Yik Waifi Wadien Fobi Maifim
21:1-8
21
Mde Yohanes tet thot yik waifi wadien fobi maifim yhok ro kat, fe hra yik wasayen, fobi wasayen ei ysiet wale. Siwan om mak dait oli. 2 Sba ofo tet thot kota mlais kat, o le ma Yerusalem maifim, mais maka mahin Allah wak wi mayehet ago, mde kayi na dli mor hra mlek-lek fali hriet main mse msmian ou wak. 3 Sba ofo, tet toso ro kat salo mahin ni maleli raja wfe kom msalo kaf kat mto: “Mde madien hra ko Nago wadien sisi na tkoin, wase sisi wadien ei. Na mna ou waka wadien sisi na tkoin, se bo ei yibe ou wfe nai, ei ykain Ou wabe ei yfe Allah. 4 Waka wyan kat siklia, wadien eigi oli dait, nai yrwe oli dait, nai yiwa oli dait, nai ykan otot oli dait, ha ni hra yhmat ekei yisak kadio wale.”5 Ou le hra wleli wak ni mleli raja wfe oko wrana wto: “Hra ko nan nhot Tet tsiok ni ke yfi kadio kat!” Wrana fot man tet wto: “Nsroin kadio kat ni hra tet trana kei, yibe yto tkoin, mde nai ysamenie fe ytkoin kat le mke.”
6 Wto oli man tet wto: “Mfot kat wale. Tet tke le Alfa, Tet tke le Omega. Tet tabe Nago wasayen, Tet tabe Nago wakahlia kat. Na man hra ysitolo ei, na kadio kat man hra ysitolo, ofo yka yoko kla ron mahin Tet tak, yoko samne deri mahin kla sitai hra mhnak ron lis om. 7 Na man sio ma whron kein wten wkaso man Tet, wkait flie kat Klebet Wafleu, bo Tet thnak ni ybot kadio hra trana krek fe wale man ou. Bo Tet tabe Allah tan ou, ou wabe tfe wet. 8 Mahin, ni ybot ekei yin dait na wat yde hra: na hra yeliek nai ofo ysamenie fe dait Yesus he, na hra yten dait ykaso man Yesus ou he, na hra ysiok ni hra yhnak sgia fe nai he, na hra yska nai he, na hra yemir sgia he, ysiok sebe he, na hra yifik ni heit-hat ysiok ni sihir ei afe ylan sawuan ni he, na hra ynok bosi ysaesik man ni klebet afe ni wat-wat he, na hra ysadir ywien kein nai. Na kadio kat ekei ywien fien dait hares hra mahin Nago wak. Yklat kat kadio yse kla siwan sala tewo hra madien amak smat belerang hra ydhen mbia kwelen. Oko le na ywak mabe eigi mau lak fem.”
Yerusalem Hra Maifim
21:9–22:5
9 Malaikat mreu waka wse tet tak. Malaikat oko wahin malaikat yikan mtalak hra tet thot wale ei, hra yslonti kempir mtalak yhon fe kafir mtalak kahlia kat ei. Mde malaikat man okou waka wse tet tak, wto: “Naka, bo tet tkakniet Wet Domba wsmian om, na dli mor om man nen.” 10 Nago Wawua om msisik mse tet tak, mde malaikat ou watik tet kayi mse sfa wakaslok wasa ago. Tak wale sfa okom mde tet thot mse ago, Kota Mlais Kat okom, Yerusalem, hra mais mahin wi mayehet, mahin Allah wak.
11 Kota okom, mhon fe fle kohok Allah wfem. Mnarak mtweit-twat mde le amak mabot mdlen kamyi kat, mde le amak mabram hra mat pitis yirok. 12 Dehe amak maflem, mkaslok mse ago, mdeheti kota om, madien hrede kda whi yahar teit lak, yidien malaikat yahar teit lak ykroti yik hrede wat-wat ekei. Yik hrede yisa ago, nai ysroin wat-wat kedi yahar teit lak Yakob wfe wet ei, hra yibe na sa Israel wat-wat ei. Hrede mres fo kedi mres, kayi de hrede yahar teit lak. 13 Yo mtato man mse tali mhok, hrede kda whi tolik. Mtato man mse tasik amak, hrede tolik. Mtato man mse tasik blen, hrede tolik. Mtato man mse tali mti aiti, hrede tolik. 14 Tembok hra mabe kda mdeheti kota om, mleli mak amak fondasi yahar teit lak. Yik amak fondasi yahar teit lak, ysroin Wet Domba wfe wedla rasul yahar teit lak ei ykedi wat-wat.
15 Mde malaikat hra wsadir wadien tet wsiokti tiyen kniet, mabe wto wkniet kota okom, wkniet kda madeheti kota madien hrede ekei. Tiyen okom mahin emas. 16 Kota okom mkakois hat, mlis madien mkatak ykniet sisi mres. Mde malaikat wkniet kota om, ofo mlis wain 12000 stadia, o le ma 2400 kilometer. Mkatben ei, mlis mse ago, msadiak fot mde le hra mse fobi aiti. 17 Mfe kda mdeheti kota om, mkodo 60 meter, wkniet fot. Malaikat ou wsiok kniet om, msadiak madien kniet hra na tkoin ykniet. 18 Kda kota okom nai ykda amak fem, amak mabota mnarak mbot kamyi kat. Msilok mde “yaspis,” hra mhen madien mabram mkdia-kda kat. Mde kota mabrim nai ysiok mahin emas mri mabot, mdhen mnarak mbot mde le kaca. 19 Amak hra ysiok yibe fondasi kota okom, yehin amak ybot yewer kamyi katb hra yheit-hat, mre yihen, mre yibra, mre yri, mre ytweit-twat, mre yimniak, yheit-hat kayi de yahar teit lak ei.
Amak fondasi masayen om mahin amak mabot “yaspis,” hra mhen mbra mkdia-kda.
Ma lak om amak mabot “nilam,” hra mbra mtweit-twat mak mabri.
Ma tolik om amak mabot “mirah,” mde le amak mniak mwe-mwa.
Ma hat om amak mabot “zamrud,” hra mkdia-kda mbra tweit-twat mak mabri.
20 Ma mahot om amak mabot “unam,” hra msafarat mkdia-kda.
Ma mtamre om amak mabot “sardis,” hra mhen mde katili.
Ma mtalak om amak mabot “ratna cempaka,” hra mri mtweit-twat mak mabri.
Ma mtadolik om amak mabot “beril,” hra mbra mtweit-twat mak mabri.
Ma mtanhat om amak mabot “krisolit,” hra mhen mtweit-twat mak mabri.
Ma yahar om amak mabot “krisopras,” hra mbra mkamian.
Ma yahar teit mres om amak mabot “lazuardi,” hra mhen mkamian.
Kayi de amak ma yahar teit lak om, amak mabot “kecubung,” hra mhen mbasbik mtweit-twat mak mabri.
Yaher kayi de amak yahar teit lak.
21 Hrede yahar teit lak ei nai ysiok yehin amak yelek hra yibot ysilok yde le mutiarac yfle karmiak kat, hrede mres amak mutiara mres. Fan om nai ysiok madien emas mri mbot mde kaca, yhot sros ni.
22 Tet thot dait Bol Kohok Nago wfe mrem mak dait kota, mdain, fe hra Nago Allah hra Wkanas Wewer Kat wadien Wet Domba, na mna la yibe Bol Kohok yik kota okom. 23 Tali madien mok la ydhen yhanak dait kota okom, mabe na mna Allah wfe kohok om mdhen mhanak kota okom, Wet Domba wabe sitin wdhen whak wak kota okom. 24 Mde na sa marok kadio kat bo yein fe kota mdhen mnarak om. Safe raja ei bo yka yotik yfe kohok warok ei ysanfe yin Nago yibe yhdin Ou. 25 Hrede kota okom yiheit ygiet khak kawuak, nai ylakti dait hrede fe amuk wak dait okou. 26 Na sa kadio kat bo yotik kohok warok hra yfe ytrik fali yse kota okom yibe yhdin ysaesik man Allah wadien Wet Domba ou. 27 Ni hra ysgia na yotik dait yloit yse kota okom. Na hra ykedi sgia fe ysiok ni hra yolot fe yibri yisgia, mde le ysaesik man ni wat-wat, afe na hra ygebra sawuan, ofo ytrik dait yse kota okom. Ha na hra ykedi nai ysroin wale yik buku ma Ron hra Wet Domba wfe okom, ei sok le ma ytrik wata yse kota okom.