Kla Ron
22:1-5
22
1-2 Mde malaikat ou wkakniet ni man tet. Tet thot kla hra whnak ron fe nai, mhok mahin Allah wadien Wet Domba yfe ni maleli makohok om, mdolon main fe fan kota om mabri. Kla okou wbra kayi kaka kat. Mdolon flalie wkoit ei yolo aiti, wkoit hra yhnak ron fe nai, yik kla yitefit. Wkoit eke ykan ta-ta kawuak, mok mres, ykan mao mres, der om mres ykan mao yahar teit lak, yitatol yidien mok yahar teit lak. Yilas eke yibe yweyen na sa marok se bo ni kaini ei ydain. 3 Nago wfruo kat oli dait ni mrem afe na mrei.Mak kota mabri okom, Nago Allah wadien Wet Domba la yfe wi ma sa hra na yifle yleli fe, o le mkom. Wfe wedla-wedli ysaesik man Ou. 4 Bo yhot Ou wsifuon. Nago wsroin Ou wkedi Ou wam mak ei ysadit. 5 Amuk wak oli dait ana. Nai yswin fe oli dait sitin, yihot oli dait tali om, fe hra Sma Allah le wnarak ta, wyak ei. Bo ei yleli yibe klen wsa fe, yslonti fle kohok kayi de dian kat.
Tuhan Yesus Bo Waka
22:6-17
6 Ofo malaikat ou wto man tet wto: “Ni hra tet trana ke tet trana tkoin kat, nai yten ykaso fe. Sma Allah hra kamuolo wteye wale nabi wkororo ei yibri ra se bo yrana krek ni, Ou le ma wteye fot wfe wedla malaikat tet trana ni fe nan, tkakniet man wfe na dihan nan mabe ni kadio hra bo yhok tamli kat.”
7 Yesus Kristus wrana wto: “Noso la, bo Tet taka tamli le mke! Na man sie ma ysiwain ysiok ni hra tet trana krek fe mak katik fari okom, bo ei ykashok kat!”
8 Yohanes tet le ma toso kayi ni eke, thot kayi kadio kat ni eke. Mde tet tsaesik man ou, tbatoko tteit tak malaikat hra wkakniet ni eke wteit olo aiti. 9 Mahin ou wtoji tet wto: “He, mala! Nsiok dait mde ke! Nsaesik wata deri man Allah! Wabe tet tke tsadiak tde le nen, tabe fot deri na dihan tde le nen, tde le fot nable man ei, nabi man ei yidien fot na kadio hra ysamenie fe, ysiwain ysiok ni hra yisroin yik katik fari okom.”
10 Mde malaikat wto man tet wto: “Yo, nlak diaman dait ni hra ysroin krek wale yik katik fari ei yila, wa mayi fe mataren le mke. Bot ke, ni hra ke yhok kadio kat. 11 Na sio ma wyaka wsiok ni sgia yliokeit wsiok watai, na sio ma wsaesik man ni wat-wat, yliokeit wsiok watai. Ha na hra wsiok ni hra Nago wfe fo, wsiok kawuak wata ni hra Nago wfei. Na hra wbot wyenes kat fo, wbot wyenes kawuak wata.”
12 Mde Yesus wto: “Noso la, bo Tet taka tamli le mke! Tet taka fali ni ytasa ytatol yidien ni hra nai ysiok ei. 13 Tet tke tabe Alfa, tabe fot Omega. Tet le ma tahin sayen, kawuak de tkahlia kat.”
14 Mabot karmiak kat man na hra yware wale yfe not trik kayi de ybot. Bo Yesus tet tbahe yloit yse kota kom, yein fe hrede kda whi, yeit fot wkoit ykan waron yik kota mabrim. 15 Mahin na hra ysiok ni ysgia ei, yik tlein kadio kat. Na hra yifik ni heit-hat ysiok ni sihir ei afe ylan sawuan ni. Na hra yemir sgia afe ysiok sebe. Na hra yska nai. Na hra ynok bosi ysaesik man yfe klebet afe, ni wat-wat afe, ofo ynok dait yse Nago wak. Na hra ysadir ywien kein nai, ykashok fe ybait lolot na. Mde na kadio kat hra ekei, yloit dait yse kota okou, yik deri tlein.
16 Yesus wto, “Tet le mke, tbahe wale tfe wedla malaikat ou wrana hatot ni fe nan, fe jemaat nan ei. Tet tke tbias, tlelen tahin Daud wak. Tet tke le tabe sloi, thok tdhen tadien sies mkerek.”
17 Nago Wawua om mwit fien mto: “Naka la!” Na dli hra ytwayit mse Na Dla Ou waka, om mwit fien fot mto: “Naka la!” Na man hra yoso ni ke, ofo yrana siar kein wata ysol yto: “Naka la!” Na man hra yibri ysitolo, yka wata. Na man hra ybahoin yoko kla hra whnak ron, yka wata ywien fien ofo yoko ysamne deri.
Wakahlia
22:18-21
18 “Nnok deri, na sio ma hra woso ni hra tet trana krek wale, mto wtbak kein ni mrem ofo, Allah wtbak kein yin ou kafir hra ysroin wale yik katik fari hra kom. 19 Na man sio ma wkothok kat ni mre yehin katik fari kom ofo, Allah bo wkothok kat ou wahin kota malais kat om, wat dait wkoit ron ou wkan mrem.”
20 Yesus hra wrana fe ni kei yin Yohanes tet, ou wto man tet: “Bo Tet taka tamli le mke!”
Yo, mbot!b Sma Yesus, naka wata!
21 Mabot ma Sma Yesus whnak hares wfe om man Nago wfe na kadio kat faf! Yo, mbot! c