aalloronikeko.
16 Hinunimay hi aafey beene gisha hi washey siine gisha suuzuttesesako. 17 Aadewoko hinuse ta ohe, laga kaayaxitaara gizo axitaaray hatte beya hi yesesa beyese col'iko u yecha, beyutto baasso. Siya hi yesesa siyese col'iko u yecha, siyutto baasso" yeydi e hido.
18 Assi Yesuusay "Ayla ayle ade mamako birche siwwayte. 19 Oge da'aa unda mor'ey Wonto kaatete gisha ohutta kato siidi gaxhuwa axuko. Iita Humbayey ukkena yoodiko e muxhurowa ayluttecha Wonto kato e ekke.
20 Qaaqa ayluttasi Wonto kato siidi yenniyawo maggana ekke axuko. 21 Maaqe baaka woggasewo baaka xhabho keenguwasso. Wonto kato gisha maddhay oo'oyne goodoy maaddhako ukkenawoko dhumutti e unge.
22 Anke dhudha gidda ayluttasi Wonto kato woggasewo siine axuko. Ha saha maxowara wodunte eehaaray e muxhurowa kundi kato u gite, aafe kaxhuwasani e maaqe.
23 Modhe saha ayluttasi Wonto kato siidi gaxxhi ekke axuko. Ye e bisha axitaafa bidzi bidziti xhiixe fediti izzuppi tamme fediti haydzi tammi aafe yeysiko u kaxhe" yeydi e hido.
Wulela mamako
24 Yesuusay fede mamakona ususe yeydi e oto. "Afa kaatetey e bisheshi ha esako. Bidzi adey be wootaa modhe mor'e e ayllo. 25 Uddi axi geto geede iilaxi yoodi gossaaka wulela aylli e hando. 26 Gossay mudhi dicci kaxhe ayto geede gossaaka ye wulelay e bento. 27 Ye wootaade maaliti esuko yoodi 'Laaxo, modhe mor'e ne wootaa ayllo badiya ne yecha? Hinne ayafani wulelay essaa bento?' yeydi u hido. 28 'Iilaxuko ha esa hanta' yeydi e hido. 'Hinne, wulela nu shodorosa eehaa ne eehe?' yeydi e maaliti u oycco. 29 Esini 'Maaquwasso. Wulela hi shodusune esaarako gossani haliya hi shode. 30 Dhagguwayte, gossay acuttoro aallo wulelani esaarawo yesuwaye. Ace woggay elleniya aceeshita "Burona wulela maxhuwayte, tamana meggeseni e udumana udumana tukkuwayte. Ta gossa bhikkilli ta li'iya gelsuwayte" yeydiko tayne' hidi ye wootaade e hido" yeydi e hido.
Wonto kaatetese mamakuttaasita
Mrq 4:30-34; Luq 13:18-21
31 Yesuusay fede mamako yeydi ususe e mamatto. "Afa kaatetey ha esako e bishe. Bidzi axi be woota aandi hade saamo aafekese senafice hidi hiyutte mor'e e ayllo. 32 Isini fede mor'eme uddi eerdeseniyoko. Be dicco geede ha saha gara ayluttesesaafako uddi i gare. Diccini mixe maaddhi i hange garani kafiti keexe keexxhi essa u yese" yeydi e hido.
33 Feda assi mamakisine "Afa kaatetey haydzi jhal'a dhiila matti etti dhon'a indo iraaciteko e bishe. Hinne aalliciraaka ye dhiilay be kumena e dendo" yeydi e hido.
34 Haanxhi zeere uddina Yesuusay mamakona axituse e zeerdo. Mamako keenguwasa bidzoni ususe zeerdo baasso. 35 Yeydi e maaddhosini kaayaxi
"Ta zeere mamakonako ta adduse, sahay meddhuttosafa ayti ijhaa yecha zeereko ta zeere"
yeydi hiyuttechay aaloronikeko.
36 Yesuusay beera yecha axita yaha dhaddi zawa e gello. E erusichoshitini esuko hanke uddhi "Ha gossaa benta wulela mamako nuuse birshi ohuwa" yeydi u hido. 37 Yesuusani "Modhe ayla ayllasi axi yeleydi hiyuttesako. 38 Wootay ha sahako, modhe mor'ey Wonto kaatete axitako, wulelay iita maaqe Humbaye bade maaqe axitako. 39 Wulela ayllasi iilaxi Humbayeko. Acci bhikkile woggay ha saha alsoko, aceeshiti Wonto woosaxituko. 40 Wulelay shodutti bhikkilutti tamana megguttenike ha sahay aalusuneni yeenkeko e maaqe.
41 Cubbowa aange basitaara iita hanteesitaara uddina e kaatetiyafa bhikkilli u kessoronike axi yele hidi hiyuttasi be woosaxe e anxe. 42 Iitana eexhe tamaani u dafutte, yahani u yeeke, be gaggoni u qiice. 43 Yenniyani gizo axiti biyade kaatetiya qoossukeko u faqe. Yoonase washe keengesi naddhi siwwaye!" yeydi e hido.
44 Sekkeni Yesuusay "Afa kaatetey woota giddaa aachutti yese danda'uttuwa laga miijheko e bishe. Bidzi axi ye miijhe degessechine yaha dhaddi be maddosuna be keengichosha handi uddinawo zal'i ye gate e woondo" yeydi e hido.
45 Yesuusani assiwo "Afa kaatetey woomani zal'ani hidi aqe axi e woomay keddaydese shushaafa hantuttese seelo abako woomese worgesako e bishe. 46 Moddhi kuxuttesesa be degesso geede ye axi uddinawo be keengichosha zal'i ye bidzi modhe baseni e woondo" yeydi e hido.
47 Sekke Yesuusani "Afa kaatetey bagadiya dafutti gulxhe e bishake e bishakeysi bhikkilli ayke maarabeko e bishe. 48 Gulxhe aykeesiti ye esa e kundoyna goosshiko bagade nuunaa u kesse. Modhe modheni xhardi be miijhiya u gade, iita maaqeesita kessi wora u dakke. 49 Ha saha also wonteni ye esukeko e maaqe. Wonto woosaxitini yoodi gizo axitaafa iita axita u shahe. 50 Iitana eexhe tamaani u dafutte, yahani u yeeke gaggoni u qiice" yeydi e hido.
51 Yesuusay "Ta zeerdosi uddina hinuse geliya e yese?" yeydi e oycine "Eewwa" hidi uydo. 52 Esini "Ooneni Muse woga erusesi afa kaatete oge hame be ayto geede bidzi woduma axi kuxuttese be miijhe bhikkilli be gaddecho godofa burosaara geedesaara shati kessi gadda axuko e bishe" yeydi e hido.
Nazrataxiti Yesuusa haassi u dhaddosa
Mrq 6:1-6; Luq 4:16-30
53 Ha mamakita zeerdi be ellusso geede yahafa Yesuusay 54 be wude Nazrate katamaaka e yoodo. Ayhuda Bhikkilo Zawaani e erusso. Ye esa siidasiti uddi du'eysine "Ha axi ha eraara ha micushe hantaara ayafani e etto? 55 Gere, esi mixe massichashi yele maaquwaye? Esindoy Maarame maaquwayya? Esindo na'axhey Yayqoobe, Yoosefe, Simooniyara Yuudaara maaquttuwaye? 56 Esindo bunaycey uddina nuura maaquwaye u yesesi? Hinne haanke yese era ayafani e degesso?" yeydi hissine 57 e zeerdosa siye inxhadhi u dhaddo. Yesuusani "Kaayaxi fede wudiyako e kuxutte, e wude axitaara e zawa axitaaramay esa kuxuttuwasso" yeydi e hido. 58 Esa aadekoydi efe u dheeddo gisha yaha laga micushesha hanto baasso.