Yohanes Whot Malaikat Wslon Fien Lua Bres, Wklat Wse Kmain Solot Kafir Der Seribu
20:1-6
20
Yohanes tet thot malaikat mreu wais wahin wi mayehet ago. Mak wna wsiokti kunci hrede kmain solot kafir, kmain mkadlo kat, madien wslon fot omos fom wabe whirit lua bres wafleu. 2-3 Lua bres oko le ma Klebet Wafleu hra wabe lua hra wahin kamuolo wasayen kat, le hra wkedi fot “Satan.” Kedi Satan o le ma “na wa har kat sawuan na.”Mde malaikat wkami Klebet Wafleu waka, wkaitti, wklat kat wti wse kmain solot kafir eigi mabri aiti, mde wdanti kat magiet om. Wdanti wkaitti-ti kat mtodo, wlouk meterai om maka, wadam mbatbak mak magiet om maisti mabe kyat, se bo Klebet ou whok dait, wwien kein oli dait na sa marok om. Kayi de der seribu (1000) ei yfot sba. Der 1000 wakahlia kat yfot sba de, malaikat bo wkothok kat oli Satan ou, Klebet Wafle ou, waka wase semfe dait, bo yhirit oli ou.
4 Mde tet thot oli, na marok yleli yik ni ma sa takhta hra na yifle yleli fei. Na ekei, Nago whnak wale fle fe, se yslonti na wat man ei. Mde tet thot fot na tkoin hra nai yska yeigi wale, fe hra yrana siar wale giet mabe Yesus madien fot Giet Allah wfem man na wat. Mde yfolo kat ydioro.
Yaha kat fot wale ysaesik man erwas hra wayaka ou. Ysaesik dait fot man ou wfe ni mrem hra msilok mde erwas okou. Ekei le hra kaman yaha wale ni barnia hra erwas wayaka wbahe nai ysroin yik ysadit afe, yna kedi afe. Ei yaha ysiwain dait ou. Yeigi wale ha tet thot ei ysidik yron oli. Mde Allah whnak fle fe man ei, se bo yleli yidien fali Kristus, ysiokti sisi ni, kayi de dian kat der 1000 ei. 5 Hra nai yfolo kat ydioro ei le ysidik lalie yelin sba fo, yo der 1000 ei yfot fo, na marok hra yeigi kadio kat wale ysidik fot yidien le mbat lak fem. 6 Hra ysidik masayen om ei ykashok kat! Ekei le Nago wfe na hra ykohok ylais. Bo yeigi oli dait mau lak fem. Yiheit yron deri ysiok ni yibe na kni tara hra ydihan fot Allah, ydihan Kristus fot, yslonti sisi ni yibe klen sa kayi de der 1000 oli.
Nago Warin Fit Klebet Wafleu, Wkait Flie Ou
20:7-10
7 Mayi fe der 1000 om mdain sba fo, malaikat bo wnahla kat Klebet Wafleu, whokti kat wahin wi hra yhirit ou, o le ma kmain solot mabrim. 8 Mde waka wain siar wse fobi katak, wahin yik wolo, tali wolo, wsadir wwien kein na sa marok. Ou wwien kein ei se yka ybalifis yse ou wak yibe ykhan yidien Nago wfe nai. Na marok ybalifis yse ou wak yde hra nabi Yehezkiel wrana krek fe wale, wrana fe na sa marok yik fobi katak kom yibe raja Gog, wadien wfe na sa Magog. Ofo Klebet Wafleu bo wkoyo kadio kat ei yibe yka ykhan yidien Nago wfe nai. Hra nai yaher dait ei, yrok yde kinti mak siwan tefit, yka ykhan. 9 Mde yehin fobi katak ei yka ylalo wi hra Nago wfe nai yese om, kota Yerusalem hra ou wkashok fe om. Ysin samhak wata yska na hra Nago wfe ha, Nago wti kat lalie sala mti mais mahin yik ago mat na hra ykhan ei, ydiris kadio kat. 10 Mde Klebet Wafle oko hra wsadir gebra wwien kein wale na sa marok ekei, ei ybir kat wse siwan sala wdhen amak smat mbia kwelen ou wabri, siwan sala hra kaman ybir kat lalie erwas lak ei, erwas wayaka wadien fot nabi hra wgebra na ou, yhlet ni sgia kawuak lis amuk tali.
Sadir Fe Wakahlia Kat
20:11-15
11 Mde Yohanes tet thot ro kat, wi ma sa hra na yifle yleli fe mrem, takhta om, melek, maflem, madien thot Na Mreu wleli wak ni maleli raja wfe okom, ofo yik wadien fobi ysiet yehin wbariomo yisak kat, yhot oli dait. 12-13 Mde tet thot na hra yeigi wale, yhokti kat wi ma eigi om, man hra ykak yik siwan wabri ale ysidik oli, hra ykak yik tlein ysidik oli, hra yehin wi ma eigi om, hra yehin Mla Sminggir om, hra ywet yfle, ysidik kadio kat. Tet thot ei ykro ytatol Na hra wleli wak wi ma sa hra na yifle yleli fem. Ofo wlouk fien buku kadio ei yka, wko khak de wsmit lien, ysroin wale ni hra nai ysiok kadio kat ekei. Ofo Allah wsarife ei, whnak satian ytatol yidien ni sgia hra ysiok ei, kayi de yfot. Ofo wlouk wat kdie buku man om maka, buku maron. Buku okom ysroin nai ykedi hra bo yron lis. 14-15 Wsmit lien na mre ykedi ysroin dait yik buku maron aiti ofo, yklat kat yse siwan sala hra wdhen. Siwan sala o le ma eigi mao lak fe le mkom. Mde kanas Eigi om madien fot Mla Sminggir om nai yklat yse kla siwan sala hra mdhen lis. Eigi om madien Mla Sminggir om ydain kat.