12
Sanbata gisha
Mrq 2:23-28; Luq 6:1-5
1 Yenniyaka bidzi sanbata wonte Yesuusay tissheshe gossa giddaanna gariya e yecha. Esaara hangicha e erusichoshiti be naaydecho gisha ye tishaafa shitti etti dhoge u ayto. 2 Farasaxiti ye esa beedi Yesuusako "Beewwa! Ne erusichoshiti sanbata wonte wogay tucceshesha u hantesa" yeydi u hido.
3 Yesuusani "Dawitey beera yecha axitaara be naaydoniya aba e hantosa fetto fissharowa zeerusso baytuwa? 4 Kahinitawo baaka ooneni muuwadechosha wogay tuccechosha hayla boora Wonto Zawaa gelli beera yechashitaara e muudo. 5 Feday assi sanbata wonte kahiniti Wonto Hayla Zawaaka sanbata wonte wogay tuccechosha u hantusune ususe cubbo e maaquwannike Muse wogaa diizuttesesa zeerusso baytuwa?
6 Hinuse ohoko ta ohe, Wonto Hayla Zawame garesako haya yesa. 7 'Tani worgesi maaroko baaka kaasha maaquwasso' hidi fissharowa zeeruttase gaxxhako bayso keenguwasiti gara yaa'uwadiko hi yecha. 8 Tani axi yeley sanbatase Laaxuko" yeydi e hido.
Kuche siillese axi loollosa
Mrq 3:1-6; Luq 6:6-11
9 Yesuusay yahafa dendi Ayhuda Bhikkilo Zawa handi e gello. 10 Bidzi e kuchey siillese axi yaha e yecha. Bidzi bidzi axiti Yesuusa luufese be wordo gisha esa "Sanbata wonte hargaxe looluse wogay tucaa e tuce?" yeydi hissine u oycco.
11 Yesuusani "Hinukaafa bidzi dore keengesi ye dori hobolowa undako sanbata wonte ye hobolowafa goosshi kessuwasi ooneni? 12 Axi hinne waani dorume garuwane? Ha e gisha modhe hanta sanbata wonte hantey tucuttuwasso" yeydi beydo geede 13 ye adeni "Ne kuche zee'uwa!" hidi e hido. Be kuche e zeedhine loolli se esukewo e maaddho. 14 Yahafa be kesso geede waysi Yesuusa be wodhenike Farasaxiti wolla u kundo.
Yesuusa gisha ohutta kaayo
15 Yesuusay wolla u kungesa erdi be yecho godofa dhaddi e hando. Laga axitini e geede handine hardechashita uddinawo e loolusso. 16 Bemba oonekoni u oduseeme e kassho. 17 Yeydini e maaddhosi kaayaxi Isayasena
18 "Ha esi ta xhardese ta maraxuko. Esako ta eehe, esunako ta magge, ta Ayaanani e garako ta gade, esini ha saha gara yese axituse gizo yaa'a woggay ellonikeko e ohe.
19 Bersuwasso, kato keddaysi zeeruwasso, be katoni gadhesa giddaa siisuwasso.
20 Waaxi nuuna yese miidhuttese galeni meysuwasso, bayese uddhese faqeni baysuwasso. Yeysi e mahuwasini gizo yaa'ay iichoro aalloko.
21 Ha saha gara yese axitini uddina esawoko u gobbe"
yeydi hiyuttecha kaayoy aaloronikeko.
Yesuusay xhoozi gara keenge osa
Mrq 3:20-30; Luq 11:14-23
22 Ye e geede Yesuusako e gara xhoozi yesine e beewanikiyara e zeeruwanikiyara matecho axe u oodo. Yesuusay ye axe e loolusine zeeresaara beyesaara e dandadho. 23 Axitini uddina micci "Hinne ha esi Dawite yeliyani?" yeydi u hido.
24 Farasaxiti ye esa siidi "Xhooze e kessesi Bi'eelzebuleydi hiyutte xhoozuse afana maaganawoko" yeydi u mato.
25 Yesuusani u maxo erdi "Sekke hanke wola shahe kaatetoy ungoko e unge. Sekke hanke wola shahe katama axiti oo'oyne bidzi zawa axiti miindi yesuttuwasso. 26 Humbayey be badita e gooda'ayko sekke hankeko wola e shato hidi hiyoko. Hinne e kaatetey waydi miindi e yese? 27 Tani xhooze Bi'eelzebulena goodesa maaddhako hi bade axiti abanawo u goode? Ha e gisha usoko hi gara yaa'esa. 28 Wonto Ayaanana xhooze ta gooda'aykoma yey Wonto kaatetey hinukaa yoodosso hidi hiyoko. 29 Hinne bidzi osaxe tutto badi ye e zawaa gelli e keeme waakisini bonqese e danda'e? Esa be tuttosi geedewoko ye e keengesa bonqese e danda'e.
30 Hanke taara bhikkiluwasi budoko e bude. 31 Yeydiko hinuse tayne. Axi hanto cubbowara axi cassho cashowaray uddi 'Attuwaye' hidiko e hiyutte. Ayaana Geeshe cashe axi baysomay 'Attuwaye' hidi hiyuttuwasso. 32 Taa axi yele casheshi uddiko e baysoy 'Attuwaye' hidi e hiyutte. Ayaana Geeshe casheeshushema ha sahaani maaqqe yoone kille sahaakani e baysoy 'Attuwaye' hidi hiyuttuwasso" yeydi e hido.
Mixi be aafena erutte gisha
Luq 6:43-45
33 Sekke Yesuusay "Bidzi mixi modhiyara iitaara e maaqesi be aafenako e erutte. Mixi modhe hi keema'ayko modhe aafeko hi degexe, mixi iita hi keema'ayko iita aafeko hi degexe. 34 Hinuno shooshi nayshito! Iita maaqisine waydi modhe zeerese hi danda'e. Axi be nuunana e zeeresi muxhurowa kundasafako. 35 Axi modhey be muxhurowa kunda modhiyafa modheko e zeere. Axi iitay be muxhuro kunda iitaafa iitako e zeere. 36 Hinuse ohoko ta ohe, abani maaquwa yaho zeere be zeeresuna axiti yaa'a wonte abame be zeerdonike e bidzi bidzinako u ohe. 37 Ne zeerdo zeerena gizo ne maaqe, ne zeerdo zeerena ne gara e yaa'utte" yeydi e hido.
Micushe abako e beysorosa uddha oyche
Mrq 8:11-12; Luq 11:29-32
38 Bidzi bidzi Muse woga eruseesitaara Farasaxitaaray Yesuusako "Laaxo, micushesha ne hantusune beyesuko nu worge" yeydi u hido. 39 Esini "Iitaara Wonto dhaddi fede wontoko hangesaara maaqe ha beraa yese axiti micushesha beyesuko u worge. Kaayaxi Yonase gara hantutta micushe hantame fede micushe hantay beysuttuwasso. 40 Gulxhe orje gawwaa Yonasey haydzi wontaara qamaara e adhonike tani axi yeley saha oomo haydzi wontaara qamaarako ta dece.
41 Nenewe katama geriti Yonasey otosa siidi be cubbo dhaddi be maaddho gisha dendiko yaa'a wonte ha beraa yese axiti gara u yaa'e. Fetto Yonaseme garesako haya yesa. 42 Oomo bade kaate maaqicha indo Saabay Salamone erana zeeresa siyeme hissine ha saha wosulaafa dendi i yoodo gisha yaa'a wonte ha bera axitaara dendiko sekke u gara i yaa'e. Siwwayte, Salamone garesako hay haya yesa" yeydi e hido.
Gooduttecha xhoozi maaddhi yoonenike
Luq 11:24-26
43 Sekkeni Yesuusay "Xhoozi axi garafa goodutti be hando geede kaxe efese seya haya e hante. E hante godoni waaxi essa baa shanka mela uddi e maaddhoyna essa kaxe be ekke godo e dheegge. 44 'Essaafa ta kessecho zawako maaddhi ta hange' yeydi hissine hanke maaddhi e yoosune ye zaway mela maaddhi fitutti naqutti yesune e degexe. 45 Ye xhoozi handi beeme gare iita laappi xhoozaxhe etti yoodi gelli yaha e yese. Ye axuse geede yesoy burome fetto e iite. Ha esa bisheshako ha beraa yese iita axita muhesa" yeydi e hido.
Yesuusaara zawa axitaara
Mrq 3:31-35; Luq 8:19-21
46 Hagawo Yesuusay axituse zeeriya e yesune esindowara esindo na'axhitaaray esaara zeerese wordi yoodi karaa eedhine 47 yaha yechashitaafa bidzi axini Yesuusako "Neera zeeresuko neyndowara neyndo na'axhitaaray yoodi wude eedhese" yeydi e hido. 48 Yesuusay sekke mati "Nuundoy ooneni? Nuundo na'axhiti ooniyaxhuni?" hidi hissine 49 be kuche be erusichoshituko beysi "Nuundowara nuundo na'axhitaaray hay ha usitako. 50 Afaa yese nuwadey worge hanta hanteesitako uddina nuundo na'i, nuundo bushoy, nuundoy ye usoko" yeydi e hido.