Nai Yhdin Ytiksi Nago Allah Wabe Kota Babel Wti
19:1-5
19
Malaikat ou wrana kahlia kat ni mde Yohanes tet toso salo maflem, mde le na marok yhi ykawu kat yik wi mayehet ago, yto:“Ftiksi Nago Allah Haleluya! a
Ou le weren kaka na tkoin,
Ou le wfle kohok, Ou le wkanas!
2 Ftiksi Nago Allah fe hra Ou wrana kat ni
ytatol ytoron kat.
Wrana kat ni ytatol mabe kota mafle om
hra mde le na dli mdom,
whnak kafir man om mabe mkafe satian. b
Kota hra mde le na dli mdo okom, msiok sgia wale fobi kom
mkein fien nai yehinti kat Nago,
se nai ysiok sgia yidien ysaesik yse ni wat.
Faf ftiksi Nago Allah wabe whnak satian man om,
wtriesi hen mahin wfe wedlai hra na kota okom yska wale.”
3 Ofo na marok om ysalo yhi ytiksi mao lak fe yto:
“Haleluya!
Sala hra mat na dli mdo om, kota mafle masgia om, mdhen lis,
mbi marin kayit-yit kayi de dian-dian kat!”
4 Mde na tmak yikan na mre waigi whri na wna hat ei (24), hra yslonti ni Allah wfe, yidien fot ni yron hat eke, ybatoko yteit ysaesik yhdin man Allah hra wleli wak ni maleli raja om, ytiksi Ou yto:
“Ahe, Haleluya, yo mbot!”
5 Mde salo mre mhok mahin raja wfe ni maleli om mbahe mto:
“Nago Allah wfe na bahe nan, nhdin man faf fe Allah wee!
Na kadio hra neliek nnok yse Ou wak,
hra nwet kawuak de hra nfle,
nsrar heyit man faf fe Nago wee!”
Ni Ylek-lek Wale Yibe Na Yeit Ni Seris Domba Wawet Wsmian Kmo
19:6-10
6 Mde Yohanes tet toso na marok karmiak kat ei ysalo mfle mhi mde le kla maflem mhi mtlok, mde fot le rgiho hra wsalo wdolon, ei ysalo kaf kat ysrar heyit man Allah yto:
“Faf ftiksi Nago Allah, Haleluya!
Sma Nago faf fi Wkanas Wewer Kat,
wslonti wale fobi katak kadio.
7 Mde nan nka faf fkashok fin Ou,
fhdin Ou wabe wfe fle kohok om!
Fkashok mabe hene mhok wale.
Na dla mor ou, hra nai ywak wabe Wet Domba ou, wleli kein wale hene om,
hene magiet om mataren kayi wale,
mabe bot ke nai ytwayit na dli mor omc mse ou wak.
Fkashok mabe dli om mhriet wale mlek-lek,
mleli kein deri mabe nai ytwayit.
8 Dli om mhriet wale madien not lenan lef,
not hra mhmes yelek kat
hra Nago Allah whnak wale yin om mtrik.”
(Ytwayit om mflet mabe Nago Allah wfe nai ykashok yka yse Yesus ou wak. Not lenan lef mflet mabe ni hra faf fsiok ybot ei, Nago Allah wfe na faf fke fsiok ybot hra Allah wsamenie fei.)
9 Mde malaikat oko wbahe Yohanes tet tsroin ni mre le mkei: “Nago Allah wsol fien wale wfe na tiktol ei. Bo yka yeit sisi ni yibe, Wet Domba wto wsmian kmo. Bo ykashok kat!” Malaikat wrana oli wan tet wto: “Ni hra tet trana kei yto tkoin kat fe hra yehin Nago wak.”
10 Tet tti tba kmuon tse wteit olo fobi aiti mabe tsaesik man malaikat ou. Mahin ou wtoji tet wto: “Mala! Nsaesik man dait tet tala! Tet tabe fot wedla tan Allah tsadiak fot tde le nen. Tsadiak fot tde le nen nable wai hra yna todo yse Yesus, hra ysiokti ni hra Yesus wyen hata. Nsaesik deri man Allah! Tsadiak fot tde le na hra yrana kein giet Allah wfe mabe Yesus. Mam mrana giet om main fe Allah Ou Wawua hra Makohok om.”
Yesus Waka Wabe Na Sebe Wsiokti Kaisin Wi Mayehet
19:11-16
11 Mde Yohanes tet thot ro kat wi mayehet om mgiet khak, ofo thot na mreu. Na oko warin kuda wa elek le wko. Nai ywit ou le ma: “Ou le wsiok mtatol mde le ni hra ou wrana ei.” Ywit ou fot yto: “Ou le wto tkoin.” Ou wkerek sadir fe ni hra ytatol kawuak, wrana ni ywat-wat dait. Wkhan wtatol yidien na hra ysiok ni sgia.
12 Wsifuon ydhen yde sala. Mak wsa masa ago, ou wsa kya thain rok-rak hra raja ei ysa ei. Wkedi om, le ysroin man wkan ou wam mahin, wkedi wa om na wat mre ynok dait, na mna mres wnok deri wkedi wam. 13 Wtrik not trik malis hra yboyok madien hen. Nai ywit ou wkedi mabe “Giet Nago wfem.” 14 Na marok yibe ou wfe wedla kaisin yik wi mayehet ago ei yein sisi, ou walin warin wat kuda wa elek ou wa, ei yorin wat kuda yi elek ei yi. Wedla kaisin ekei ytrik not lenan hra ylef yhmes yelek karmiak kat. 15 Tet thot mnian klabra hra mat miasan kat mhok mahin wgiet. Mnian okom mabe na sa hra yidien sgia ou ei, wskai, wsiokti wbai yidien wkanas, mde le wba yidien tiyen madrot. Bo wtrere wkait tra yde le hra na ykait tra wkoit anggur yfuon kayi de yibe kla anggur. O le ma Allah hra Wkanas Wewer Kat ou wtrere wiyaka man na hra yoso dait ou, ysiok ni sgia ei. 16 Yo, na hra thot oko wkanas wewer, de tet thot man wfe not trik malis om, mak wkabalak om, nai ysroin kedi mre o le ma:
“Wabe klen sa hra wslonti klen sa wat kadio kat man ei, Sma wafle hra wslonti sma warok kadio kat man ei.”
Na Waorin Kuda Warin Fit Na Khan Hra Ykhan Yidien Ou
19:17-21
17 Ofo Yohanes tet thot ro kat mse yik ago fo, thot malaikat mreu wkro ro kat wak tali molom, wwit fien kadio kat klen oweri hra yhri ykadlo yse yik ago. Wwit fien ei wadien salo wfle karmiak kat, wto: “Nan nyo nka kadio kat nse ko yibe neit ni eit hra Allah wlak kein. 18 Yo wlak kein wale nai ykan fokot man klen nan neit, na tkoin kadio hra yaha kat ou, hra yidien sgia ou bo nan neit: raja ykan fokot he, na sebe kadio ykan fokot he, na kaisin ykanas ykan fokot he, kuda ykan fokot he, na hra yorin kuda ykan fokot he, na kadio kat ykan fokot he, hra yibe kawor yidien fot hra yibe dait kawor, yiwet afe, yifle afe, yibe klen nan neit.”
19 Mde tet thot erwas wayaka hra kaman tet thot waleud. Ou le ma na tkoin wafle wasgiau. Erwas wayaka okou wadien wfe klen wsa ei, yba kaisin ei yka. Ybalifis yibe yto ykhan yidien na wa orin kuda wa elek oko, wadien wfe wedla kaisin ou wa ei. 20 Mahin wa orin kuda ou wkanas wewer, wkami fien erwas wayaka oko. Wadien fot wkami wslon fot erwas wfe nabi ou hra wlolot wanik nai. Ou wkein kat tbouk lak eke ofo wbir kat yron latiot yse kla siwan sala tewo hra madien amak smat belerang hra ydhen mbia kwelen. Yo nabi hra wlolot nai, ou le hra kaman wsiok heit-hat ni owuok-awak wgebra na marok de yein sele fan.e Wsiok wadien kohok fle wahin erwas wayaka wasayen oko. Nabi ou wlak wale ni barnia man na hra ou wgebra ei. Ysaesik fot yin erwas wayaka wfe ni hra msilok mde ou. 21 Yo, ei yfe kaisin wat-wat ei, hra yiheit latiot ei, Na wa orin kuda ou wska kat kadio yidien mnian lis hra whok wahin wgiet om (o le ma wrana deri ni). Mde klen ei yka yeit ykan fokot kayi de ykesit kamyi kat.